المعجم الأوسط

سیدنا عبداللہ بن عباس رضی اللہ عنہما سے روایت ہے کہ انہوں نے فرمایا: ”«النَّاقُورُ» سے مراد صور ہے، اور وہ ایک سینگ ہے۔“ اور رسول اللہ ﷺ نے فرمایا: ”میں کیسے آرام و چین سے رہ سکتا ہوں جبکہ (صور پھونکنے والا فرشتہ) صور کو منہ میں لے چکا ہے۔“
امام طبرانی رحمہ اللہ فرماتے ہیں: ”اس حدیث کو ادریس اودی سے، انہوں نے عطیہ سے، انہوں نے سیدنا ابن عباس رضی اللہ عنہما سے صرف ابن ابی زائدہ نے روایت کیا ہے۔“
اور اسے ابو مسلم قائد الاعمش نے اعمش سے، انہوں نے ابو ادریس سے، انہوں نے عطیہ سے، اور انہوں نے سیدنا ابو سعید خدری رضی اللہ عنہ سے روایت کیا ہے۔

سیدنا براء بن عازب رضی اللہ عنہ سے روایت ہے کہ رسول اللہ ﷺ نے فرمایا: ”کافر سے (قبر میں) پوچھا جاتا ہے: ’تیرا رب کون ہے؟‘ تو وہ کہتا ہے: ’میں نہیں جانتا۔‘ اس وقت وہ بہرا، اندھا اور گونگا ہو چکا ہوتا ہے، پھر اسے ایک ایسے بڑے ہتھوڑے سے مارا جاتا ہے کہ اگر اس سے پہاڑ کو مارا جائے تو وہ مٹی ہو جائے، اور انسانوں اور جنوں کے سوا ہر چیز اس (ضرب کی آواز) کو سنتی ہے۔“ سیدنا براء رضی اللہ عنہ کہتے ہیں: ”میں نے رسول اللہ ﷺ کو یہ آیت پڑھتے سنا: ﴿يُثَبِّتُ اللَّهُ الَّذِينَ آمَنُوا بِالْقَوْلِ الثَّابِتِ فِي الْحَيَاةِ الدُّنْيَا وَفِي الْآخِرَةِ وَيُضِلُّ اللَّهُ الظَّالِمِينَ﴾“
امام طبرانی رحمہ اللہ فرماتے ہیں: ”اس حدیث کو اعمش سے صرف یحییٰ بن زکریا بن ابی زائدہ نے روایت کیا ہے۔“

امام ربعی بن حراش رحمہ اللہ بیان کرتے ہیں کہ سیدنا حذیفہ رضی اللہ عنہ اور سیدنا عقبہ بن عمرو ابو مسعود رضی اللہ عنہ بیٹھے ہوئے تھے کہ ان میں سے ایک نے کہا: ”میں نے رسول اللہ ﷺ کو فرماتے سنا: ’بنی اسرائیل میں ایک شخص قبریں کھودا کرتا تھا (یعنی کفن چور تھا)، اس نے اپنے گھر والوں سے کہا: جب میں مر جاؤں تو مجھے جلا دینا، پھر میری ہڈیاں لے کر انہیں پیس ڈالنا، پھر کسی تیز ہوا والے دن کا انتظار کرنا اور اس دن مجھے (اس راکھ کو) ہوا میں اڑا دینا۔ چنانچہ اس کے ساتھ ایسا ہی کیا گیا۔ تو اس کے رب نے اس سے پوچھا: تو نے ایسا کیوں کیا؟ اس نے عرض کیا: اے میرے رب! تیرے خوف کی وجہ سے۔ تو اللہ تعالیٰ نے اسے بخش دیا۔‘“
تو سیدنا عقبہ رضی اللہ عنہ نے کہا: ”میں نے بھی نبی کریم ﷺ سے یہی بات سنی ہے۔“
امام طبرانی رحمہ اللہ فرماتے ہیں: ”اس حدیث کو زکریا بن ابی زائدہ سے صرف ان کے بیٹے یحییٰ نے روایت کیا ہے۔“