المعجم الكبير للطبراني

سیدنا بلال رضی اللہ عنہ سے روایت ہے کہ وہ فجر کی اذان میں ”حَیَّ عَلٰی خَیرِ الْعَمَل“ کہا کرتے تھے، تو رسول اللہ ﷺ نے حکم دیا کہ اس کی جگہ ”الصلاۃ خیر من النوم (نماز نیند سے بہتر ہے)“ کہا جائے، اور ”حَیَّ عَلٰی خَیرِ الْعَمَل“ کہنا چھوڑ دیا گیا۔

اسی سند سے مروی ہے کہ سیدنا بلال رضی اللہ عنہ سے روایت ہے کہ رسول اللہ ﷺ نے فرمایا: ”جب تم اذان دو تو اپنی انگلیاں اپنے کانوں میں ڈال لو، کیونکہ یہ تمہاری آواز کو زیادہ بلند کر دیتا ہے۔“

سیدنا بلال رضی اللہ عنہ سے روایت ہے کہ وہ نبی کریم ﷺ کے لیے اذان دیا کرتے تھے، اور یوں اذان دیتے: ”اللہ سب سے بڑا ہے، اللہ سب سے بڑا ہے، میں گواہی دیتا ہوں کہ اللہ کے سوا کوئی سچا معبود نہیں، میں گواہی دیتا ہوں کہ اللہ کے سوا کوئی سچا معبود نہیں“ پھر قبلے کی دائیں جانب رخ پھیر کر کہتے: ”میں گواہی دیتا ہوں کہ محمد ﷺ اللہ کے رسول ہیں، میں گواہی دیتا ہوں کہ محمد ﷺ اللہ کے رسول ہیں“ پھر رخ پھیر کر قبلے کے پیچھے کی طرف منہ کرتے اور کہتے: ”نماز کی طرف آؤ، نماز کی طرف آؤ“ پھر اپنی بائیں جانب رخ پھیرتے اور کہتے: ”کامیابی کی طرف آؤ، کامیابی کی طرف آؤ“ پھر قبلہ رخ ہو کر کہتے: ”اللہ سب سے بڑا ہے، اللہ سب سے بڑا ہے، اللہ کے سوا کوئی سچا معبود نہیں“ اور نبی کریم ﷺ کے لیے اقامت بھی کہا کرتے، اور اقامت کے الفاظ ایک ایک بار کہتے: ”اللہ سب سے بڑا ہے، اللہ سب سے بڑا ہے، میں گواہی دیتا ہوں کہ اللہ کے سوا کوئی سچا معبود نہیں، اور میں گواہی دیتا ہوں کہ محمد ﷺ اللہ کے رسول ہیں، نماز کی طرف آؤ، کامیابی کی طرف آؤ، نماز کھڑی ہو گئی، اللہ سب سے بڑا ہے، اللہ سب سے بڑا ہے، اللہ کے سوا کوئی سچا معبود نہیں۔“

سویدبن غفلہ بیان کرتے ہیں: بلال رضی اللہ عنہ کی آخری اذان یہ تھی: ”اللہ کے سوا کوئی سچا معبود نہیں، اور اللہ سب سے بڑا ہے۔“

سیدنا بلال رضی اللہ عنہ سے روایت ہے کہ وہ جمعہ کے دن رسول اللہ ﷺ کے لیے اس وقت اذان دیتے جب سایہ جوتے کے تسمے کے برابر ہو جاتا، جب نبی کریم ﷺ منبر پر بیٹھ جاتے۔

سیدنا بلال رضی اللہ عنہ کہتے ہیں: میں نے رسول اللہ ﷺ کو فرماتے سنا: ”مومن کا سب سے افضل عمل اللہ کی راہ میں جہاد ہے۔“