المعجم الكبير للطبراني

سیدنا سہل بن سعد رضی اللہ عنہ بیان کرتے ہیں کہ غزوہ احد کے دن سیدنا علی بن ابی طالب رضی اللہ عنہ ڈھال میں پانی لے کر آئے، رسول اللہ ﷺ نے اس سے اپنا چہرہ مبارک دھویا اور فرمایا: ”یہ پانی تو بدبودار ہو چکا ہے“ یعنی اس کی حالت بدل چکی تھی۔ سہل رضی اللہ عنہ کہتے ہیں: پھر سیدہ فاطمہ رضی اللہ عنہا نے چٹائی کا ایک ٹکڑا لے کر اسے جلایا اور آپ ﷺ کے زخم پر رکھ دیا۔

سیدنا سہل بن سعد رضی اللہ عنہ بیان کرتے ہیں کہ سیدنا علی اور سیدہ فاطمہ رضی اللہ عنہما کے درمیان کچھ بات چیت ہو گئی، تو سیدنا علی رضی اللہ عنہ ناراض ہو کر نکل گئے اور خود کو مٹی پر ڈال دیا۔ رسول اللہ ﷺ نے سیدہ فاطمہ رضی اللہ عنہا سے پوچھا تو انہوں نے عرض کیا: میرے اور ان کے درمیان کچھ بات ہوئی تھی جس پر وہ ناراض ہو کر چلے گئے۔ رسول اللہ ﷺ باہر تشریف لے گئے تو دیکھا کہ وہ مٹی پر سوئے ہوئے ہیں۔ آپ ﷺ نے انہیں جگایا اور ان کی پیٹھ سے مٹی جھاڑنے لگے اور فرمانے لگے: ”تم تو ابوتراب ہو۔“ سہل بن سعد رضی اللہ عنہ کہتے ہیں: ”ہم انہیں اسی نام سے تعریف کے طور پر پکارا کرتے تھے، پھر کچھ لوگ اسی نام سے ان پر طعنہ زنی کرنے لگے۔“