مجمع الزوائد ومنبع الفوائد

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب بھی دو آدمی اللہ تعالیٰ کی خاطر ایک دوسرے سے محبت رکھتے ہیں ، تو ان دونوں میں سے اللہ تعالی کے نزدیک زیادہ محبوب وہ ہوتا ہے جو اپنے ساتھی سے زیادہ محبت رکھتا ہے ۔ “
یہ روایت امام طبرانی نے معجم اوسط میں نقل کی ہے امام ابویعلیٰ اور امام بزار نے اس کی مانند روایت نقل کی ہے ابویعلیٰ اور بزار کے رجال صحیح کے رجال ہیں صرف مبارک بن فضالہ کا معاملہ مختلف ہے اس میں موجود ضعف کے باوجود ، ایک سے زیادہ افراد نے اس کی توثیق کی ہے ۔

سیدنا ابودرداء رضی اللہ عنہ ” مرفوع “ حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا ہے : ) جب بھی دو آدمی غیر موجودگی میں ایک دوسرے کے ساتھ اللہ تعالیٰ کی خاطر محبت رکھتے ہیں ، تو ان دونوں میں سے اللہ تعالیٰ کے نزدیک زیادہ محبوب وہ ہوتا ہے جو اپنے ساتھی سے زیادہ محبت رکھتا ہو ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، صرف معافی بن سلیمان کا معاملہ مختلف ہے اور وہ ثقہ ہے ۔