المعجم الكبير للطبراني

سیدنا ابومالک اشعری رضی اللہ عنہ سے روایت ہے کہ رسول اللہ ﷺ نے فرمایا: ”جس نے نماز قائم کی، زکوٰۃ ادا کی اور اللہ کی عبادت کرتے ہوئے اس حال میں فوت ہوا کہ اس کے ساتھ کسی کو شریک نہ ٹھہرایا؛ تو اللہ عزوجل پر یہ حق ہے کہ وہ اسے جنت میں داخل کرے، چاہے اس نے ہجرت کی ہو یا اپنی جائے پیدائش میں ہی بیٹھا رہا ہو۔“ ایک شخص نے عرض کیا: یا رسول اللہ! اگر میں یہ بات لوگوں کو بتا دوں تو وہ اسی پر اطمینان کر بیٹھیں گے۔ رسول اللہ ﷺ نے فرمایا: ”بے شک اللہ نے اپنے راستے میں جہاد کرنے والوں کے لیے سو درجے تیار کیے ہیں، ہر دو درجوں کے درمیان اتنا فاصلہ ہے جتنا آسمان اور زمین کے درمیان ہے۔ اگر میرے پاس اتنا ہوتا کہ میں خود بھی طاقت پکڑتا اور مسلمانوں کو بھی طاقت دیتا، یا ان کے ہاتھوں میں اتنا ہوتا کہ وہ خرچ کر سکتے، تو کوئی لشکر ایسا روانہ نہ ہوتا جس کا میں خود ساتھی نہ ہوتا، لیکن یہ نہ میرے ہاتھ میں ہے نہ ان کے ہاتھ میں۔ اور اگر میں نکل کھڑا ہوتا تو جس میں بھی کچھ بھلائی ہوتی وہ میرے ساتھ ضرور چل پڑتا، اور یہ بات مجھ پر گراں گزرتی ہے۔ پس میں چاہتا ہوں کہ میں جہاد کروں اور قتل کر دیا جاؤں، پھر زندہ کیا جاؤں، پھر جہاد کروں اور قتل کر دیا جاؤں، پھر زندہ کیا جاؤں، پھر قتل کر دیا جاؤں۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”جس نے دل کی گہرائی سے سچائی کے ساتھ اللہ سے اس کے راستے میں قتل ہونے کا سوال کیا، پھر وہ مر گیا یا قتل کر دیا گیا، تو اسے شہید کا اجر ملے گا۔ اور جو اللہ کے راستے میں زخمی ہوا یا کسی مصیبت کا شکار ہوا، تو وہ قیامت کے دن اس حال میں آئے گا کہ اس کا زخم اپنی تازگی میں سب سے بڑھ کر ہوگا، اس کا رنگ زعفران جیسا اور اس کی خوشبو مشک جیسی ہوگی۔ اور جو اللہ کے راستے میں زخم لے کر نکلا اس پر شہداء کی مہر ہوگی۔“

سیدنا ابومالک رضی اللہ عنہ سے روایت ہے، نبی کریم ﷺ نے فرمایا: ”جنت میں ایک ایسا بالاخانہ ہے جس کا ظاہر باطن سے اور باطن ظاہر سے نظر آتا ہے، اللہ نے اسے اس شخص کے لیے تیار کیا ہے جو کھانا کھلائے، نرم گفتگو کرے، نماز کی پابندی کرے، اور رات کو اس وقت کھڑا ہو جب لوگ سوئے ہوں۔“

سیدنا ابومالک اشعری رضی اللہ عنہ سے روایت ہے کہ رسول اللہ ﷺ نے فرمایا: ”جنت میں ایسے بالاخانے ہیں جن کا ظاہر باطن سے اور باطن ظاہر سے نظر آتا ہے، اللہ عزوجل نے انہیں اس شخص کے لیے تیار کیا ہے جو کھانا کھلائے، مسلسل روزے رکھے، اور رات کو نماز پڑھے جب لوگ سوئے ہوں۔“