المعجم الكبير للطبراني

یحییٰ بن بکیر رحمہ اللہ کہتے ہیں: ”سہیل بن عمرو کا انتقال شام میں اٹھارہ ہجری میں ہوا۔“

حسن بصری رحمہ اللہ بیان کرتے ہیں کہ قریش کے سرداران سیدنا عمر رضی اللہ عنہ کے دروازے پر جمع ہوئے، جن میں حارث بن ہشام، ابوسفیان بن حرب اور سہیل بن عمرو شامل تھے، اور وہاں رسول اللہ ﷺ کے صحابہ میں سے غلام اور موالی بھی موجود تھے۔ اجازت آئی تو سیدنا بلال اور سیدنا صہیب رضی اللہ عنہما جیسوں کو اندر جانے کی اجازت مل گئی، اور باقی لوگوں کو چھوڑ دیا گیا۔ اس پر ابوسفیان نے کہا: میں نے آج جیسا دن کبھی نہیں دیکھا! اس نے ان غلاموں کو تو اجازت دے دی اور ہمیں اس کے دروازے پر بٹھائے رکھا، ہمیں اجازت نہیں دی۔ اس پر سہیل بن عمرو، جو ایک عقلمند آدمی تھے، نے کہا: ”اے لوگو! اللہ کی قسم! میں تمہارے چہروں پر جو کچھ ہے وہ دیکھ رہا ہوں۔ اگر تم غصے میں ہو تو اپنے آپ پر غصہ کرو، ان لوگوں کو بھی بلایا گیا اور تمہیں بھی بلایا گیا، انہوں نے جلدی کی اور تم نے تاخیر کی۔ اللہ کی قسم! جس فضیلت میں تم سے سبقت لے لی گئی اس کا ہاتھ سے نکل جانا تمہارے لیے اس دروازے (پر باریابی) سے کہیں زیادہ سخت ہے جس پر تم ایک دوسرے سے مقابلہ کر رہے ہو۔“ حسن رحمہ اللہ کہتے ہیں: اللہ اس بندے کو، جو اس کی طرف جلدی کرے، اس بندے جیسا نہیں بناتا جو تاخیر کرے۔