المعجم الكبير للطبراني

سیدنا سہل بن سعد رضی اللہ عنہ سے روایت ہے کہ رسول اللہ ﷺ نے فرمایا: ”جنت کا ایک دروازہ ہے جسے ریان کہا جاتا ہے، روزہ داروں کو اس کی طرف بلایا جاتا ہے، ان سے کہا جاتا ہے: آ جاؤ، پھر جب وہ سب داخل ہو جاتے ہیں تو وہ دروازہ بند کر دیا جاتا ہے، پھر ان کے ساتھ کوئی اور داخل نہیں ہوتا۔“

سیدنا سہل بن سعد رضی اللہ عنہ سے روایت ہے، وہ کہتے ہیں: ”رسول اللہ ﷺ کے صحابہ تنگ دستی کی وجہ سے اپنے تہبند اپنی گردنوں میں باندھ کر نماز پڑھا کرتے تھے۔“

سیدنا سہل بن سعد رضی اللہ عنہ بیان کرتے ہیں... ایک عورت نبی کریم ﷺ کے پاس آئی اور اس نے اپنے آپ کو نکاح کے لیے پیش کیا تو آپ ﷺ خاموش رہے۔ وہ کھڑی رہی یہاں تک کہ ہمیں اس کے طویل کھڑے رہنے پر ترس آنے لگا۔ اس پر ایک شخص کھڑا ہوا اور عرض کیا: یا رسول اللہ! اس کا نکاح مجھ سے کر دیجیے۔ آپ ﷺ نے پوچھا: ”تم اسے مہر میں کیا دو گے؟“ اس نے کہا: یہی چادر جو میرے اوپر ہے، اس کے علاوہ میرے پاس کچھ نہیں، اور اس نے وہ چادر اپنے سینے پر باندھ رکھی تھی۔ رسول اللہ ﷺ نے فرمایا: ”بتاؤ، اگر تم شادی کرو تو کیا تمہارے پاس اس کے سوا کچھ ہوگا؟“ اس نے کہا: نہیں، اللہ کی قسم۔ آپ ﷺ نے فرمایا: ”جاؤ اور کچھ تلاش کرو، چاہے لوہے کی انگوٹھی ہی ہو۔“ وہ گیا اور جتنی دیر اللہ نے چاہی ٹھہرا، پھر واپس آ کر عرض کیا: مجھے لوہے کی انگوٹھی بھی نہیں ملی۔ آپ ﷺ نے فرمایا: ”تمہیں قرآن میں سے کیا یاد ہے؟“ اس نے کہا: فلاں فلاں آیت۔ آپ ﷺ نے فرمایا: ”میں نے تمہارے پاس جو قرآن ہے اس کے بدلے اس کا نکاح تم سے کر دیا۔“