المطالب العالية بزوائد المسانيد الثمانية

عبدالرحمن بن حرملہ اپنی والدہ سے روایت کرتے ہیں کہ انہوں نے بیان کیا: ”میں نبی کریم ﷺ کی زوجہ مطہرہ سیدہ ام سلمہ رضی اللہ عنہا کی خدمت میں حاضر تھی کہ انہیں ایک بڑا پیالہ ہدیہ کیا گیا جس میں روٹی اور گوشت تھا، پھر وہ نماز کے لیے کھڑی ہو گئیں اور ہم بھی ان کے ہمراہ نماز پڑھنے لگے، اسی دوران ایک بلی چپکے سے کھانے کی طرف لپکی اور اس میں سے کچھ کھا لیا، پس جب ہم نے نماز کا سلام پھیرا تو سیدہ ام سلمہ رضی اللہ عنہا نے وہ برتن پکڑا اور اسے (یعنی کھانے کو) اچھی طرح اوپر نیچے کر کے برابر کر دیا یہاں تک کہ جس جگہ سے بلی نے کھایا تھا وہ مقام ادھر ادھر ہو گیا، پھر انہوں نے اس میں سے تناول فرمایا۔“

رکین بن ربیع اپنی پھوپھی سے روایت کرتے ہیں کہ سیدنا حسن بن علی رضی اللہ عنہما نے ارشاد فرمایا: ”بلی کے جھوٹے (بچے ہوئے پانی یا کھانے) کے استعمال میں کوئی حرج و مضائقہ نہیں ہے۔“

ابوسعید جابری سے روایت ہے کہ سیدنا علی رضی اللہ عنہ سے دریافت کیا گیا کہ کیا بلی برتن سے پانی پی سکتی ہے؟ تو انہوں نے ارشاد فرمایا: ”بلی کے «سُؤْر» (جھوٹے برتن یا اس کے پئے ہوئے پانی) میں کوئی مضائقہ نہیں ہے۔“ اور یہی روایت مرفوعاً سننِ اربعہ اور صحیح ابن خزیمہ میں سیدنا ابوقتادہ رضی اللہ عنہ سے مروی ہے کہ رسول اللہ ﷺ نے بلی کے متعلق ارشاد فرمایا: ”یقیناً یہ ناپاک نہیں ہے، بلکہ یہ تو تمہارے پاس بکثرت آنے جانے والے «الطَّوَّافِينَ» اور «الطَّوَّافَاتِ» (گھومنے پھرنے والے نر و مادہ گھریلو جانوروں) میں سے ہے۔“ یہ روایت صحیح ہے۔