مجمع الزوائد ومنبع الفوائد

شتیر بن شکل ، زفر ، صلہ بن زفر اور سلیک بن مسحل بیان کرتے ہیں : سیدنا حذیفہ رضی اللہ عنہ ہمارے پاس تشریف لائے ، ہم اس وقت بات چیت کر رہے تھے انہوں نے فرمایا : تم لوگ ایسا کلام کر جاتے ہو کہ نبی اکرم صلی اللہ علیہ وسلم کے زمانہ اقدس میں ہم اُسے منافقت شمار کرتے تھے ۔
یہ روایت امام أحمد نے نقل کی ہے اور اس کے رجال ثقہ ہیں ، البتہ لیث بن ابوسلیم کا معاملہ مختلف ہے اور وہ مدلس ہے ۔

سیدنا حذیفہ درست فرماتے ہیں : نبی اکرم صلی اللہ علیہ وسلم کے زمانہ اقدس میں ، بعض اوقات کوئی شخص ایسا کلام کرتا تھا کہ اس کے ذریعے وہ منافق ہو جاتا تھا اور اب ویسا کلام ، میں تم میں سے کسی ایک کی زبانی ایک محفل میں دس مرتبہ سن لیتا ہوں ۔

ایک روایت میں یہ الفاظ ہیں : چار مرتبہ ( سن لیتا ہوں ) ۔
یہ روایت امام أحمد نے نقل کی ہے اس کی سند میں ایک راوی ابورقاد جہنی ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” آدمی کوئی بات کہتا ہے اور اُس ( بات ) کی وجہ سے وہ جہنم میں اتنے اتنے سال تک گرتا رہے گا ۔ “
یہ روایت امام بزار نے نقل کی ہے اس کی سند میں ایسے راوی ہیں ، جن سے میں واقف نہیں ہوں ۔

سیدنا ابوسعید خدری رضی اللہ عنہ ” مرفوع “ حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا ہے : ) ” آدمی کوئی بات کرتا ہے اور اس ( بات ) کے ذریعے اُس کا مقصد کوئی حرج والا نہیں ہوتا ، صرف اس کے ذریعے کچھ لوگوں کو ہنسانا مقصود ہوتا ہے لیکن اُس ( بات ) کی وجہ سے وہ اس سے زیادہ ( بلندی سے جہنم میں ) گرے گا جتنا آسمان کا فاصلہ ہے ۔ “
یہ روایت امام أحمد نے نقل کی ہے اور اس کے رجال میں سے بعض کے ضعیف ہونے کے باوجود ان کی توثیق کی گئی ہے ۔

سیده امۃ بنت ابوالحکم غفاریہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” آدمی جنت کے قریب ہو جاتا ہے ، یہاں تک کہ اس کے اور جنت کے درمیان میں ایک ذراع ( یعنی کہنی سے لے کر سب سے بڑی انگلی کے کنارے تک کی مقدار ) کا فاصلہ باقی رہ جاتا ہے پھر وہ کوئی ایسی بات کہتا ہے جس کی وجہ سے وہ جنت سے اس سے زیادہ دور ہو جاتا ہے جتنا ( یہاں سے ) صنعاء تک کا فاصلہ ہے ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ، صرف محمد بن اسحاق کا معاملہ مختلف ہے اور اس کی توثیق کی گئی ہے ۔

سیدنا عبداللہ بن مسعود رضی اللہ عنہ فرماتے ہیں : ” آدمی کوئی بات کرتا ہے تاکہ اُس کے ذریعے اپنے ساتھ بیٹھے ہوئے لوگوں کو ہنسائے ، وہ وہاں سے کوئی چیز واپس لے کر نہیں لوٹتا ، لیکن وہ اس کلمے کی وجہ سے اس سے زیادہ بلندی سے گرے گا جتنا آسمان سے زمین تک کا فاصلہ ہے ۔ “
یہ روایت امام طبرانی نے نقل کی ہے اس کی سند میں ایک راوی عبدالوہاب بن رجاء ہے اور میں اس سے واقف نہیں ہوں اس روایت کے بقیہ رجال صحیح کے رجال ہیں ۔