مجمع الزوائد ومنبع الفوائد

سیدنا نعمان بن بشیر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اپنے اور حرام کے درمیان ، حلال کا سترہ بنا لو “ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام طبرانی نے ایک طویل حدیث میں نقل کی ہے جس کے رجال صحیح کے رجال ہیں ، البتہ امام طبرانی کے استاد مقدام بن داؤد کا معاملہ مختلف ہے اور اس میں موجود ضعف کے باوجود اس کی توثیق کی گئی ہے ۔

سیدنا عمار بن یاسر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک حلال واضح ہے اور حرام واضح ہے اور ان دونوں کے درمیان کچھ مشتبہ امور ہیں ، جو شخص ان سے احتیاط کرے گا تو یہ اس کے دین کے لیے تکمیل کا باعث ہو گا اور جو شخص ان میں مبتلا ہو جائے گا تو عنقریب وہ کبیرہ گناہوں میں بھی مبتلا ہو سکتا ہے جیسے چراگاہ کے اردگرد چرنے والا ، ممکن ہے چراگاہ کے اندر بھی داخل ہو جائے اور ہر بادشاہ کی مخصوص چراگاہ ہوتی ہے ۔ “
یہ روایت امام ابویعلیٰ نے نقل کی ہے اس کی سند میں ایک راوی موسیٰ بن عبیدہ ہے اور وہ متروک ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” حلال واضح ہے اور حرام واضح ہے ، اور ان کے درمیان کچھ مشتبہ امور ہیں ، جو شخص اُن میں مبتلا ہو جائے تو وہ اس لائق ہو گا کہ وہ گناہگار ہو جائے اور جو شخص ان سے اجتناب کرے گا وہ اپنے دین کے لیے بہتر کرے گا جیسے چراگاہ کے پہلو میں چرنے والا ممکن ہے چراگاہ میں داخل ہو جائے ، ہر بادشاہ کی مخصوص چراگاہ ہوتی ہے ، اللہ تعالیٰ کی مخصوص چراگاہ ، اس کی حرام کی ہوئی اشیاء ہیں ۔ “
یہ روایت امام طبرانی نے نقل کی ہے ، اس کی سند میں ایک راوی سابق جزری ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا واثلہ بن اسقع رضی اللہ عنہ بیان کرتے ہیں : مسجد خیف میں ، میں نبی اکرم صلی اللہ علیہ وسلم کی زیارت کے لئے آیا تو آپ کے اصحاب نے مجھ سے فرمایا ہے : اے واثلہ ! ایک طرف ہو جاؤ ! ( یعنی نبی اکرم صلی اللہ علیہ وسلم کے آگے سے ہٹ جاؤ ) نبی اکرم صلی اللہ علیہ وسلم نے ارشاد فرمایا : اسے رہنے دو ! کیونکہ یہ سوال کرنے کے لیے آیا ہے ، راوی بیان کرتے ہیں : میں قریب ہوا ، میں نے عرض کی : یا رسول اللہ ! میرے ماں باپ آپ پر قربان ہوں ، آپ ہمیں احکام بیان کر دیں ، جنہیں ہم آپ کے بعد بھی اختیار کیے رکھیں ، نبی اکرم صلی اللہ علیہ وسلم نے ارشاد فرمایا : تمہارے نفس کو تمہیں حکم بیان کرنا چاہیئے ، راوی کہتے ہیں : میں نے عرض کی : یہ کیسے ہو سکتا ہے ؟ نبی اکرم صلی اللہ علیہ وسلم نے ارشاد فرمایا : ” جو چیز تمہیں مشکوک لگے ، تم اُسے چھوڑ کر اُس کی طرف چلے جاؤ جو تمہیں مشکوک نہ لگے ، خواہ حکم بیان کرنے والے تمہیں جو بھی حکم بیان کریں ۔ “ میں نے دریافت کیا : مجھے اُس کا علم کیسے ہو گا ؟ نبی اکرم صلی اللہ علیہ وسلم نے ارشاد فرمایا : ” تم اپنا ہاتھ اپنے دل پر رکھنا ، کیونکہ دل حلال کے ذریعے سکون حاصل کرتا ہے ، وہ حرام کے ذریعے سکون حاصل نہیں کرتا اور پرہیزگار مسلمان صغیرہ گناہ کو بھی چھوڑ دیتا ہے ، اس بات سے ڈرتے ہوئے کہ کہیں وہ کبیرہ گناہ میں مبتلا نہ ہو جائے ۔ “ میں نے عرض کی : میرے والد آپ پر قربان ہوں ، عصبیت کیا ہے ؟ آپ صلی اللہ علیہ وسلم نے فرمایا : یہ کہ آدمی ظلم میں اپنی قوم کی مدد کرے ۔ میں نے دریافت کیا : حریض کون ہے ؟ آپ صلی اللہ علیہ وسلم نے فرمایا : جو ناجائز طور پر آمدن حاصل کرنا چاہتا ہے ۔ میں نے دریافت کیا : پرہیزگار کون ہے ؟ آپ صلی اللہ علیہ وسلم نے فرمایا : جو مشتبہ چیز سے رک جائے ۔ میں نے دریافت کیا : مومن کون ہے ؟ آپ صلی اللہ علیہ وسلم نے فرمایا : جس سے لوگ اپنے اموال اور اپنی جانوں کے حوالے سے محفوظ ہوں ۔ میں نے دریافت کیا : مسلمان کون ہے ؟ آپ صلی اللہ علیہ وسلم نے فرمایا : جس کی زبان اور ہاتھ سے دوسرے مسلمان سلامت رہیں ۔ میں نے دریافت کیا : کون سا جہاد زیادہ فضیلت رکھتا ہے ؟ آپ صلی اللہ علیہ وسلم نے فرمایا : ظالم حکمران کے سامنے صحیح بات کہنا ۔
یہ روایت امام ابویعلیٰ اور امام طبرانی نے نقل کی ہے ، اس کی سند میں ایک راوی عبید بن قاسم ہے اور وہ متروک ہے ۔

سیدنا واثلہ رضی اللہ عنہ بیان کرتے ہیں : میں نے عرض کی : اے اللہ کے نبی ! آپ مجھے بتائیے ، نبی اکرم صلی اللہ علیہ وسلم نے فرمایا : اگر تم چاہو تو میں تمہیں اُس چیز کے بارے میں بتا دیتا ہوں جس کئے بارے میں دریافت کرنے کے لئے تم آئے ہو ، اور اگر تم چاہو تو تم سوال کر لو ، میں نے عرض کی : بلکہ آپ مجھے بتائیے یا رسول اللہ ! کیونکہ یہ چیز میرے لئے زیادہ اطمینان کا باعث ہو گی ، نبی اکرم صلی اللہ علیہ وسلم نے ارشاد فرمایا : تم یقین اور شک کے بارے میں سوال کرنے کے لئے آئے ہو ، میں نے عرض کی : ایسا ہی ہے ، نبی اکرم صلی اللہ علیہ وسلم نے ارشاد فرمایا : یقین وہ ہے جو سینے میں جم جائے اور جس سے دل مطمئن ہو ، خواہ حکم بیان کرنے والے تمہیں جو بھی حکم بیان کریں ، تم اُس چیز کو چھوڑ دو جو تمہیں شک میں مبتلا کرے اور اُس کی طرف جاؤ جو تمہیں شک میں مبتلا نہ کرے ، کیونکہ بھلائی اطمینان ہوتا ہے اور شک بے اطمینانی ہوتی ہے ، جب تمہیں شک ہو تو تم چھوڑ دو ۔ ۔ ۔ ۔ ۔ ۔ “ اُس کے بعد راوی نے حسب سابق حدیث ذکر کی ہے ۔
یہ روایت امام طبرانی نے نقل کی ہے اس کی سند میں ایک راوی اسماعیل بن عبداللہ کندی ہے اور وہ ضعیف ہے ۔

سیدنا وابصہ بن معبد اسدی رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، میرا ارادہ یہ تھا کہ میں ہر نیکی اور گناہ کے بارے میں آپ سے دریافت کروں گا ، جب میں آپ کی خدمت میں حاضر ہوا تو اس وقت آپ کچھ لوگوں کے درمیان موجود تھے جو آپ کے اردگرد بیٹھے ہوئے تھے ، میں ان کو پھلانگ کر آپ کے قریب ہونے لگا تو ان میں سے کسی نے مجھے ڈانٹا اور یہ کہا: اے وابصہ ! اللہ کے رسول سے دور رہو ! میں نے کہا: میں یہ چاہتا ہوں کہ ان کے قریب ہو جاؤں ، نبی اکرم صلی اللہ علیہ وسلم نے ارشاد فرمایا : وابصہ کو رہنے دو ! اے وابصہ ! تم میرے قریب آ جاؤ ، نبی اکرم صلی اللہ علیہ وسلم نے مجھے قریب آنے کا کہا: ، یہاں تک کہ میں آپ کے سامنے آ گیا ، نبی اکرم صلی اللہ علیہ وسلم نے فرمایا : کیا تم مجھ سے سوال کرو گے ؟ یا میں تمہیں بتا دوں ؟ میں نے عرض کی : جی نہیں ! بلکہ آپ مجھے بتا دیں ، نبی اکرم صلی اللہ علیہ وسلم نے ارشاد فرمایا : تم نیکی اور گناہ کے بارے میں سوال کرنے کے لئے آئے ہو ، میں نے عرض کی : جی ہاں ! پھر نبی اکرم صلی اللہ علیہ وسلم نے اپنی پوریں اکٹھی کیں اور ان کے ذریعے میرے سینے پر ہاتھ مار کر فرمایا : ” نیکی وہ ہے جس کے بارے میں نفس مطمئن ہو اور جس کے بارے میں دل مطمئن ہو اور گناہ وہ ہے جو نفس میں کھٹکے اور نفس تردد کا شکار ہو ، خواہ لوگ تمہیں جو بھی حکم بیان کریں ۔ “
یہ روایت امام طبرانی نے نقل کی ہے امام أحمد نے اسے اختصار کے ساتھ اس صحابی کے حوالے سے نقل کیا ہے ، امام طبرانی کی دو اسناد میں سے ایک کے رجال ثقہ ہیں ۔

سیدنا ابوامامہ رضی اللہ عنہ بیان کرتے ہیں : ایک شخص نے عرض کی : یا رسول اللہ ! گناہ کیا ہے ؟ نبی اکرم صلی اللہ علیہ وسلم نے ارشاد فرمایا : ” جو چیز تمہارے سینے میں کھٹکے تم اُسے چھوڑ دو ، اس نے دریافت کیا : ایمان کیا ہے ؟ نبی اکرم صلی اللہ علیہ وسلم نے ارشاد فرمایا : جس شخص کو اپنی برائی بری لگے اور اپنی اچھائی اچھی لگے وہ مومن ہے ۔ “
یہ روایت امام طبرانی نے نقل کی ہے اور امام أحمد نے ان صحابی کے حوالے سے اختصار کے ساتھ نقل کی ہے اور طبرانی کے رجال صحیح کے رجال ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس چیز کو چھوڑ دو ! جو تمہیں شک میں مبتلا کرتی ہے اور اس کی طرف جاؤ ! جو تمہیں شک میں مبتلا نہ کرئے ۔ “
یہ روایت امام طبرانی نے معجم صغیر میں نقل کی ہے اس کی سند میں ایک راوی عبداللہ بن ابورومان ہے اور وہ ضعیف ہے ۔