المعجم الكبير للطبراني

سیدنا انس رضی اللہ عنہ سے روایت ہے کہ سیدنا حارثہ بن ربیع رضی اللہ عنہ احد کے دن (لڑائی) دیکھنے کے لیے آئے، وہ نوعمر لڑکے تھے، انہیں ایک نامعلوم سمت سے آنے والا تیر لگا جو ان کے حلق کے گڑھے میں لگا اور انہیں شہید کر دیا۔ تو ان کی والدہ سیدہ ربیع رضی اللہ عنہا آئیں اور عرض کیا: یا رسول اللہ! آپ جانتے ہیں کہ حارثہ میرے نزدیک کیا مقام رکھتا تھا، اگر وہ جنتی ہے تو میں صبر کروں گی، ورنہ آپ دیکھیں گے کہ میں کیا کرتی ہوں۔ آپ ﷺ نے فرمایا: ”اے ام حارثہ! جنت ایک ہی نہیں بلکہ کئی جنتیں ہیں، اور وہ فردوس اعلیٰ میں ہے۔“ انہوں نے عرض کیا: تو پھر میں صبر کروں گی۔

سیدنا انس رضی اللہ عنہ کہتے ہیں: رسول اللہ ﷺ نے فرمایا: ”اے ام حارثہ! وہ جنت بہت سی جنتوں میں سے ایک ہے، اور حارثہ فردوس اعلیٰ میں ہے، تو جب تم اللہ عزوجل سے سوال کرو تو فردوس مانگا کرو۔“

سیدنا انس رضی اللہ عنہ کہتے ہیں: سیدنا حارثہ رضی اللہ عنہ احد کے دن فوت ہو گئے، انہیں ایک تیر لگا تھا، تو ان کی والدہ نبی کریم ﷺ کے پاس آئیں اور عرض کیا: یا رسول اللہ! اگر وہ جنت میں ہے تو میں اس پر نہیں روؤں گی، اور اگر جہنم میں ہے تو اللہ دیکھے گا کہ میں کیا کرتی ہوں۔ رسول اللہ ﷺ نے فرمایا: ”وہ بہت سی جنتیں ہیں، اور وہ فردوس اعلیٰ میں ہے۔“