المطالب العالية بزوائد المسانيد الثمانية

سیدنا عبداللہ بن عکیم رضی اللہ عنہ سے روایت ہے کہ امیر المؤمنین سیدنا عثمان بن عفان رضی اللہ عنہ جب اذان کی آواز سنتے تو یوں فرماتے: «مَرْحَبًا بِالْقَائِلِينَ عَدْلًا، وَبِالصَّلَاةِ مَرْحَبًا وَأَهْلًا» ”عدل و حق کی پکار بلند کرنے والوں (مؤذنین) کو خوش آمدید، اور نماز کے لیے بھی کشادہ دلی کے ساتھ خیر مقدم اور مرحبا ہے۔“
[أخرجه أحمد بن منيع في مسنده، رقم: 240، وابن أبي شيبة في مصنفه: 3345]۔

سیدنا علی رضی اللہ عنہ سے روایت ہے کہ وہ جب اذان کی آواز سماعت فرماتے تو یہ کلمات ادا کرتے: «أَشْهِدْ بِهَا كُلَّ شَاهِدٍ، وَأَتَحَمَّلُهَا عَنْ كُلِّ جَاحِدٍ» ”میں ہر گواہی دینے والے کو اس (دعوتِ حق) پر گواہ بناتا ہوں، اور ہر منکر و انکار کرنے والے کی جانب سے اسے (بطورِ حجت و ذمہ داری) اپنے اوپر لازم ٹھہراتا ہوں۔“
اس روایت کی سند میں عبد الرحمن بن اسحاق الواسطی ضعیف راوی ہے، اس اثر کو امام ابن ابی شیبہ نے 'المصنف' (2291) اور امام بیہقی نے 'الدعوات الکبیر' (41) میں روایت کیا ہے۔

سیدنا ابوامامہ رضی اللہ عنہ سے روایت ہے کہ نبی کریم ﷺ نے ارشاد فرمایا: ”جب پکارنے والا (مؤذن) نماز کے لیے پکارتا ہے تو آسمان کے دروازے کھول دیے جاتے ہیں اور دعا قبول کی جاتی ہے، لہٰذا جس شخص کو کوئی دکھ، غم یا سخت تکلیف درپیش ہو اسے چاہیے کہ وہ مؤذن کی پکار کا انتظار کرے؛ پھر جب مؤذن تکبیر کہے تو وہ بھی تکبیر کہے، جب وہ کلمہ شہادت ادا کرے تو یہ بھی کلمہ شہادت ادا کرے، اور جب وہ مؤذن ”حَیَّ عَلَی الصَّلَاةِ“ کہے تو یہ بھی ”حَیَّ عَلَی الصَّلَاةِ“ کہے، اور جب وہ ”حَیَّ عَلَی الْفَلَاحِ“ کہے تو یہ بھی ”حَیَّ عَلَی الْفَلَاحِ“ کہے، پھر یہ دعا پڑھے: «اللَّهُمَّ رَبَّ هَذِهِ الدَّعْوَةِ التَّامَّةِ، دَعْوَةِ الْحَقِّ الْمُسْتَجَابَةِ، الْمُسْتَجَابِ لَهَا، دَعْوَةِ الْحَقِّ وَكَلِمَةِ التَّقْوَى، أَحْيِنَا عَلَيْهَا، وَأَمِتْنَا عَلَيْهَا، وَابْعَثْنَا عَلَيْهَا، وَاجْعَلْنَا مِنْ خِيَارِ أَهْلِهَا مَحْيَانَا وَمَمَاتَنَا» ”اے اللہ! اس کامل پکار کے رب، اس برحق پکار کے رب جو شرفِ قبولیت پانے والی ہے اور جس کی پکار سنی جاتی ہے، جو سچائی کی دعوت اور تقویٰ کا کلمہ ہے، ہمیں اسی (ایمان و توحید) پر زندہ رکھ، اسی پر ہمیں موت عطا فرما، اسی پر ہمیں دوبارہ اٹھا، اور ہمیں زندگی اور موت دونوں حالتوں میں اس کے بہترین لوگوں میں شامل فرما۔“ اس کے بعد وہ اللہ تعالیٰ سے اپنی حاجت کا سوال کرے۔“
اس حدیث کو امام طبرانی نے کتاب ”الدعاء“ میں عبداللہ بن احمد کے واسطے سے حکم بن موسیٰ سے تفصیلاً روایت کیا ہے۔
نیز اسے امام حاکم نے ”المستدرک“ میں ہیشم بن خارجہ کے واسطے سے ولید سے مفصل روایت کیا ہے۔
اور احمد بن منیع نے اسے ہیشم سے روایت کیا ہے لیکن ان کی روایت صرف ”اور دعا قبول کی جاتی ہے“ کے الفاظ تک ہے اور انہوں نے بعد والا حصہ ذکر نہیں کیا۔

بنو ہاشم کے ایک فرد نبی کریم ﷺ سے پچھلی حدیث کی مانند روایت کرتے ہیں کہ ”نبی کریم ﷺ جب مؤذن کو «اللهُ أَكْبَرُ اللهُ أَكْبَرُ» ”اللہ سب سے بڑا ہے، اللہ سب سے بڑا ہے“ کہتے ہوئے سنتے تو آپ ﷺ بھی اسی کی مثل کلمات دہراتے، اور جب مؤذن «أَشْهَدُ أَنْ لَا إِلَهَ إِلَّا اللهُ» ”میں گواہی دیتا ہوں کہ اللہ کے سوا کوئی معبودِ برحق نہیں“ کہتا، تو آپ ﷺ بھی اسی کی مانند فرماتے، اور جب وہ «أَشْهَدُ أَنَّ مُحَمَّدًا رَسُولُ اللهِ» ”میں گواہی دیتا ہوں کہ محمد (ﷺ) اللہ کے رسول ہیں“ کہتا، تو آپ ﷺ بھی وہی فرماتے جو وہ کہتا، لیکن جب مؤذن «حَيَّ عَلَى الصَّلَاةِ ، حَيَّ عَلَى الْفَلَاحِ» ”نماز کی طرف آؤ، کامیابی کی طرف آؤ“ پکارتا، تو آپ ﷺ جواباً ارشاد فرماتے: «لَا حَوْلَ وَلَا قُوَّةَ إِلَّا بِاللهِ» ”اللہ کی توفیق کے بغیر نہ گناہوں سے بچنے کی کوئی طاقت ہے اور نہ نیکی کرنے کی کوئی قوت“۔“
اس کی سند میں کمزوری اور انقطاع پایا جاتا ہے۔

سیدنا انس رضی اللہ عنہ سے روایت ہے کہ رسول اللہ ﷺ نے ایک رات (سفر کے دوران آخری پہر میں) پڑاؤ فرمایا، پھر سیدنا بلال رضی اللہ عنہ نے اذان دی، تو آپ ﷺ نے ارشاد فرمایا: ”جس نے اس (مؤذن) کے کلمات جیسے کلمات کہے اور ویسی ہی گواہی دی جیسی اس نے دی، تو اس کے لیے جنت ہے“
اس کی سند ضعیف ہے۔