مجمع الزوائد ومنبع الفوائد

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سات آسمانوں میں ایک قدم یا ایک بالشت یا ایک ہتھیلی جتنی جگہ ( بھی خالی نہیں ہے ، ہر جگہ پر ) کوئی فرشتہ قیام کی حالت میں ہے ، کوئی فرشتہ رکوع کی حالت میں ہے ، یا کوئی فرشتہ سجدے کی حالت میں ہے ، جب قیامت کا دن ہو گا تو وہ سب یہ کہیں گے : تو ہر عیب سے پاک ہے ، ہم نے تیری ویسے عبادت نہیں کی ، جو تیری عبادت کا حق تھا البتہ یہ ہے کہ ہم کسی کو تیرا شریک قرار نہیں دیتے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عروہ بن مروان ہے ، امام دارقطنی رحمہ اللہ کہتے ہیں : یہ حدیث میں قوی نہیں ہے ، اس روایت کے بقیہ رجال صحیح کے رجال ہیں ۔

سیدنا عتبہ بن عبد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر کوئی شخص اپنی پیدائش کے دن سے لے کر ، بڑھاپے کے عالم میں مرنے کے دن تک اللہ تعالیٰ کی رضامندی کے حصول کے لیے چہرے کے بل گر جائے ( شاید یہ مراد ہے کہ سجدے میں رہے ) تو قیامت کے دن وہ اس عمل کو بھی حقیر سمجھے گا ۔ “
یہ روایت امام طبرانی نے نقل کی ہے ، اس کی سند میں ایک راوی بقیہ ہے اور وہ مدلس ہے ، اس روایت کے بقیہ رجال ثقہ ہیں ، اس سے پہلے کتاب الایمان میں بندوں پر اللہ تعالیٰ کے حقوق سے متعلق باب میں
یہ روایت گزر چکی ہے ۔