مجمع الزوائد ومنبع الفوائد

سماک بیان کرتے ہیں : میں نے سیدنا جابر بن سمرہ رضی اللہ عنہ سے دریافت کیا : کیا آپ نبی اکرم صلی اللہ علیہ وسلم کے ساتھ بیٹھتے رہے ہیں ؟ انہوں نے جواب دیا : جی ہاں ! نبی اکرم صلی اللہ علیہ وسلم طویل خاموشی ( اختیار کیے رکھتے تھے ) ۔
یہ روایت امام أحمد نے اور امام طبرانی نے ایک طویل حدیث میں نقل کی ہے امام أحمد کے رجال صحیح کے رجال ہیں ، صرف شریک کا معاملہ مختلف ہے اور وہ ثقہ ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص یہ پسند کرتا ہو کہ وہ سلامت رہے ، اُسے خاموشی کو لازمی اختیار کرنا چاہیے ۔ “
یہ روایت امام ابویعلیٰ نے اور امام طبرانی نے معجم اوسط میں نقل کی ہے اس کی سند میں ایک راوی عثمان بن عبدالرحمن وقاصی ہے اور وہ متروک ہے ۔

ان صحابی کے حوالے سے یہ روایت منقول ہے : نبی اکرم صلی اللہ علیہ وسلم نے ارشاد فرمایا ہے : ” جو شخص اپنی زبان کی حفاظت کرے گا اللہ تعالیٰ اس کے پوشیدہ معاملات کی پردہ پوشی کرے گا ، جو شخص اپنے غصے پر ق ابوپائے گا ، اللہ تعالیٰ اُس سے اپنا عذاب روک لے گا ، جو شخص اللہ تعالیٰ کی بارگاہ میں معذرت پیش کرے گا ، اللہ تعالیٰ اُس کی معذرت قبول کرے گا ۔ “
یہ روایت امام ابویعلیٰ نے نقل کی ہے ، اس کی سند میں ایک راوی ربیع بن سلیمان ازدی ہے اور وہ ضعیف ہے ۔

تمیم بن یزید ، جو بنوزمعہ کے غلام ہیں ، وہ ایک صحابی کا یہ بیان نقل کرتے ہیں : ایک دن نبی اکرم صلی اللہ علیہ وسلم نے ہمیں خطبہ دیتے ہوئے یہ ارشاد فرمایا : ” اے لوگو ! دو چیزیں ہیں ، جس کو اللہ تعالیٰ نے اُن دونوں کے شر سے بچا لیا ، وہ جنت میں داخل ہو گا ۔ “ انصار سے تعلق رکھنے والے ایک صاحب کھڑے ہوئے ، انہوں نے عرض کی : یا رسول اللہ ! کیا آپ ہمیں اُن دونوں کے بارے میں بتائیں گے نہیں ؟ نبی اکرم صلی اللہ علیہ وسلم نے پھر یہ ارشاد فرمایا : دو چیزیں ہیں ، جس کو اللہ تعالیٰ نے ان دونوں کے شر سے بچا لیا ، وہ جنت میں داخل ہو گا راوی بیان کرتے ہیں : جب تیسری مرتبہ یہی مکالمہ ہوا تو صحابہ کرام رضی اللہ عنہم نے ان صاحب کو روک دیا اور یہ کہا: تم دیکھ رہے ہو کہ اللہ کے رسول صلی اللہ علیہ وسلم ہمیں کوئی خوشخبری سنانا چاہ رہے ہیں اور تم انہیں روک رہے ہو ، اس شخص نے کہا: مجھے یہ اندیشہ ہے کہ کہیں لوگ اس پر تکیہ نہ کر لیں ، نبی اکرم صلی اللہ علیہ وسلم نے ارشاد فرمایا : ” دو چیزیں ہیں ، جس کو اللہ تعالیٰ نے ان دونوں کے شر سے بچا لیا وہ جنت میں جائے گا ، وہ چیز جو دو جبڑوں کے درمیان ہے ( یعنی زبان ) اور وہ چیز جو دونوں ٹانگوں کے درمیان ہے ( یعنی شرمگاہ ) ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ، صرف تمیم کا معاملہ مختلف ہے اور وہ ثقہ ہے ۔

سیدنا ابوموسیٰ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے دونوں جبڑوں کے درمیان والی چیز ( یعنی زبان ) اور اپنی شرم گاہ کی حفاظت کرے گا وہ جنت میں داخل ہو گا ۔ “
یہ روایت امام أحمد نے نقل کی ہے ، امام ابویعلیٰ اور امام طبرانی نے اس کی مانند نقل کی ہے ، طبرانی اور ابویعلیٰ کے رجال ثقہ ہیں ، أحمد کے رجال میں ایک ایسا راوی ہے جس کا نام بیان نہیں کیا گیا ہے اس روایت کے بقیہ رجال ثقہ ہیں ، بظاہر یہ لگتا ہے کہ امام أحمد نے جس راوی کا نام ذکر نہیں کیا ، وہ سلیمان بن یسار ہے ۔

ان کے حوالے سے یہ بات منقول ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تمہیں دو ایسی چیزوں کے بارے میں نہ بتاؤں ؟ کہ جو شخص انہیں کر لے گا وہ جنت میں داخل ہو گا ، ہم نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : ” آدمی اُس چیز کی حفاظت کرے ، جو اس کے دونوں جبڑوں کے درمیان ہے ( یعنی زبان ) اور اُس کی جو اس کی دونوں ٹانگوں کے درمیان ہے ( یعنی شرمگاہ ) ۔ “ راوی کہتے ہیں : میں اور میرا ساتھی واپس آئے ، ہم نے سوچا ، اللہ کی قسم ! یہ تو بہت مشکل ہے ، آدمی اس بات کی کیسے استطاعت رکھتا ہے کہ وہ دونوں جبڑوں کے درمیان موجود چیز کی حفاظت کرے اور صرف بھلائی کے بارے میں کلام کرے ، راوی کہتے ہیں : ہم لوگ نبی اکرم صلی اللہ علیہ وسلم کی خدمت میں حاضر ہوئے ، ہم نے عرض کی : یا رسول اللہ ! آپ نے دو ایسے امور ذکر کئے ہیں ، جو بہت مشکل ہیں یا رسول اللہ ! کون اس بات کی استطاعت رکھتا ہے کہ وہ اپنی زبان پر ق ابورکھے ؟ نبی اکرم صلی اللہ علیہ وسلم نے ارشاد فرمایا : چھ کام ایسے ہیں ، جو شخص انہیں کر لے گا ، وہ جنت میں داخل ہو گا ، ہم نے دریافت کیا : وہ کون سے ہیں ؟ نبی اکرم صلی اللہ علیہ وسلم نے فرمایا : ” وہ شخص جو کسی کو اللہ کا شریک نہ ٹھہرائے ، وہ زنا نہ کرے ، وہ جھوٹا الزام نہ لگائے ۔ ۔ ۔ ۔ ۔ ۔ “ ۔ اس کے بعد آپ نے اس آیت کو مکمل تلاوت کیا ( راوی کہتے ہیں : ) تو یہ حکم پہلے والے سے بھی زیادہ مشکل تھا ۔
یہ روایت امام طبرانی نے نقل کی ہے اور اس کے رجال کی توثیق کی گئی ہے ۔

ابومالک اشجعی اپنے والد کا یہ بیان نقل کرتے ہیں : ہم لوگ نبی اکرم صلی اللہ علیہ وسلم کے پاس بیٹھے رہتے تھے ، ہم سب نوجوان تھے میں نے ایسا کوئی فرد نہیں دیکھا جو اللہ کے رسول صلی اللہ علیہ وسلم سے زیادہ خاموش رہتا ہو ، آپ صلی اللہ علیہ وسلم کے اصحاب گفتگو کرتے ہوئے جب زیادہ گفتگو کرتے تھے تو آپ مسکرا دیتے تھے ۔
یہ روایت امام طبرانی نے نقل کی ہے اس کی سند میں ایک راوی ابراہیم بن ذکریا عجلی ہے اور وہ ضعیف ہے ۔

سیدنا حارث بن ہشام رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کی خدمت میں عرض کی : آپ مجھے کسی ایسی چیز کے بارے میں بتائیے جسے میں مضبوطی سے تھام لوں ، نبی اکرم صلی اللہ علیہ وسلم نے ارشاد فرمایا : اس پر ق ابورکھو ! آپ صلی اللہ علیہ وسلم نے اپنی زبان کی طرف اشارہ کر کے ( یہ بات ارشاد فرمائی ) ۔
یہ روایت امام أحمد نے دو اسناد کے ساتھ نقل کی ہے ان دونوں میں سے ایک عمدہ ہے ۔

سیدنا عبادہ بن صامت صلی اللہ علیہ وسلم بیان کرتے ہیں : ایک دن نبی اکرم صلی اللہ علیہ وسلم تشریف لائے ، آپ اپنی سواری پر چلتے ہوئے جا رہے تھے ، آپ کے ہمراہ آپ کے اصحاب تھے ، ان میں سے کوئی ایک بھی آپ سے آگے نہیں ہوتا تھا ، سیدنا معاذ بن جبل رضی اللہ عنہ نے عرض کی : یا رسول اللہ ! میں اللہ تعالیٰ سے یہ دعا کرتا ہوں کہ وہ ہمارا ( مرنے کا مخصوص ) دن ، آپ کے دن سے پہلے کر دے ، لیکن اگر کچھ ہو گیا ، ویسے اللہ تعالیٰ ہمیں وہ دن نہ دکھائے ، تو آپ کے بعد ہم کون سے اعمال پر عمل پیرا ہوں ؟ نبی اکرم صلی اللہ علیہ وسلم خاموش رہے ، انہوں نے دریافت کیا : اللہ کی راہ میں جہاد کرنا ، میں نے عرض کی : یا رسول اللہ ! میرے ماں باپ آپ پر قربان ہوں ، آپ نے فرمایا : اللہ کی راہ میں جہاد کرنا اچھی چیز ہے ، لیکن تم لوگوں کے ساتھ وہ رویہ رکھو جس کا ( آدمی ) اس سے زیادہ مالک ہوتا ہے ، سیدنا معاذ رضی اللہ عنہ نے دریافت کیا : روزہ رکھنا اور صدقہ کرنا ؟ آپ نے فرمایا : روزہ رکھنا اور صدقہ کرنا بھی اچھی چیز ہے لیکن تم لوگوں کے ساتھ وہ رویہ رکھو جس کا ( آدمی ) اس سے زیادہ مالک ہوتا ہے ( راوی بیان کرتے ہیں : ) سیدنا معاذ رضی اللہ عنہ نے ہر اس بھلائی کا ذکر کیا جس کا وہ علم رکھتے تھے اور ہر مرتبہ نبی اکرم صلی اللہ علیہ وسلم یہی فرماتے رہے : تم لوگوں کے ساتھ وہ رویہ رکھو جس کا ( آدمی ) اس سے زیادہ مالک ہوتا ہے ، سیدنا معاذ رضی اللہ عنہ نے عرض کی : تم لوگوں کے ساتھ وہ رویہ رکھو جس کا ( آدمی ) اس سے زیادہ مالک ہوتا ہے ( اس سے مراد کیا ہے ؟ ) تو نبی اکرم صلی اللہ علیہ وسلم نے اپنے منہ کی طرف اشارہ کرتے ہوئے فرمایا : خاموش رہنا ، البتہ بھلائی ( کے بارے میں بات کرنے ) کا حکم مختلف ہے ۔ سیدنا معاذ رضی اللہ عنہ نے دریافت کیا : ہماری زبانیں جو کلام کرتی ہیں ، کیا ان کے حوالے سے ہمارا مواخذہ کیا جائے گا ؟ تو نبی اکرم صلی اللہ علیہ وسلم نے سیدنا معاذ رضی اللہ عنہ کے زانوں پر ہاتھ مارا اور پھر یہ ارشاد فرمایا : ” تمہاری ماں تمہیں روئے ۔ “ اور جو بھی اللہ کو منظور تھا وہ آپ نے فرمایا ، اور پھر یہ فرمایا : ” لوگوں کو جہنم میں اُن کے نتھنوں کے بل اوندھا کر کے صرف اس وجہ سے ڈالا جائے گا ، جو اُن کی زبانوں نے گفتگو کی ہو گی ، جو شخص اللہ تعالیٰ اور آخرت کے دن پر ایمان رکھتا ہو وہ بھلائی کی بات کرے یا برائی کے حوالے سے خاموش رہے ، تم لوگ بھلائی کی بات کرو ، تم غنیمت حاصل کرو گے اور برائی کے حوالے سے خاموش رہو ، تم سلامت رہو گے ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف عمرو بن مالک جنبی کا معاملہ مختلف ہے اور وہ ثقہ ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اللہ تعالیٰ اور آخرت کے دن پر ایمان رکھتا ہو اور اس بات کی گواہی دیتا ہو کہ میں اللہ کا رسول ہوں ، تو اس کا گھر اس کے لئے گنجائش والا ہونا چاہیے ( یعنی اُس کو زیادہ تر اپنے گھر میں رہنا چاہیے ) اور اُسے اپنے گناہوں پر رونا چاہیے اور جو شخص اللہ تعالیٰ اور آخرت کے دن پر ایمان رکھتا ہو اور اس بات کی گواہی دیتا ہو کہ میں اللہ کا رسول ہوں اُسے بھلائی کی بات کرنی چاہیے تاکہ وہ غنیمت حاصل کرے ، یا برائی کے حوالے سے خاموش رہنا چاہیے تاکہ وہ سلامت رہے ۔ “
یہ روایت امام طبرانی نے نقل کی ہے اس کی سند میں ایک راوی عفیر بن معدان ہے اور وہ ضعیف ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تمہارا گھر تمہارے لیے گنجائش والا ہونا چاہیے ، تم اپنے گناہوں کو یاد کر کے روؤ اور اپنی زبان پر ق ابورکھو ۔ “
یہ روایت امام طبرانی نے معجم کبیر میں نقل کی ہے اور معجم اوسط میں اس کی مانند نقل کی ہے اس کی سند میں ایک راوی مسعودی ہے جو اختلاط کا شکار ہو گیا تھا ۔

نبی اکرم صلی اللہ علیہ وسلم کے غلام سیدنا ثوبان رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اس شخص کے لئے مبارکباد ہے جو اپنی زبان پر ق ابورکھے ، اس کا گھر اس کے لئے گنجائش والا ہو اور وہ اپنے گناہوں پر روئے ۔ “
یہ روایت امام طبرانی نے معجم اوسط اور معجم صغیر میں نقل کی ہے اور اس کی سند حسن ہے ۔

اسماعیل بن ابوخالد بیان کرتے ہیں : سیدنا عبداللہ بن مسعود رضی اللہ عنہ نے اپنے صاحبزادے ابوعبیدہ کو تین باتوں کی وصیت کی تھی : ” اے میرے بیٹے ! میں تمہیں اللہ کا تقویٰ اختیار کرنے کی تلقین کرتا ہوں اور تمہارا گھر تمہارے لیے گنجائش والا ہونا چاہیے اور تم اپنے گناہوں پر رونا اور اپنی زبان کو روکے رکھنا ( یعنی اس کو ق ابومیں رکھنا ) ۔ “
یہ روایت امام طبرانی نے دو اسناد کے ساتھ نقل کی ہے ان دونوں میں سے ایک کے رجال صحیح کے رجال ہیں ، صرف عبدالملک بن عمر کا معاملہ مختلف ہے ، وہ کہتے ہیں : آل عبداللہ نے مجھے یہ بات بیان کی ہے ، سیدنا عبداللہ رضی اللہ عنہ نے اپنے صاحبزادے کو یہ وصیت کی تھی ۔

ابووائل نے سیدنا عبداللہ بن مسعود رضی اللہ عنہ کے بارے میں یہ بات نقل کی ہے : وہ صفا پہاڑ پر چڑھے ، پھر انہوں نے اپنی زبان پکڑی اور فرمایا : اے زبان ! تم بھلائی کی بات کرو ، تم غنیمت حاصل کر لو گی ، اور تم برائی کے حوالے سے خاموش رہو تم سلامت رہو گی ، اس سے پہلے کہ تم ندامت کا شکار ہو ، اس سے پہلے کہ تم ندامت کا شکار ہو ۔ “ پھر انہوں نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ابن آدم کی زیادہ تر خطائیں اُس کی زبان کے حوالے سے ہوتی ہیں ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا اسود بن اصرم رضی اللہ عنہ بیان کرتے ہیں : میں نے عرض کی : یا رسول اللہ ! آپ مجھے کوئی تلقین کیجئے ، نبی اکرم صلی اللہ علیہ وسلم نے دریافت کیا : کیا تم اپنے ہاتھ کے مالک ہو ؟ ( یعنی کیا وہ تمہارے ق ابومیں ہے ؟ ) میں نے عرض کی : اگر میں اپنے ہاتھ پر ق ابونہیں رکھوں گا ، تو کس پر ق ابورکھوں گا ؟ نبی اکرم صلی اللہ علیہ وسلم نے دریافت کیا : کیا تمہیں اپنی زبان پر ق ابوہے ؟ میں نے عرض کی : اگر میں اپنی زبان پر ق ابونہیں رکھوں گا تو کس پر ق ابورکھوں گا ؟ نبی اکرم صلی اللہ علیہ وسلم نے ارشاد فرمایا : ” تم اپنا ہاتھ صرف بھلائی کی طرف بڑھانا اور تم اپنی زبان کے ذریعے صرف نیکی کی بات کہنا ۔ “
یہ روایت امام طبرانی نے نقل کی ہے اور اس کی سند حسن ہے ۔

سیدنا معاذ بن جبل رضی اللہ عنہ بیان کرتے ہیں : میں نے عرض کی : یا رسول اللہ ! کیا ہم جو بھی کلام کرتے ہیں وہ ہمارے حوالے سے نوٹ کیا جاتا ہے ؟ نبی اکرم صلی اللہ علیہ وسلم نے ارشاد فرمایا : ” تمہاری ماں تمہیں روئے لوگوں کو جہنم میں ان کے نتھنوں کے بل اوندھا کر کے صرف اُن کی زبان کی ( باتوں ) کی وجہ سے ہی ڈالا جائے گا ، تم جب تک خاموش رہو گے اس وقت تک سلامت رہو گے اور جب تم کلام کرو گے تو وہ تمہارے حق میں یا تمہارے خلاف نوٹ کیا جائے گا ۔ “ ( علامہ ہیثمی فرماتے ہیں : ) میں یہ کہتا ہوں : یہ روایت امام ترمذی نے ان الفاظ کے اختصار کے ساتھ نقل کی ہے : ” تم اس وقت تک سلامت رہو گے ۔ ۔ ۔ ۔ ۔ ۔ “ یہاں سے لے کر روایت کے آخر تک کے الفاظ انہوں نے نقل کیے ہیں ۔
یہ روایت امام طبرانی نے دو اسناد کے ساتھ نقل کی ہے ، ان دونوں میں سے ایک کے رجال ثقہ ہیں ۔

سیدنا عدی بن حاتم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آدمی کی سب سے زیادہ بابرکت اور سب سے زیادہ منحوس ( چیز ) وہ ہے جو اس کے دونوں جبڑوں کے درمیان ہے ( یعنی زبان ) ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا ابوالیسر رضی اللہ عنہ بیان کرتے ہیں : ایک شخص نے عرض کی : یا رسول اللہ ! آپ کسی ایسے عمل کے بارے میں میری رہنمائی کیجئے جو مجھے جنت میں داخل کروا دے ، نبی اکرم صلی اللہ علیہ وسلم نے ارشاد فرمایا : ” اس کو ق ابومیں رکھو ! آپ صلی اللہ علیہ وسلم نے اپنی زبان کی طرف اشارہ کر کے یہ بات ارشاد فرمائی ۔ اس شخص نے آپ کے سامنے اپنا سوال دہرایا ، تو آپ صلی اللہ علیہ وسلم نے ارشاد فرمایا : ” تمہاری ماں تمہیں روئے ، لوگوں کو اُن کے نتھنوں کے بل جہنم میں صرف اُن کی زبان کی کھیتیوں کی وجہ سے ڈالا جائے گا ۔ “
یہ روایت امام بزار نے نقل کی ہے وہ کہتے ہیں : اس کی سند حسن ہے اور اس کا متن غریب ہے ۔

یہ روایت امام طبرانی نے معجم اوسط میں نقل کی ہے ، تاہم انہوں نے یہ الفاظ نقل کئے ہیں : ” سیدنا معاذ رضی اللہ عنہ نے کہا: یا رسول اللہ ! آپ مجھے کسی ایسے عمل کے بارے میں حکم دیں ، جو مجھے جنت میں داخل کروا دے ، نبی اکرم صلی اللہ علیہ وسلم نے ارشاد فرمایا : تم اللہ پر ایمان رکھو ! اور بھلائی کی بات کرو ، یہ تمہارے حق میں نوٹ کی جائے گی ، تم بری بات نہ کرنا ، ورنہ وہ تمھارے خلاف نوٹ کی جائے گی ، انہوں نے دریافت کیا : کیا ہم جو کلام کرتے ہیں اُس کے حوالے سے ہمارا مواخذہ کیا جائے گا ؟ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔

سیدہ عائشہ صدیقہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو ، لوگوں کو خطبہ دینے کے دوران یہ ارشاد فرماتے ہوئے سنا : ” جنت میں تمہارا مقام ہو گا ۔ “ راوی کہتے ہیں : یعنی جو شخص اپنے دونوں جبڑوں کے درمیان والی چیز یعنی زبان اور دونوں ٹانگوں کے درمیان والی چیز یعنی شرمگاہ کی حفاظت کرے گا ( اُس کا ٹھکانہ جنت ہو گا ) ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا ابورافع رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص دونوں جبڑوں کے درمیان ( یعنی زبان ) اور دونوں ٹانگوں کے درمیان ( یعنی شرمگاہ ) کی حفاظت کرے گا وہ جنت میں داخل ہو گا ۔ “
یہ روایت امام طبرانی نے نقل کی ہے اور اس کی سند عمدہ ہے ۔ اس سے پہلے سیدنا ابوموسیٰ رضی اللہ عنہ کی نقل کردہ حدیث اس باب میں گزر چکی ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص مجھے اُس کی ضمانت دے جو دونوں جبڑوں کے درمیان ہے اور جو دونوں ٹانگوں کے درمیان ہے ، میں اُسے جنت کی ضمانت دیتا ہوں ۔ “
یہ روایت امام طبرانی نے معجم صغیر اور معجم اوسط میں نقل کی ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اللہ تعالیٰ اور آخرت کے دن پر ایمان رکھتا ہو ، اسے بھلائی کی بات کہنی چاہیے یا پھر خاموش رہنا چاہیے ۔ “
یہ روایت امام بزار نے ایک طویل حدیث میں نقل کی ہے اور اس کی سند حسن ہے ۔ ( علامہ ہیثمی فرماتے ہیں : ) میں یہ کہتا ہوں : اس روایت کے مختلف طرق اس سے پہلے نیکی اور صلہ رحمی سے متعلق کتاب میں ، مہمان کے حق سے متعلق باب میں گزر چکے ہیں ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” جو شخص اللہ تعالیٰ اور آخرت کے دن پر ایمان رکھتا ہو وہ اپنے پڑوسی کو اذیت نہ پہنچائے اور جو شخص اللہ تعالیٰ اور آخرت کے دن پر ایمان رکھتا ہو وہ بھلائی کی بات کرے یا پھر خاموش رہے اور جو شخص اللہ تعالیٰ اور آخرت کے دن پر ایمان رکھتا ہو وہ اپنے مہمان کی عزت افزائی کرے ۔ “
یہ روایت امام بزار نے اپنے استاد ابراہیم بن یحیی نیشاپوری کے حوالے سے نقل کی ہے اور میں اس سے واقف نہیں ہوں ، اس روایت کے بقیہ رجال کی توثیق کی گئی ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کی ملاقات سیدنا ابوذر غفاری رضی اللہ عنہ سے ہوئی ، آپ صلی اللہ علیہ وسلم نے ارشاد فرمایا : ” اے ابوذر ! کیا میں تمہاری رہنمائی دو ایسی خصلتوں کی طرف نہ کروں جو پشت کے لیے ہلکی ہیں ، لیکن میزان میں اُن دونوں کے علاوہ ( دیگر چیزوں ) سے وزنی ہوں گی ، انہوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : ” تم پر اچھے اخلاق اور طویل خاموشی اختیار کرنا لازم ہے ، اس ذات کی قسم ! جس کے دست قدرت میں میری جان ہے ، مخلوق نے ان دونوں جیسا کوئی عمل نہیں کیا ہو گا ۔ “
یہ روایت امام بزار نے نقل کی ہے اس کی سند میں ایک راوی بشار بن حکم ہے اور وہ ضعیف ہے ۔

سیدنا عبداللہ بن مسعود رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے سوال کیا : میں نے عرض کی : یا رسول اللہ ! کون سا عمل زیادہ فضیلت رکھتا ہے ؟ آپ صلی اللہ علیہ وسلم نے ارشاد فرمایا : نماز کو اس کے مخصوص وقت پر ادا کرنا ، میں نے دریافت کیا : یا رسول اللہ ! پھر کون سا ہے ؟ آپ صلی اللہ علیہ وسلم نے فرمایا : والدین کے ساتھ اچھا سلوک کرنا ، میں نے دریافت کیا : یا رسول اللہ ! پھر کون سا ہے ؟ آپ صلی اللہ علیہ وسلم نے فرمایا : یہ کہ لوگ تمہاری زبان سے سلامت رہیں ( راوی بیان کرتے ہیں : ) پھر میں خاموش ہو گیا ، اگر میں آپ سے مزید دریافت کرتا تو آپ صلی اللہ علیہ وسلم مجھے مزید ( جواب ) ارشاد فرماتے ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس میں سے ، صرف نماز کو اُس کے مخصوص وقت میں ادا کرنے والا حصہ مذکور ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف عمرو بن عبداللہ نخعی کا معاملہ مختلف ہے اور وہ ثقہ ہے ۔

سیدنا حارث بن ہشام رضی اللہ عنہ بیان کرتے ہیں : میں نے عرض کی : یا رسول اللہ ! آپ مجھے کسی ایسی چیز کے بارے میں بتائیے جسے میں مضبوطی سے تھام لوں ، نبی اکرم صلی اللہ علیہ وسلم نے ارشاد فرمایا : تم اس پر ق ابورکھو ! آپ صلی اللہ علیہ وسلم نے اپنی زبان کی طرف اشارہ کر کے یہ بات یعنی ارشاد فرمائی ۔
یہ روایت امام طبرانی نے معجم اوسط میں نقل کی ہے ، اس میں ” وجادة“ ہے اور اس کے رجال ثقہ ہیں ۔

سیدنا ابوہریرہ بیان کرتے ہیں : نبی اکرم صلی اللہ علیہ وسلم نے اپنے اردگرد موجود اپنی امت کے افراد سے ارشاد فرمایا : تم مجھے چھ چیزوں کی ضمانت دو ! امیں تمہیں جنت کی ضمانت دیتا ہوں ، عرض کی گئی : یا رسول اللہ ! ( وہ چیزیں ) کیا ہیں ؟ نبی اکرم صلی اللہ علیہ وسلم نے ارشاد فرمایا : ” نماز ، زکوة ، امانت ، شرمگاہ ، پیٹ اور زبان ۔ “
یہ روایت امام طبرانی نے معجم صغیر اور معجم اوسط میں نقل کی ہے اس کی سند میں ایک راوی یحیی بن حماد طائی ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا انس بن مالک رضٰ اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم مجھے چھ چیزوں کی ضمانت دو ! میں تمہیں جنت کی ضمانت دیتا ہوں ، لوگوں نے دریافت کیا : وہ کون سی ہیں ؟ نبی اکرم صلی اللہ علیہ وسلم نے ارشاد فرمایا : ” جب کوئی شخص بات کرے تو وہ جھوٹ نہ بولے : ، جب وعدہ کرے تو اس کی خلاف ورزی نہ کرے ، جب اسے امین بنایا جائے تو خیانت نہ کرے ، تم اپنی نگاہیں جھکا کے رکھو ، اپنے ہاتھ روک کے رکھو اور اپنی شرمگاہوں کی حفاظت کرو ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں البتہ یزید بن سنان نے سیدنا انس رضی اللہ عنہ سے سماع نہیں کیا ہے ، باقی اللہ بہتر جانتا ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم مجھے چھ چیزوں کی ضمانت دو ! میں تمہیں جنت کی ضمانت دیتا ہوں ، جب کوئی شخص بات کرے تو جھوٹ نہ بولے : ، جب وعدہ کرے تو اس کی خلاف ورزی نہ کرے ، جب اسے امین بنایا جائے تو خیانت نہ کرے ، تم اپنی نگاہیں جھکا رکھو ، اپنی شرمگاہوں کی حفاظت کرو اور اپنے ہاتھ روک کے رکھو ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی فضال بن زبیر اور ایک روایت کے مطابق ابن جبیر ہے اور وہ ضعیف ہے ۔

سیدنا ابوسعید خدری رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اور بولا: یا رسول اللہ ! آپ مجھے کوئی تلقین کیجئے نبی اکرم صلی اللہ علیہ وسلم نے ارشاد فرمایا : ” تم پر اللہ تعالیٰ کا تقویٰ اختیار کرنا لازم ہے کیونکہ یہ ساری بھلائی کا مجموعہ ہے ، تم پر اللہ کی راہ میں جہاد کرنا لازم ہے کیونکہ یہ مسلمانوں کی رہبانیت ہے ، تم پر اللہ تعالیٰ کا ذکر کرنا اور اس کی کتاب کی تلاوت کرنا لازم ہے ، کیونکہ یہ زمین میں تمہارے لئے نور ہو گا اور آسمان میں تمہارے لئے ذکر ہو گا ، تم اپنی زبان پر ق ابورکھو ، البتہ بھلائی کا معاملہ مختلف ہے ، کیونکہ اس کے ذریعے تم شیطان پر غالب آ جاؤ گے ۔ “
یہ روایت امام طبرانی نے معجم صغیر میں نقل کی ہے اس کی سند میں ایک راوی لیث بن ابوسلیم ہے اور وہ مدلس ہے ، ویسے اس کی توثیق کی گئی ہے ، اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کا ہنسنا زیادہ ہو گا ، اُس کا حق ہلکا ہو جائے گا ، جس شخص کا ہنسی مذاق زیادہ ہو گا اس کی جلالت رخصت ہو جائے گی ، جس کا مزاح زیادہ ہو گا ، اس کا وقار رخصت ہو جائے گا ، جو شخص ( صبح کے وقت بیدار ہونے کے بعد ) خالی پیٹ پانی پیے گا ، اس کی قوت نصف رہ جائے گی ، جو شخص زیادہ بات کرے گا اس کی فضولیات بھی زیادہ ہوں گی اور جس کی فضولیات زیادہ ہوں گی اس کے گناہ زیادہ ہوں گے اور جس کے گناہ زیادہ ہوں گے ، جہنم اس کے زیادہ لائق ہو گی ۔ “
یہ روایت امام طبرانی نے معجم اوسط میں نقل کی ہے اور اس کی سند میں راویوں کی ایسی جماعت ہے جن سے میں واقف نہیں ہوں ۔

احنف بن قیس بیان کرتے ہیں : سیدنا عمر بن خطاب رضی اللہ عنہ نے مجھ سے فرمایا : ” اے احنف ! جس کا ہنسنا زیادہ ہو گا ، اس کی ہیبت کم ہو گی ، جو مزاح کرے گا ، اس کو ہلکا سمجھا جائے گا جو زیادہ کلام کرے گا اس کی فضولیات بھی زیادہ ہوں گی اور جس کی فضولیات زیادہ ہوں گی اس کی حیاء کم ہو گی اور جس کی حیاء کم ہو گی اس کی پرہیزگاری کم ہو گی اور جس کی پرہیزگاری کم ہو گی ، اس کا دل مر جائے گا ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی دوید بن مجاشع ہے اور میں اس سے واقف نہیں ہوں اس روایت کے رجال ثقہ ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب تم کسی ایسے شخص کو دیکھو جسے دنیا سے بے رغبتی اور کم گوئی عطا کی گئی ہو تو اس کے قریب رہو ، کیونکہ اسے حکمت القاء کی گئی ہو گی ۔ “
یہ روایت امام طبرانی نے اپنے استاد أحمد بن طاہر بن حرملہ کے حوالے سے نقل کی ہے اور وہ کذاب ہے ۔

اسلم بیان کرتے ہیں : سیدنا عمر رضی اللہ عنہ نے سیدنا ابوبکر صدیق رضی اللہ عنہ کو دیکھا کہ وہ اپنی زبان کو کھینچ رہے تھے ، انہوں نے دریافت کیا : اے اللہ کے رسول کے خلیفہ ! یہ آپ کیا کر رہے ہیں ؟ سیدنا ابوبکر رضی اللہ عنہ نے فرمایا : اس نے مجھے مختلف طرح کی صورتحال کا شکار کیا ہے ، اور نبی اکرم صلی اللہ علیہ وسلم نے ارشاد فرمایا ہے : ” جسم کی ہر چیز زبان کی تیزی کی شکایت کرتی ہے ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں صرف موسیٰ بن محمد بن حیان کا معاملہ مختلف ہے اور ابن حبان نے اسے ثقہ قرار دیا ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو زیادہ کلام کرتا ہے اس کی لغزش زیادہ ہوتی ہے اور جس کی لغزش زیادہ ہو ، اس کے گناہ زیادہ ہوتے ہیں اور جس کے گناہ زیادہ ہوں ، تو جہنم اس کی زیادہ حقدار ہے ، جو شخص اللہ تعالیٰ اور آخرت کے دن پر ایمان رکھتا ہو اسے بھلائی کی بات کہنی چاہیے یا پھر خاموش رہنا چاہیے ۔ “
یہ روایت امام طبرانی نے معجم اوسط میں نقل کی ہے اور اس کی سند میں ضعیف راوی ہیں ، جن کی توثیق کی گئی ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بندہ ایمان کی حقیقت تک اس وقت تک نہیں پہنچ سکتا جب تک وہ زبان پر ق ابونہیں رکھتا ۔ “
یہ روایت امام طبرانی نے معجم صغیر اور معجم اوسط میں نقل کی ہے اس کی سند میں ایک راوی داؤد بن ہلال ہے جس کا ذکر ابن ابی حاتم نے کیا ہے ، انہوں نے اس میں کسی ضعف کا ذکر نہیں کیا ہے اس روایت کے بقیہ رجال صحیح کے رجال ہیں ، صرف زہیر بن عباد کا معاملہ مختلف ہے اور ایک جماعت نے اسے ثقہ قرار دیا ہے ۔

سیدنا عبداللہ بن مسعود رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : آپ مجھے کوئی تلقین کیجیے ! نبی اکرم صلی اللہ علیہ وسلم نے ارشاد فرمایا : ” قیل و قال ، کثرت سوال اور مال ضائع کرنے کو چھوڑ دو ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی سری بن اسماعیل ہے اور وہ متروک ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ مال ضائع کرنے کو ، کثرت سوال کو اور قیل و قال کو پسند نہیں کرتا ہے ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے اس نوعیت کی کچھ احادیث کتاب العلم میں گزر چکی ہیں ۔

سیدنا ابوہریرہ رضی اللہ عنہ بیان کرتے ہیں : ” نبی اکرم صلی اللہ علیہ وسلم کے زمانہ اقدس میں ایک شخص قتل ہو گیا ، ایک خاتون نے اس پر روتے ہوئے یہ کہہ دیا : ہائے شہید ! راوی بیان کرتے ہیں : نبی اکرم صلی اللہ علیہ وسلم نے ارشاد فرمایا : رک جاؤ ! تمہیں کیا پتا کہ یہ شہید ہے ؟ ہو سکتا ہے وہ ایسی باتیں کرتا ہو جو لایعنی ہوں اور وہ ایسی چیزوں کے حوالے سے بخل کرتا ہو ( جن کو خرچ کرنے سے ) اُس کے لیے کوئی کمی نہ ہوتی ۔ “
یہ روایت امام ابویعلیٰ نے نقل کی ہے اور اس کی سند میں ایک راوی عصام بن طلیق ہے اور وہ ضعیف ہے ۔