مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم سے جنت کے بارے میں دریافت کیا گیا : تو آپ صلی اللہ علیہ وسلم نے ارشاد فرمایا : ” جو شخص جنت میں داخل ہو گا وہ اُس میں زندہ رہے گا اسے موت نہیں آئے گی ، وہ نعمتوں میں رہے گا ، وہ مایوس نہیں ہو گا ، اس کے کپڑے بوسیدہ نہیں ہوں گے ، اس کی جوانی ختم نہیں ہو گی ۔ “ عرض کی گئی : یا رسول اللہ ! اس کی تعمیر کس چیز سے ہوئی ہے ؟ نبی اکرم صلی اللہ علیہ وسلم نے فرمایا : ایک اینٹ سونے کی ہے ، ایک اینٹ چاندی کی ہے اور اس کا گارا مشک کا ہے اور اس کی مٹی زعفران کی ہے اور اس کی کنکریاں موتیوں اور یاقوت کی ہیں ۔ “
یہ روایت امام طبرانی نے ایسی سند کے ساتھ نقل کی ہے جس کے رجال کو امام ترمذی نے حسن قرار دیا ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اللہ تعالیٰ نے جنت کو یوں بنایا ہے کہ ایک اینٹ سونے کی ہے ، ایک اینٹ چاندی کی ہے اور اس کا گارا مشک کا ہے ۔ “

ایک روایت میں یہ الفاظ ہیں : ” جنت کی دیواروں میں ایک اینٹ سونے کی ہے ، ایک اینٹ چاندی کی ہے اور اس کا گارا مشک کا ہے ، پروردگار نے اس سے فرمایا : تم کلام کرو ! تو اس نے یہ کہا: ” تحقیق مومنین کامیاب ہو گئے “ فرشتوں نے کہا: تمہارے لئے مبارکباد ہے کہ تم بادشاہوں کے رہنے کی جگہ ہو ! “ ۔
یہ روایت امام بزار نے ” مرفوع “ اور ” موقوف “ ( یعنی دونوں طرح سے ) نقل کی ہے ، امام طبرانی نے اسے معجم اوسط میں نقل کیا ہے ، تاہم انہوں نے یہ الفاظ نقل کئے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے جنت عدن کو اپنے دست مبارک سے پیدا کیا ہے کہ اس کی ایک اینٹ سونے کی ہے اور ایک اینٹ چاندی کی ہے ۔ ۔ ۔ ۔ ۔ “ باقی روایت حسب سابق ہے ۔ ” موقوف “ روایت کے رجال صحیح کے رجال ہیں اور سیدنا ابوسعید خدری رضی اللہ عنہ یہ بات صرف اسی وقت بیان کر سکتے ہیں ، جب انہوں نے اسے نبی اکرم صلی اللہ علیہ وسلم کی زبانی سنا ہو ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ نے جنت کو سفید بنایا ہے ۔ “
یہ روایت امام بزار نے نقل کی ہے اس کی سند میں ایک راوی ہشام بن زیاد ابومقدام ہے اور وہ متروک ہے ۔