مجمع الزوائد ومنبع الفوائد

سیدنا ابوبکر صدیق رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایسا جسم جنت میں داخل نہیں ہو گا جسے حرام کے ذریعے غذا فراہم کی گئی ہو ۔ “
یہ روایت امام ابویعلیٰ ، امام بزار نے اور امام طبرانی نے معجم اوسط میں نقل کی ہے ، امام ابویعلیٰ کے رجال ثقہ ہیں اور ان میں سے بعض کے بارے میں اختلاف پایا جاتا ہے ۔

سیدنا حذیفہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” وہ گوشت جنت میں داخل نہیں ہو گا ، جس کی نشوونما حرام کے ذریعے ہوئی ہو ، جہنم اس کی زیادہ حقدار ہو گی ۔ “
یہ روایت امام طبرانی نے معجم اوسط میں ایوب بن سوید کی ، ثوری سے نقل کردہ روایت کے طور پر نقل کی ہے اور یہ مستقیم ہے ابراہیم بن خلف رملی نامی راوی سے میں واقف نہیں ہوں اس روایت کے بقیہ رجال صحیح کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایسا گوشت جنت میں داخل نہیں ہو گا ، جس کی نشوونما حرام کے ذریعے ہوئی ہو ۔ “
یہ روایت امام طبرانی نے نقل کی ہے ، اس کی سند میں ایک راوی حسین بن قیس ہے اور وہ متروک ہے ۔