المعجم الكبير للطبراني

سیدنا سہل بن سعد الساعدی رضی اللہ عنہ سے روایت ہے کہ رسول اللہ ﷺ نے فرمایا: ”اسلام کی ابتدا اجنبی حالت میں ہوئی اور عنقریب پھر اجنبی ہو جائے گا، پس خوشخبری ہے اجنبیوں کے لیے۔“ صحابہ نے عرض کیا: یا رسول اللہ! اجنبی کون ہیں؟ آپ ﷺ نے فرمایا: ”وہ لوگ جو لوگوں کے بگڑ جانے کے وقت اصلاح کرتے ہیں۔“

سیدنا سہل بن سعد رضی اللہ عنہ بیان کرتے ہیں کہ ایک دن رسول اللہ ﷺ ہمارے پاس تشریف لائے جبکہ ہم ایک مجلس میں تھے جس میں عمرو بن العاص اور ان کا بیٹا بھی موجود تھے۔ آپ ﷺ نے فرمایا: ”تمہارا کیا خیال ہے اگر تم اس وقت تک باقی رہو جب لوگوں کا نکما طبقہ باقی رہ جائے، جن کے عہد و پیمان آپس میں گڈمڈ ہو کر الجھ چکے ہوں، اور وہ ایسے ہو جائیں“، اور آپ ﷺ نے اپنی انگلیاں ایک دوسرے میں داخل کر دیں۔ صحابہ نے عرض کیا: اللہ اور اس کا رسول ہی بہتر جانتے ہیں۔ آپ ﷺ نے فرمایا: ”تم وہی اختیار کرو گے جسے اچھا سمجھتے ہو، اور وہ چھوڑ دو گے جسے برا سمجھتے ہو، اور تم میں سے ہر شخص اپنی ذات کے معاملے میں لگ جائے گا اور عام لوگوں کا معاملہ چھوڑ دے گا۔“