المطالب العالية بزوائد المسانيد الثمانية

سیدنا ابو ذر رضی اللہ عنہ سے روایت ہے کہ میں نے رسول اللہ ﷺ کو یہ فرماتے ہوئے سنا: ”اگر میری امت (مالِ غنیمت میں) خیانت نہ کرے تو دشمن کبھی ان کے قریب نہیں آ سکے گا“، پھر سیدنا ابو ذر رضی اللہ عنہ نے حبیب بن مسلمہ سے پوچھا: ”کیا دشمن تمہارے مقابلے میں ایک بکری دوہنے کے وقفے کے برابر بھی جم سکا ہے؟“ انہوں نے جواب دیا: ”جی ہاں، بلکہ ایسی تین بکریوں کے دوہنے کی مدت تک جن کے تھن تنگ ہوں“، تو سیدنا ابو ذر رضی اللہ عنہ نے (حسرت سے) فرمایا: ”ربِ کعبہ کی قسم! تم لوگوں نے خیانت کا ارتکاب کر لیا ہے“، امام اسحاق بن راہویہ فرماتے ہیں کہ «الْعُزُزُ» سے مراد تھن کی نالی کا تنگ ہونا ہے (جس کی وجہ سے دودھ نکالنے میں مشقت اور زیادہ وقت صرف ہوتا ہے)۔

سیدنا ثوبان رضی اللہ عنہ سے روایت ہے کہ رسول اللہ ﷺ نے ارشاد فرمایا: ”مسلمانوں کے اموالِ غنیمت میں سے کسی بھی شخص کے لیے تھوڑی یا زیادہ کوئی بھی چیز حلال نہیں ہے، یہاں تک کہ نہ دھاگہ اور نہ ہی سوئی، نہ لینے والے کے لیے اور نہ ہی دینے والے کے لیے، سوائے اس کے جو حق کے ساتھ (یعنی شرعی تقسیم کے مطابق) ہو۔“ اسی حدیث کی دوسری سند میں مروی ہے کہ ایک شخص نے دریافت کیا: یا رسول اللہ ﷺ! میرے لیے ان غنائم میں سے کیا کچھ حلال ہے؟ تو آپ ﷺ نے ارشاد فرمایا: ”لینے والے اور دینے والے کے لیے نہ تو دھاگہ حلال ہے اور نہ ہی سوئی۔“

سیدنا عبداللہ بن عباس رضی اللہ عنہما، سیدنا عمر بن خطاب رضی اللہ عنہ سے روایت کرتے ہیں کہ رسول اللہ ﷺ نے ارشاد فرمایا: ”میں تمہاری کمروں سے پکڑ پکڑ کر تمہیں آگ سے بچا رہا ہوں، (اور پکارتا ہوں کہ) آگ سے دور ہٹ جاؤ، مگر تم مجھ پر غالب آ جاتے ہو اور اس میں اس طرح گرے جا رہے ہو جیسے پروانے اور ٹڈیاں گرتی ہیں۔ پس قریب ہے کہ میں تمہاری کمریں چھوڑ دوں اور میں حوضِ کوثر پر تمہارا منتظر ہوں گا، تم میرے پاس اکٹھے بھی آؤ گے اور مختلف ٹولیوں کی صورت میں بھی، میں تمہیں تمہاری علامات اور تمہارے ناموں سے ایسے پہچان لوں گا جیسے کوئی آدمی اپنے اونٹوں کے ریوڑ میں کسی اجنبی اونٹ کو پہچان لیتا ہے۔ پھر تمہیں بائیں جانب (جہنم کی طرف) لے جایا جائے گا تو میں رب العالمین کے حضور تمہارے بارے میں عرض گزاری کروں گا: «أَيْ رَبِّ ، قَوْمِي ، أَيْ رَبِّ ، أُمَّتِي» ”اے میرے رب! میری قوم، اے میرے رب! میری امت۔“ تب اللہ تعالیٰ فرمائے گا: اے محمد (ﷺ)! آپ نہیں جانتے کہ انہوں نے آپ کے بعد دین میں کیا کیا نئی چیزیں نکالی تھیں؛ یہ لوگ تو آپ کے بعد الٹے پاؤں پیچھے ہٹ گئے تھے۔ پس میں روزِ قیامت تم میں سے کسی کو اس حال میں ہرگز نہ پاؤں کہ وہ اپنی گردن پر منمناتی ہوئی بکری اٹھائے ہوئے ہو اور وہ پکارے: اے محمد! اے محمد! (ﷺ) تو میں کہوں گا کہ میں تمہارے لیے اللہ کے ہاں کسی چیز کا اختیار نہیں رکھتا، میں نے تمہیں اللہ کا حکم پہنچا دیا تھا۔ اور میں تم میں سے کسی کو ہرگز اس حال میں نہ پاؤں کہ وہ ہنہناتا ہوا گھوڑا اٹھائے ہوئے ہو اور وہ پکارے: اے محمد! اے محمد! (ﷺ) تو میں کہوں گا کہ میں تمہارے لیے کسی نفع و نقصان کا مالک نہیں ہوں، میں نے تمہیں حق پہنچا دیا تھا۔ اور میں تم میں سے کسی کو ہرگز اس حال میں نہ پاؤں کہ وہ چمڑے کا مشکیزہ اٹھائے ہوئے ہو اور پکارے: اے محمد! اے محمد! (ﷺ) تو میں کہوں گا کہ میں تمہارے لیے کچھ نہیں کر سکتا، یقیناً میں نے تمہیں (حق کی) تبلیغ کر دی تھی۔“