المعجم الكبير للطبراني

اعین جرامیزی کہتے ہیں: میں سیدنا انس بن مالک رضی اللہ عنہ کے پاس آیا جبکہ وہ اپنی ڈیوڑھی میں تھے، میں نے انہیں سلام کیا اور پوچھا: کیا میں اندر آ جاؤں؟ انہوں نے فرمایا: ”یہ ایسی جگہ ہے جہاں اجازت لینے کی ضرورت نہیں۔“

ابن سیرین سیدنا انس رضی اللہ عنہ سے روایت کرتے ہیں کہ وہ نیشاپور کے عامل تھے، ایک دہقان (زمیندار) ان کے پاس چاندی کے برتن میں کھیر (خبیص) لے کر آیا، تو انہوں نے اسے ناپسند کیا اور واپس کر دیا، تو اس نے اسے (دوسرے برتن میں) منتقل کیا، پھر وہ اسے لے آیا تو انہوں نے کھا لیا۔

حمید کہتے ہیں: ہم سیدنا انس بن مالک رضی اللہ عنہ کے ساتھ تھے، تو انہوں نے فرمایا: ”اللہ کی قسم! جو کچھ ہم تمہیں رسول اللہ ﷺ سے بیان کرتے ہیں وہ سب ہم نے آپ ﷺ سے نہیں سنا، لیکن ہم ایک دوسرے پر جھوٹ نہیں باندھتے تھے۔“

ثمامہ کہتے ہیں: سیدنا انس رضی اللہ عنہ نے ہم سے فرمایا: ”علم کو لکھ کر محفوظ کر لیا کرو۔“

محمد بن سیرین بیان کرتے ہیں کہ سیدنا انس بن مالک رضی اللہ عنہ کا ایک کسان تھا جو کنویں کی چرخی پر کام کرتا تھا، اس کی بیوی نے انس رضی اللہ عنہ کے پاس اس کی شکایت کی کہ وہ اسے رات دن فارغ نہیں چھوڑتا، تو سیدنا انس رضی اللہ عنہ نے ان کے درمیان ہر دن رات میں چھ (گھنٹوں کی تقسیم) پر صلح کروا دی۔

ریطہ، جو سیدنا انس بن مالک رضی اللہ عنہ کی ام ولد (لونڈی بیوی) تھیں، بیان کرتی ہیں کہ سیدنا انس بن مالک رضی اللہ عنہ دوپہر کے وقت اور عشاء کے وقت غسل کرنا ناپسند کرتے تھے۔

سیدنا انس بن مالک رضی اللہ عنہ کہتے ہیں: میں سیدنا ابوطلحہ رضی اللہ عنہ کے گھر میں داخل ہوا، وہ سیدہ ام سلیم رضی اللہ عنہا پر - جو انس کی والدہ تھیں - دروازہ بند کیے انہیں مار رہے تھے، تو میں نے دروازے کے پیچھے سے پکار کر کہا: تم اس بڑھیا کو کیوں مار رہے ہو؟ تو میری والدہ نے دروازے کے پیچھے سے مجھے پکار کر کہا: تم مجھے ”بڑھیا“ کہتے ہو؟ اللہ تمہارے بازو کو کمزور کرے۔

علی بن زید رحمہ اللہ کہتے ہیں: میں حجاج کے ساتھ محل میں تھا اور وہ ابن اشعث کے معاملے کی وجہ سے لوگوں کا معائنہ کر رہا تھا۔ اتنے میں سیدنا انس بن مالک رضی اللہ عنہ آئے حتیٰ کہ قریب پہنچے، تو حجاج نے ان سے کہا: ارے او خبیث! کبھی سیدنا علی بن ابی طالب رضی اللہ عنہ کے ساتھ فتنے میں گھومنے والے، کبھی ابن زبیر کے ساتھ، اور کبھی ابن اشعث کے ساتھ! اس ذات کی قسم جس کے ہاتھ میں میری جان ہے، میں تمہیں اسی طرح جڑ سے اکھاڑ پھینکوں گا جیسے گوند کا درخت سے اکھاڑا جاتا ہے، اور تمہاری کھال اسی طرح ادھیڑ دوں گا جیسے سانڈے کی کھال ادھیڑی جاتی ہے۔ سیدنا انس رضی اللہ عنہ نے کہا: امیر (اللہ اس کی اصلاح کرے) کس کی بات کر رہے ہیں؟ حجاج نے کہا: میں تمہیں ہی کہہ رہا ہوں، اللہ تمہاری سماعت بہری کر دے۔ تو سیدنا انس رضی اللہ عنہ نے استرجاع کیا اور فرمایا: ”انا للہ وانا الیہ راجعون۔“ پھر ان کے پاس سے نکلے، تو فرمایا: ”اگر مجھے اپنی اولاد یاد نہ آتی اور مجھے ان کے بارے میں خدشہ نہ ہوتا، تو میں اس مجلس میں اس سے ایسی بات کہتا کہ وہ کبھی میرا جواب نہ دے سکتا۔“