مجمع الزوائد ومنبع الفوائد

سیدنا عبدالرحمان بن شبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” فساق ، اہل جہنم ہیں ، لوگوں نے دریافت کیا : یا رسول اللہ ! فساق کون ہیں ؟ نبی اکرم صلی اللہ علیہ وسلم نے ارشاد فرمایا : عورتیں ، ایک صاحب نے عرض کی : یا رسول اللہ ! کیا وہ ہماری مائیں ، ہماری بہنیں اور ہماری بیویاں نہیں ہیں ؟ نبی اکرم صلی اللہ علیہ وسلم نے فرمایا : جی ہاں ! لیکن جب انہیں کچھ دیا جائے تو وہ شکرگزار نہیں ہوتی ہیں ، اور جب انہیں آزمائش میں مبتلا کیا جائے تو وہ صبر نہیں کرتی ہیں ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ، صرف ابوراشد خبرانی کا معاملہ مختلف ہے اور وہ ثقہ ہے ۔

سیدنا حکیم بن حزام رضی اللہ عنہ بیان کرتے ہیں : نبی اکرم صلی اللہ علیہ وسلم نے خواتین کو صدقہ کرنے کا حکم دیا اور انہیں اس حوالے سے ترغیب دی ، نبی اکرم صلی اللہ علیہ وسلم نے ارشاد فرمایا : تم خواتین صدقہ کرو ! کیونکہ اہل جہنم میں اکثریت تمہاری ہے ، اُن میں سے ایک خاتون نے دریافت کیا : یا رسول اللہ ! وہ کیوں ؟ نبی اکرم صلی اللہ علیہ وسلم نے ارشاد فرمایا : کیونکہ تم ( خواتین ) بکثرت لعنت کرتی ہو اور بھلائی کے بارے میں ٹال مٹول کرتی ہو اور شوہر کی ناشکری کرتی ہو ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔