المعجم الأوسط

سیدنا عمرو بن مرہ جہنی رضی اللہ عنہ بیان کرتے ہیں کہ میں نے رسول اللہ ﷺ کو فرماتے ہوئے سنا: ”جس نے جان بوجھ کر مجھ پر جھوٹ باندھا، وہ اپنا ٹھکانا جہنم میں بنا لے۔“
امام طبرانی رحمہ اللہ فرماتے ہیں: ”یہ حدیث عمرو بن مرہ سے صرف اسی سند کے ساتھ مروی ہے، اس میں ہیثم بن عدی منفرد ہیں۔“

سیدنا انس بن مالک رضی اللہ عنہ بیان کرتے ہیں کہ رسول اللہ ﷺ کی باندی سیدہ ام ابراہیم رضی اللہ عنہا اپنے بالا خانے میں رہتی تھیں، اور ایک قبطی شخص ان کے پاس آ کر ٹھہرتا اور ان کے لیے پانی اور لکڑیاں لایا کرتا تھا۔ لوگوں نے اس بارے میں باتیں بنائیں کہ ایک عجمی مرد ایک عجمی عورت کے پاس آتا جاتا ہے۔ یہ بات نبی ﷺ تک پہنچی تو آپ ﷺ نے سیدنا علی بن ابی طالب رضی اللہ عنہ کو بھیجا اور اسے قتل کرنے کا حکم دیا۔ وہ گئے تو اسے کھجور کے ایک درخت پر پایا۔ جب قبطی نے سیدنا علی رضی اللہ عنہ کے ساتھ تلوار دیکھی تو گھبرا کر نیچے گر پڑا اور اپنی اوڑھی ہوئی چادر پھینک کر سامنے آ گیا، تو دیکھا کہ وہ تو آلۂ تناسل سے محروم ہے۔ سیدنا علی رضی اللہ عنہ نبی ﷺ کے پاس لوٹ آئے اور عرض کیا: ”اے اللہ کے رسول! آپ کا کیا خیال ہے کہ اگر آپ ہم میں سے کسی کو کوئی حکم دیں، پھر وہ (حقیقتِ حال) اس کے برعکس دیکھے تو کیا وہ آپ سے رجوع کر سکتا ہے؟“ آپ ﷺ نے فرمایا: ”ہاں۔“ پھر انہوں نے قبطی کے بارے میں جو کچھ دیکھا تھا، آپ ﷺ کو بتا دیا۔ سیدنا انس رضی اللہ عنہ کہتے ہیں: پھر سیدہ ام ابراہیم رضی اللہ عنہا نے ابراہیم رضی اللہ عنہ کو جنم دیا، اور نبی ﷺ کو ان کے بارے میں کچھ شبہ رہا، یہاں تک کہ جبریل علیہ السلام آپ ﷺ کے پاس آئے اور کہا: «السَّلَامُ عَلَيْكَ يَا أَبَا إِبْرَاهِيمَ» ”اے ابراہیم کے والد! آپ پر سلام ہو۔“ تب آپ ﷺ کو اس بارے میں اطمینان ہو گیا۔
امام طبرانی رحمہ اللہ فرماتے ہیں: ”اس حدیث کو زہری سے یزید بن ابی حبیب اور عقیل بن خالد کے سوا کسی نے روایت نہیں کیا، اور ان دونوں سے روایت کرنے میں ابن لہیعہ منفرد ہیں۔“

سیدنا عبداللہ بن عباس رضی اللہ عنہما سے روایت ہے کہ نبی ﷺ نے فرمایا: ”جنت کو ایک سال سے دوسرے سال تک ماہِ رمضان کے لیے آراستہ کیا جاتا ہے، اور حورینِ عین بھی ایک سال سے دوسرے سال تک ماہِ رمضان کے لیے بنتی سنورتی ہیں۔ پھر جب رمضان کا مہینہ شروع ہوتا ہے تو جنت کہتی ہے:“ «اللَّهُمَّ اجْعَلْ لَنَا فِي هَذَا الشَّهْرِ مِنْ عِبَادِكَ سُكَّانًا» ”اے اللہ! اس مہینے میں اپنے بندوں میں سے ہمارے لیے کچھ مکین مقرر فرما دے“، ”اور حورینِ عین کہتی ہیں:“ «اللَّهُمَّ اجْعَلْ لَنَا فِي هَذَا الشَّهْرِ مِنْ عِبَادِكَ أَزْوَاجًا» ”اے اللہ! اس مہینے میں اپنے بندوں میں سے ہمارے لیے کچھ شوہر مقرر فرما دے۔“
نبی ﷺ نے فرمایا: ”پس جو شخص رمضان کے مہینے میں اپنے آپ کو بچائے رکھے، اس میں کوئی نشہ آور چیز نہ پیے، کسی مومن پر بہتان نہ لگائے اور کوئی گناہ نہ کرے، تو اللہ تعالیٰ ہر رات اس کا نکاح سو حوروں سے کرائے گا، اور اس کے لیے جنت میں سونے، چاندی، یاقوت اور زبرجد کا ایک محل بنائے گا۔ اگر ساری دنیا کو جمع کر کے اس محل میں رکھ دیا جائے تو وہ اس میں یوں ہو گی جیسے دنیا میں بکری کے باندھنے کی جگہ۔ اور جو شخص اس مہینے میں کوئی نشہ آور چیز پیے، کسی مومن پر بہتان لگائے اور کوئی گناہ کرے، تو اللہ تعالیٰ ایک سال تک اس کے عمل ضائع کر دے گا۔ پس رمضان کے مہینے (کی حرمت پامال کرنے) سے ڈرو، کیونکہ یہ اللہ کا مہینہ ہے۔ اگر تم نے اس میں کوتاہی کی تو (یاد رکھو کہ) اس نے تمہارے لیے گیارہ مہینے رکھے ہیں جن میں تم عیش و آرام اور لطف اندوزی کرتے ہو، اور اپنے لیے رمضان کا مہینہ رکھا ہے، پس رمضان سے خبردار رہو۔“
امام طبرانی رحمہ اللہ فرماتے ہیں: ”اس حدیث کو اوزاعی سے احمد بن ابیض مدینی کے سوا کسی نے روایت نہیں کیا، اس میں زہیر بن عباد منفرد ہیں۔“

ام المومنین سیدہ عائشہ رضی اللہ عنہا سے روایت ہے کہ یزید مولیٰ سلمہ کی اہلیہ ام سلیمان نے ان سے قربانی کے گوشت کے بارے میں پوچھا تو انہوں نے فرمایا: ”سیدنا علی بن ابی طالب رضی اللہ عنہ ایک غزوے سے واپس آئے اور رسول اللہ ﷺ کی صاحبزادی سیدہ فاطمہ رضی اللہ عنہا کے ہاں گئے، تو ان کے سامنے قربانی کا گوشت پیش کیا گیا۔ انہوں نے اسے کھانے سے انکار کر دیا یہاں تک کہ رسول اللہ ﷺ سے دریافت کر لیں۔ چنانچہ انہوں نے رسول اللہ ﷺ سے پوچھا تو رسول اللہ ﷺ نے ان سے فرمایا: ”اسے ایک ذوالحجہ سے دوسرے ذوالحجہ تک کھاؤ۔““
امام طبرانی رحمہ اللہ فرماتے ہیں: ”یزید مولیٰ سلمہ بن اکوع کی اہلیہ ام سلیمان نے سیدہ عائشہ رضی اللہ عنہا سے اس حدیث کے سوا کوئی اور حدیث روایت نہیں کی، اس میں عمرو بن حارث منفرد ہیں۔“
دار الحرمین کے مطبوعہ نسخے میں اسی طرح ہے، اور غالباً درست ”ام سلیم“ ہے۔