المعجم الكبير للطبراني

قبیصہ بن جابر الاسدی رحمہ اللہ کہتے ہیں: میں احرام کی حالت میں تھا کہ میں نے ایک ہرن دیکھا تو اس پر تیر چلایا، تو میرا تیر اس کے سینگ کی جڑ میں لگا، تو وہ (مر کر) منہ کے بل گر پڑا۔ اس سے میرے دل میں کچھ (خلجان) پیدا ہوا، تو میں عمر بن خطاب رضی اللہ عنہ کے پاس ان سے پوچھنے کے لیے آیا، میں نے عمر رضی اللہ عنہ کے پہلو میں ایک سفید، نرم چہرے والا آدمی پایا، دیکھا تو وہ عبدالرحمٰن بن عوف رضی اللہ عنہ تھے۔ میں نے عمر رضی اللہ عنہ سے اپنا مسئلہ پوچھا، تو انہوں نے عبدالرحمٰن کی طرف متوجہ ہو کر پوچھا: ”کیا تمہاری رائے میں ایک بکری اسے کافی ہو گی؟“ انہوں نے کہا: ہاں۔ تو عمر نے مجھے ایک بکری ذبح کرنے کا حکم دیا۔ ہم ان کے پاس سے اٹھے تو میرے ایک ساتھی نے کہا: امیر المومنین (خود) تمہیں اچھی طرح فتویٰ نہ دے سکے یہاں تک کہ انہوں نے اس آدمی (عبدالرحمٰن) سے پوچھا۔ عمر رضی اللہ عنہ نے اس کی کچھ بات سن لی، تو انہوں نے اسے کوڑے سے مارنا شروع کر دیا، پھر میری طرف متوجہ ہوئے تاکہ مجھے بھی ماریں، تو میں نے کہا: اے امیر المومنین! میں نے کچھ نہیں کہا، یہ بات اسی نے کہی ہے۔ تو انہوں نے مجھے چھوڑ دیا۔ راوی کہتے ہیں: پھر انہوں نے فرمایا: ”تم نے چاہا کہ حالت احرام میں شکار بھی مارو اور فتویٰ سے بھی تجاوز کرو!“ پھر فرمایا: ”انسان میں دس خصلتیں ہوتی ہیں: نو اچھی اور ایک بری، اور وہ ایک بری خصلت باقی سب کو خراب کر دیتی ہے۔“ پھر فرمایا: ”اور نوجوانوں کی صحبت سے بچو۔“

قبیصہ بن جابر کہتے ہیں: ہم عمر رضی اللہ عنہ کے پاس آئے، پھر انہوں نے اسی طرح کا واقعہ بیان کیا، پھر عمر ایک آدمی کی طرف جھکے - اللہ کی قسم گویا اس کا چہرہ (چاندی کا) کنگن تھا۔

عثمان بن عطاء اپنے والد سے روایت کرتے ہیں، وہ کہتے ہیں: عبدالرحمٰن بن عوف رضی اللہ عنہ موٹے سوتی کپڑے کی قمیص پہنتے تھے جو ان کی پنڈلی کے آدھے حصے تک ہوتی، اور ان کی چادر ان کی سرین تک آتی تھی۔

ابن اسحاق سے روایت ہے کہ عبدالرحمٰن بن عوف رضی اللہ عنہ کے سامنے کے دو دانت گرے ہوئے تھے، منہ کے آگے کے دانت ٹوٹے ہوئے تھے، بائیں ہاتھ سے کام لیتے تھے، اور لنگڑے تھے۔ وہ احد کے دن زخمی ہوئے تھے جس سے ان کے دانت ٹوٹے، اور انہیں بیس یا اس سے زیادہ زخم لگے تھے، ان میں سے کچھ ان کے پاؤں میں لگے جس سے وہ لنگڑے ہو گئے۔