مجمع الزوائد ومنبع الفوائد

سیدنا ابوسعید خدری رضی اللہ عنہ تو روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر شخص صرف اللہ تعالیٰ کی رحمت کی وجہ سے جنت میں داخل ہو گا ، لوگوں نے عرض کی : یا رسول اللہ ! آپ بھی ( اللہ تعالیٰ کی رحمت کے بغیر داخل ) نہیں ( ہوں گے ؟ ) نبی اکرم صلی اللہ علیہ وسلم نے فرمایا : میں بھی نہیں ، البتہ یہ ہے کہ اللہ تعالیٰ نے مجھے اپنی رحمت کے ذریعے ڈھانپ لیا ہے ، نبی اکرم صلی اللہ علیہ وسلم نے اپنے دست مبارک کے ذریعے اپنے سر کے اوپر اشارہ کر کے یہ بات ارشاد فرمائی ۔
یہ روایت امام أحمد نے نقل کی ہے اور اس کی سند حسن ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم میں سے کسی ایک کو اس کا عمل نجات نہیں دے گا ، لوگوں نے عرض کی : یا رسول اللہ ! آپ کو بھی نہیں ؟ نبی اکرم صلی اللہ علیہ وسلم نے ارشاد فرمایا : مجھے بھی نہیں ، البتہ یہ ہے کہ اللہ تعالیٰ نے مجھے اپنی رحمت کے ذریعے ڈھانپ لیا ہے ، تم صبح اور شام اور رات کے کچھ حصے میں ( نماز ادا کرو ) اور میانہ روی اختیار کرو ، میانہ روی اختیار کرو ، تم پہنچ جاؤ گے ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ مذکور ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

ان صحابی کے حوالے سے یہ بات منقول ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” کسی شخص کو اس کا عمل نجات نہیں دلوائے گا ، لوگوں نے عرض کی : یا رسول اللہ ! آپ کو بھی نہیں ؟ نبی اکرم صلی اللہ علیہ وسلم نے ارشاد فرمایا : مجھے بھی نہیں ، البتہ اللہ تعالیٰ نے مجھے اپنی خاص رحمت اور فضل کے ذریعہ ڈھانپ لیا ہے ، اگر وہ میرا اور سیدنا عیسیٰ علیہ السلام کا مواخذہ کرے ، اس چیز کے حوالے سے جس کا ارتکاب ان دو ( انگلیوں ) نے کیا ہے ، تو وہ ہمیں ہلاکت کا شکار کر دے گا ۔ “ راوی بیان کرتے ہیں : نبی اکرم صلی اللہ علیہ وسلم نے شہادت کی انگلی اور درمیانی انگلی کے ذریعے اشارہ کر کے ( یہ بات ارشاد فرمائی ) ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے ، تاہم اس میں یہ الفاظ نہیں ہیں : ” اگر وہ میرا مواخذہ کرے ۔ ۔ ۔ ۔ ۔ ۔ “ ۔
یہ روایت امام بزار نے اور امام طبرانی نے معجم اوسط میں نقل کی ہے تاہم انہوں نے یہ الفاظ نقل کئے ہیں : ” اگر وہ اس کے حوالے سے میرا مواخذہ کرے ، جس کا ارتکاب انہوں نے کیا ہے تو وہ مجھے ہلاکت کا شکار کر دے ۔ “ امام بزار کے استاد ابوبکر سے میں واقف نہیں ہوں ، شاید یہ ابن ابودنیا کا وراق ہے ، کیونکہ اس نے محمد بن عبدالملک بن زنجویہ سے روایات نقل کی ہیں ، اسی طرح امام طبرانی کے استاد ابراہیم بن معاویہ بن ذکوان بن ابوسفیان قیصرانی کے حالات بیان کرتے ہوئے ، میں نے کسی کو نہیں پایا ہے ، ان دونوں کے بقیہ رجال صحیح کے رجال ہیں ، صرف محمد بن عبدالملک بن زنجویہ کا معاملہ مختلف ہے اور وہ ثقہ ہے ۔

سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم میں سے کسی ایک کو اس کا عمل نجات نہیں دلوائے گا ، لوگوں نے عرض کی : یا رسول اللہ ! آپ کو بھی نہیں ؟ نبی اکرم صلی اللہ علیہ وسلم نے فرمایا : مجھے بھی نہیں البتہ اللہ تعالیٰ نے اپنی رحمت کے ذریعے مجھے ڈھانپ لیا ہے ۔ “
یہ روایت امام بزار نے امام طبرانی نے معجم اوسط اور معجم کبیر میں نقل کی ہے ، تاہم انہوں نے معجم کبیر میں یہ الفاظ نقل کئے ہیں : ” تم میں سے کسی ایک کو اس کا عمل جنت میں داخل نہیں کروائے گا ، حاضرین میں سے کسی نے دریافت کیا : آپ کو بھی نہیں ؟ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔ ان روایات کی اسانید میں ایک راوی اشعث بن سوار ہے جس کے ضعیف ہونے کے باوجود اس کی توثیق کی گئی ہے ، ان روایات کے بقیہ رجال ثقہ ہیں ۔

سیدنا شریک بن طارق رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سے کوئی ایک عمل کی وجہ سے جنت میں داخل نہیں ہو گا ، لوگوں نے عرض کی : یا رسول اللہ ! آپ بھی نہیں ؟ نبی اکرم صلی اللہ علیہ وسلم نے فرمایا : میں بھی نہیں ، البتہ اللہ تعالیٰ نے مجھے اپنی رحمت اور فضل کے ذریعے ڈھانپ لیا ہے ۔ “
یہ روایت امام طبرانی نے مختلف اسانید کے حوالے سے نقل کی ہے جن میں سے ایک کے رجال صحیح کے رجال ہیں ۔

سیدنا اسامہ بن شریک رضی اللہ عنہ روایت کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” کوئی شخص اپنے عمل کی وجہ سے جنت میں داخل نہیں ہو گا ، ہم نے عرض کی : یا رسول اللہ ! آپ بھی نہیں ؟ نبی اکرم صلی اللہ علیہ وسلم نے فرمایا : میں بھی نہیں ، البتہ اللہ تعالیٰ نے اپنی رحمت کے ذریعے مجھے ڈھانپ لیا ہے ( یہ بات ارشاد فرماتے ہوئے ) نبی اکرم صلی اللہ علیہ وسلم نے اپنا دست مبارک اپنے سر مبارک پر رکھ لیا ۔
یہ روایت امام طبرانی نے نقل کی ہے اس کی سند میں ایک راوی مفضل بن صالح اسدی ہے اور وہ ضعیف ہے ۔

سیدنا اسد بن کرز رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے اسد بن کرز ! تم عمل کی وجہ سے جنت میں داخل نہیں ہو گے ، بلکہ اللہ تعالیٰ کی رحمت کی وجہ سے ( جنت میں داخل ہو گے ) انہوں نے عرض کی : یا رسول اللہ ! آپ بھی نہیں ؟ نبی اکرم صلی اللہ علیہ وسلم نے فرمایا : میں بھی نہیں ، البتہ اللہ تعالیٰ نے مجھے اپنی رحمت کے ذریعے ڈھانپ لیا ہے “ ( یہاں ایک لفظ کے بارے میں راوی کو شک ہے ) ۔ “
یہ روایت امام طبرانی نے نقل کی ہے اس کی سند میں ایک راوی بقیہ بن ولید ہے اور وہ مدلس ہے ، اس روایت کے بقیہ رجال ثقہ ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن ابن آدم کے لیے تین دیوان لائے جائیں گے ، ایک دیوان میں نیک عمل ہو گا ، ایک دیوان میں اس کے گناہ ہوں گے ، ایک دیوان میں اس پر اللہ تعالیٰ کی نعمتوں کا ذکر ہو گا ، اللہ تعالیٰ اپنی سب سے چھوٹی نعمت سے یہ فرمائے گا : ( راوی کہتے ہیں میرا خیال ہے ، روایت میں یہ الفاظ بھی ہیں : ) نعمتوں والے دیوان میں ( موجود سب سے چھوٹی نعمتوں سے یہ فرمائے گا : ) تم اس کے نیک اعمال میں سے اپنی قیمت وصول کر لو ! تو وہ نعمت اس شخص کے سارے نیک عمل کو حاصل کر لے گی ، پھر وہ پیچھے ہٹے گی اور یہ کہے گی : تیری عزت کی قسم ! میں نے پوری وصولی نہیں کی ، پھر اس شخص کے گناہ اور نعمتیں باقی رہ جائیں گے ، کیونکہ اس کا نیک عمل تو سارا رخصت ہو چکا ہو گا ، جب اللہ تعالیٰ بندے پر رحم کرنے کا ارادہ کرے گا تو فرمائے گا : اے میرے بندے ! اللہ تعالیٰ نے تیری نیکیوں کو کئی گنا کر دیا ہے اور اس نے تیرے گناہوں سے درگزر کیا ہے ( راوی کہتے ہیں : میرا خیال ہے ، روایت میں یہ الفاظ بھی ہیں : ) اور میں نے اپنی نعمتیں تمہیں ہبہ کر دی ہیں ۔ “
یہ روایت امام بزار نے نقل کی ہے اس کی سند میں ایک راوی صالح مری ہے اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : حبشہ سے تعلق رکھنے والا ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! آپ لوگوں کو رنگت اور نبوت کے حوالے سے ہم پر فضیلت دی گئی ہے ، اس بارے میں آپ کی کیا رائے ہے ؟ کہ اگر میں اسی طرح ایمان لے آتا ہوں ، جس طرح آپ لوگ ایمان لائے ہیں اور اس طرح عمل کرتا ہوں ، جس طرح آپ عمل کرتے ہیں ، تو کیا میں جنت میں آپ کے ساتھ ہوؤں گا ؟ نبی اکرم صلی اللہ علیہ وسلم نے ارشاد فرمایا : جی ہاں ! پھر نبی اکرم صلی اللہ علیہ وسلم نے فرمایا : جو شخص لا الہ لا اللہ پڑھے گا تو اس کی وجہ سے اس کے لیے اللہ تعالیٰ کی بارگاہ میں ایک عہد ہو گا اور جو شخص سبحان اللہ پڑھے گا تو اللہ تعالیٰ اس کے لیے ایک لاکھ نیکیاں نوٹ کرے گا ، اس شخص نے عرض کی : یا رسول اللہ ! اس کے بعد ہم کیسے ہلاکت کا شکار ہو سکتے ہیں ؟ نبی اکرم صلی اللہ علیہ وسلم نے ارشاد فرمایا : اس ذات کی قسم ! جس کے دست قدرت میں میری جان ہے ، قیامت کے دن ایک شخص ایسا عمل لے کر آئے گا کہ اگر اسے پہاڑ پر رکھ دیا جائے تو وہ اس کو بھی بوجھل محسوس ہو ، پھر اللہ تعالیٰ کی نعمتوں میں سے ایک نعمت کھڑی ہو گی اور تقریباً اس سارے عمل کو ختم کر دے گی ، اگر اللہ تعالیٰ نے اپنی رحمت کا فضل اس پر نہ کیا ، پھر یہ آیت نازل ہوئی : ” کیا انسان پر ایسا زمانہ نہیں آیا جب وہ کوئی قابل ذکر چیز نہیں تھا ۔ ۔ ۔ ۔ ۔ ۔ “ ۔ یہ آیت یہاں تک ہے : ” اور جب تم ادھر دیکھو گے تو تم نعمتیں اور بڑی بادشاہی دیکھو گے ۔ “ اس حبشی شخص نے عرض کی : یا رسول اللہ ! کیا جنت میں میری آنکھیں بھی اس طرح دیکھیں گی ؟ جس طرح آپ کی آنکھیں دیکھیں گی ، نبی اکرم صلی اللہ علیہ وسلم نے ارشاد فرمایا : جی ہاں ! وہ حبشی شخص رونے لگا ، یہاں تک کہ اس کا انتقال ہو گیا ۔ سیدنا عبداللہ بن عمر رضی اللہ عنہما کہتے ہیں : میں نے نبی اکرم صلی اللہ علیہ وسلم کو دیکھا کہ آپ نے خود سے قبر میں اتارا ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی ایوب بن عتبہ ہے اور وہ ضعیف ہے ، اس کی کمزور توثیق کی گئی ہے ۔

سیدنا واثلہ بن اسقع رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن اللہ تعالیٰ ایک بندے کو اُٹھائے گا ، جس کا کوئی گناہ نہیں ہو گا ، اللہ تعالیٰ فرمائے گا : دونوں میں سے کون سی صورت تمہارے نزدیک زیادہ محبوب ہے ؟ میں تمہارے عمل کے حساب سے تمہیں جزا دیدوں ؟ یا جو میری نعمت تمہیں ملی تھی ( اس کے حوالے سے حساب لوں ؟ ) وہ بندہ کہے گا : اے میرے پروردگار ! تو یہ جانتا ہے کہ میں نے کبھی تیری نافرمانی نہیں کی ، پروردگار فرمائے گا : میرے بندے کو میری نعمتوں میں سے ایک نعمت کے عوض میں پکڑ لو ! تو اس کی ہر ایک نیکی کو وہ نعمت حاصل کر لے گی ، وہ بندہ کہے گا : اے میرے پروردگار ! اپنی نعمت اور اپنی رحمت ( کے وسیلے سے مجھے معاف کر دے ! ) تو پروردگار فرمائے گا : میری نعمت اور میری رحمت ( کی بدولت تمہیں نجات ملتی ہے ) ۔ “ ( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے پوری حدیث ذکر کی ہے ، جو اس سے پہلے حساب سے متعلق باب میں گزر چکی ہے ۔