المعجم الكبير للطبراني

قیس کہتے ہیں: ہم سیدنا سعد بن مسعود رضی اللہ عنہ کی عیادت کے لیے ان کے پاس گئے تو انہوں نے کہا: مجھے نہیں معلوم لوگ کیا کہتے ہیں، لیکن کاش میرے اس صندوق میں جو کچھ ہے وہ انگارہ ہوتا۔ جب وہ وفات پا گئے تو لوگوں نے دیکھا تو اس میں ایک ہزار یا دو ہزار نکلے۔

سیدنا ابوہریرہ رضی اللہ عنہ بیان کرتے ہیں کہ حارث غطفانی نبی کریم ﷺ کے پاس آیا اور کہا: اے محمد! ہمیں مدینہ کی کھجوروں میں سے آدھی دے دو۔ آپ ﷺ نے فرمایا: ”یہاں تک کہ میں سعدوں سے مشورہ کر لوں۔“ چنانچہ آپ ﷺ نے سیدنا سعد بن معاذ، سیدنا سعد بن عبادہ، سیدنا سعد بن ربیع، سیدنا سعد بن خیثمہ اور سیدنا سعد بن مسعود رضی اللہ عنہم کو بلوایا اور فرمایا: ”مجھے معلوم ہو چکا ہے کہ عرب نے تم پر ایک ہی کمان سے تیر چلایا ہے، اور حارث تم سے مدینہ کی کھجوروں میں آدھا حصہ مانگ رہا ہے، اگر تم چاہو تو اسے اس سال یہ دے دو، یہاں تک کہ اپنے معاملے پر بعد میں غور کر لو۔“ انہوں نے عرض کیا: یا رسول اللہ! کیا یہ آسمان سے وحی ہے کہ ہمیں اللہ کے حکم کے آگے سرِ تسلیم خم کرنا چاہیے، یا یہ آپ کی اپنی رائے یا خواہش ہے، کیونکہ ہماری رائے تو آپ کی رائے اور خواہش کے تابع ہے؟ اور اگر آپ محض ہماری بھلائی چاہتے ہیں تو اللہ کی قسم! ہم نے دیکھا ہے کہ ہم اور وہ برابر تھے، وہ ہم سے ایک کھجور بھی حاصل نہیں کر پاتے تھے سوائے خرید کر یا مہمانی کے طور پر۔ رسول اللہ ﷺ نے فرمایا: ”یہ لو، تم سن رہے ہو جو یہ کہہ رہے ہیں۔“ اس پر انہوں (غطفانیوں) نے کہا: تم نے وعدہ خلافی کی اے محمد! اس پر سیدنا حسان بن ثابت رضی اللہ عنہ نے یہ اشعار کہے: ”اے حارث! جو بھی اپنے پڑوسی کے ذمے سے وعدہ خلافی کرے، بے شک محمد کبھی وعدہ خلافی نہیں کرتے۔ اور آدمی کی امانت جہاں بھی ملے، وہ شیشے کے ٹوٹنے کی طرح ہے، اس کی دراڑ کبھی نہیں جڑتی۔ اگر تم وعدہ خلافی کرو تو وعدہ خلافی تمہاری ہی عادتوں میں سے ہے، اور کمینگی اسی سخبر (کانٹے دار جھاڑی) کی جڑوں میں اگتی ہے۔“