مجمع الزوائد ومنبع الفوائد

سیدنا ابومالک اشعری رضی اللہ عنہ بیان کرتے ہیں : ” میں نے عرض کی : یا رسول اللہ ! نیکی کی تکمیل کیا ہے ؟ نبی اکرم صلی اللہ علیہ وسلم نے ارشاد فرمایا : یہ کہ تم پوشیدہ طور پر بھی ، علانیہ والا عمل کرو ۔ “
یہ روایت امام طبرانی نے نقل کی ہے اس کی سند میں ایک راوی عبدالرحمن بن زیاد بن انعم ہے اور وہ ضعیف ہے لیکن وہ جان بوجھ کر غلط بیانی نہیں کرتا ہے ، اس روایت کے بقیہ رجال کی توثیق کی گئی ہے اگرچہ ان میں سے بعض میں ضعف پایا جاتا ہے ۔

سیدنا ابوعامر سکونی رضی اللہ عنہ بیان کرتے ہیں : میں نے دریافت کیا : یا رسول اللہ ! نیکی کی تکمیل کیا ہے ؟ نبی اکرم صلی اللہ علیہ وسلم نے ارشاد فرمایا : ” یہ کہ تم پوشیدہ طور پر بھی وہی عمل کرو جو علانیہ طور پر کرتے ہو“ ۔
یہ روایت امام طبرانی نے نقل کی ہے اس کی سند میں بھی ایک راوی عبدالرحمن بن زیاد ہے ۔

سیدنا ابوہریرہ رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : میں ایک عمل کرتا ہوں ، جس کی اطلاع کسی کو مل جاتی ہے اور یہ چیز مجھے اچھی لگتی ہے ؟ تو نبی اکرم صلی اللہ علیہ وسلم نے ارشاد فرمایا : ” تمہیں دو اجر ملیں گے ، ایک پوشیدہ طور پر کرنے کا اجر اور ایک علانیہ کا اجر ۔ “
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔