المعجم الكبير للطبراني

سیدنا رافع بن عمرو غفاری رضی اللہ عنہ فرماتے ہیں: میں انصار کی کھجوروں پر پتھر مارا کرتا تھا، جبکہ میں ایک لڑکا تھا، تو لوگ مجھے پکڑ کر نبی کریم ﷺ کے پاس لے آئے، آپ ﷺ نے فرمایا: ”اے لڑکے! تم کھجور کے درختوں پر پتھر کیوں مارتے ہو؟“ میں نے عرض کیا: میں کھانا چاہتا ہوں۔ آپ ﷺ نے فرمایا: ”درختوں پر پتھر مت مارو، بلکہ جو کھجوریں نیچے گر جائیں انہیں کھاؤ۔“ پھر آپ ﷺ نے میرے سر پر ہاتھ پھیرا اور فرمایا: ”اے اللہ! اس کا پیٹ بھر دے۔“

سیدنا رافع بن عمرو رضی اللہ عنہ فرماتے ہیں: میں انصار کی کھجوروں پر پتھر مار رہا تھا، تو لوگوں نے مجھے پکڑ لیا اور رسول اللہ ﷺ کے پاس لے گئے اور کہا: یہ ہماری کھجوروں پر پتھر مارتا ہے۔ آپ ﷺ نے فرمایا: ”اے رافع! تم ان کی کھجوروں پر پتھر کیوں مارتے ہو؟“ میں نے عرض کیا: یا رسول اللہ! مجھے بھوک لگتی ہے۔ آپ ﷺ نے فرمایا: ”جو نیچے گر جائے وہ کھا لو، اللہ تمہیں سیر کرے اور سیراب کرے۔“

عبداللہ بن صامت رحمہ اللہ سیدنا ابوذر رضی اللہ عنہ سے روایت کرتے ہیں، وہ فرماتے ہیں: رسول اللہ ﷺ نے فرمایا: ”میرے بعد میری امت میں ایسے لوگ پیدا ہوں گے جو قرآن پڑھیں گے مگر وہ ان کے حلق سے نیچے نہیں اترے گا، وہ دین سے اسی طرح نکل جائیں گے جیسے تیر شکار سے نکل جاتا ہے، پھر وہ دوبارہ اس میں نہیں لوٹیں گے، وہ مخلوق میں سب سے بدترین ہوں گے۔“ سلیمان کہتے ہیں: میرا غالب گمان ہے کہ انہوں نے یہ بھی فرمایا: ”ان کی پہچان سر منڈوانا ہوگی۔“ ابنِ صامت کہتے ہیں: پھر میری ملاقات رافع بن عمرو سے ہوئی، جو حکم بن عمرو غفاری کے بھائی تھے، تو میں نے ان سے کہا: میں نے ابوذر سے ایک حدیث سنی ہے جس میں وہ ایسے ایسے کہتے ہیں - پھر میں نے انہیں یہ حدیث سنائی۔ انہوں نے کہا: ”تمہیں اس پر تعجب کیوں ہے، میں نے بھی یہ رسول اللہ ﷺ سے سنا ہے۔“