المعجم الكبير للطبراني

سیدنا اسود بن سریع رضی اللہ عنہ فرماتے ہیں: میں نے عرض کیا: یا رسول اللہ! میں نے اللہ کی حمد کی ہے، اور آپ کی بھی تعریف کی ہے۔ آپ ﷺ نے فرمایا: ”سناؤ، اور اللہ کی حمد سے شروع کرو۔“

سیدنا اسود بن سریع رضی اللہ عنہ فرماتے ہیں: میں نے عرض کیا: یا رسول اللہ! - پھر راوی نے اسی طرح کی حدیث بیان کی۔

سیدنا اسود بن سریع تمیمی رضی اللہ عنہ فرماتے ہیں: میں اللہ کے نبی ﷺ کے پاس حاضر ہوا اور عرض کیا: اے اللہ کے نبی! میں نے ایک شعر کہا ہے جس میں اللہ عزوجل کی ثنا کی ہے اور آپ کی تعریف کی ہے۔ آپ ﷺ نے فرمایا: ”جو اللہ کی ثنا میں کہا ہے وہ سناؤ، اور جو میری تعریف میں کہا ہے وہ چھوڑ دو۔“ میں سنانے لگا تو ایک لمبے قد اور خمیدہ ناک والے شخص داخل ہوئے، آپ ﷺ نے مجھ سے فرمایا: ”رک جاؤ۔“ جب وہ چلے گئے تو آپ ﷺ نے فرمایا: ”سناؤ۔“ میں پھر سنانے لگا، ابھی تھوڑی دیر ہی گزری تھی کہ وہ دوبارہ آ گئے، آپ ﷺ نے مجھ سے فرمایا: ”رک جاؤ۔“ جب وہ چلے گئے تو آپ ﷺ نے فرمایا: ”سناؤ۔“ میں نے عرض کیا: اے اللہ کے نبی! یہ کون ہیں کہ جب داخل ہوتے ہیں تو آپ فرماتے ہیں رک جاؤ، اور جب چلے جاتے ہیں تو فرماتے ہیں سناؤ؟ آپ ﷺ نے فرمایا: ”یہ عمر بن خطاب ہیں، اور یہ کسی باطل کام میں نہیں۔“