مجمع الزوائد ومنبع الفوائد

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” دنیا مومن کے لیے قید خانہ اور قحط سالی ہے ، جب وہ دنیا سے جدا ہوتا ہے تو قید خانے اور قحط سالی سے جدا ہوتا ہے ۔ “
یہ روایت امام أحمد نے نقل کی ہے امام طبرانی نے اختصار کے ساتھ نقل کی ہے ، امام أحمد کے رجال صحیح کے رجال ہیں ، صرف عبدالله بن جنادہ کا معاملہ مختلف ہے اور وہ ثقہ ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” دنیا مومن کے لیے قید خانہ ہے اور کافر کے لیے جنت ہے ۔ “
یہ روایت امام بزار نے دو اسناد کے ساتھ نقل کی ہے ان دونوں میں سے ایک سند ضعیف ہے اور دوسری میں راویوں کی ایک ایسی جماعت ہے جن سے میں واقف نہیں ہوں ۔

سیدنا سلمان رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” دنیا مومن کے لیے قید خانہ ہے اور کافر کے لیے جنت ہے ۔ “
یہ روایت امام طبرانی نے نقل کی ہے اس کی سند میں ایک راوی سعید بن محمد وراق ہے اور وہ متروک ہے ، امام بزار نے بھی اسے اسی طرح نقل کیا ہے ۔

سیدنا قتادہ بن نعمان بن زید رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جبرائیل میرے پاس سب سے زیادہ خوبصورت شکل و صورت میں نازل ہوئے اور بولے : بے شک سلامتی عطا کرنے والی ذات نے آپ کو سلام بھیجا ہے ، اے سیدنا محمد ( صلی اللہ علیہ وسلم ) ! اور اس نے یہ فرمایا ہے : کہ میں نے دنیا کی طرف یہ وحی کی ہے کہ تم میرے دوستوں کے لئے کڑوی ، مشکلات والی ، تنگ اور سخت ہو جاؤ تاکہ وہ میری بارگاہ میں حاضری کو پسند کریں اور تم میرے دشمنوں کے لئے کشادگی والی ، آسانی والی اور پاکیزہ ہو جاؤ تاکہ وہ میری بارگاہ میں حاضری کو ناپسند کریں ، بے شک میں نے اسے ( یعنی دنیا کو ) اپنے دوستوں کے لیے قید خانہ اور اپنے دشمنوں کے لیے جنت بنایا ہے ۔
یہ روایت امام طبرانی نے نقل کی ہے اس کی سند میں راویوں کی ایک ایسی جماعت ہے جن سے میں واقف نہیں ہوں ۔