المعجم الكبير للطبراني

سیدنا جابر بن سمرہ رضی اللہ عنہ کہتے ہیں: میں نے رسول اللہ ﷺ کو کھڑے ہو کر خطبہ دیتے دیکھا، پھر آپ ﷺ خاموشی سے تھوڑی دیر بیٹھ جاتے، پھر کھڑے ہو کر اپنے منبر پر دوسرا خطبہ دیتے۔ جو تمہیں بتائے کہ اس نے آپ ﷺ کو بیٹھ کر خطبہ دیتے دیکھا ہے تو اس کی تصدیق مت کرنا۔

سیدنا جابر بن سمرہ رضی اللہ عنہ کہتے ہیں: رسول اللہ ﷺ نمازیں تقریباً اسی طرح پڑھتے تھے جیسے تم پڑھتے ہو، البتہ عشاء کی نماز تمہاری نماز سے کچھ تاخیر سے پڑھتے تھے، اور آپ ﷺ نماز ہلکی پڑھاتے تھے۔

سیدنا جابر بن سمرہ رضی اللہ عنہ کہتے ہیں: میں نے رسول اللہ ﷺ کو فرماتے سنا: ”مسلمانوں کی، یا فرمایا: مومنوں کی ایک جماعت ضرور آل کسریٰ کا وہ خزانہ فتح کرے گی جو سفید محل میں ہے۔“

سیدنا جابر رضی اللہ عنہ کہتے ہیں: میں نے آپ ﷺ کو، یعنی نبی کریم ﷺ کو، سنا کہ آپ ﷺ نے مدینہ کا نام طابا رکھا۔

سیدنا جابر بن سمرہ رضی اللہ عنہ کہتے ہیں: ایک آدمی کا خچر مر گیا تو وہ نبی کریم ﷺ کے پاس فتویٰ پوچھنے آیا۔ جابر رضی اللہ عنہ بیان کرتے ہیں کہ رسول اللہ ﷺ نے اس کے مالک سے فرمایا: ”کیا تمہارے پاس اس کے علاوہ کوئی اور گزر بسر کا ذریعہ نہیں؟“ اس نے کہا: نہیں۔ آپ ﷺ نے فرمایا: ”جاؤ اسے کھاؤ۔“

سیدنا جابر بن سمرہ رضی اللہ عنہ کہتے ہیں: میں نے نبی کریم ﷺ کو فرماتے سنا: ”قیامت سے پہلے بہت سے جھوٹے پیدا ہوں گے۔“

سیدنا جابر رضی اللہ عنہ کہتے ہیں: میں نے ماعز کو دیکھا جب اسے نبی کریم ﷺ کے پاس لایا گیا، وہ ایک پستہ قد، مضبوط جسم والا آدمی تھا، اس نے اپنے خلاف چار بار گواہی دی کہ اس نے زنا کیا ہے، تو رسول اللہ ﷺ نے فرمایا: ”شاید تم سے کچھ اور سرزد ہوا ہو (زنا نہ ہوا ہو)۔“ اس نے کہا: نہیں، اللہ کی قسم! اس نے (پوری طرح) زنا کیا ہے۔ چنانچہ آپ ﷺ نے اسے رجم کر دیا، پھر خطبہ دیا اور فرمایا: ”سن لو! جب بھی ہم اللہ کے راستے میں نکلتے ہیں تو ہم میں سے کوئی پیچھے رہ جاتا ہے اور بکرے کی سی آواز نکالتا ہے (یعنی فحش کاموں کی طرف مائل ہوتا ہے)، وہ کسی عورت کو تھوڑا سا دودھ دے دیتا ہے، خبردار! اللہ مجھے ان میں سے جس پر بھی قدرت دے گا، میں اسے عبرت ناک سزا دوں گا۔“

سیدنا جابر رضی اللہ عنہ سے روایت ہے کہ نبی کریم ﷺ نے ماعز کو رجم کیا اور کوڑے مارنے کا ذکر نہیں کیا۔