مجمع الزوائد ومنبع الفوائد

سیدنا ابوعسیب رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم رات کے وقت باہر تشریف لائے ، آپ کا گزر میرے پاس سے ہوا آپ نے مجھے بلایا میں نکل کر آپ کے پاس آیا پھر آپ کا گزر سیدنا ابوبکر رضی اللہ عنہ کے پاس سے ہوا آپ نے انہیں بلایا وہ نکل کر آپ کے پاس آ گئے پھر آپ کا گزر سیدنا عمر رضی اللہ عنہ کے پاس سے ہوا آپ نے انہیں بلایا ، وہ نکل کر آپ کے پاس آ گئے ، نبی اکرم صلی اللہ علیہ وسلم چلتے رہے ، یہاں تک کہ آپ ایک انصاری کے باغ میں داخل ہو گئے آپ نے باغ کے مالک سے کہا: ہمیں تازہ کھجوریں کھلاؤ وہ کھجوروں کا ایک گچھا لے کے آیا اور اس کو آگے رکھا ، نبی اکرم صلی اللہ علیہ وسلم اور آپ کے اصحاب نے انہیں کھانا شروع کیا ، پھر نبی اکرم صلی اللہ علیہ وسلم نے ٹھنڈا پانی منگوایا وہ پیا گیا ، پھر نبی اکرم صلی اللہ علیہ وسلم نے ارشاد فرمایا : ” قیامت کے دن تم سے ان کے بارے میں حساب لیا جائے گا ۔ “ سیدنا عمر رضی اللہ عنہ نے وہ گچھا پکڑا اور اسے زمین پر مارا ، یہاں تک کہ اس کی کھجوریں نبی اکرم صلی اللہ علیہ وسلم کی طرف بکھر گئیں ، پھر انہوں نے عرض کی : یا رسول اللہ ! کیا قیامت کے دن ہم سے ان کے بارے میں حساب لیا جائے گا ؟ نبی اکرم صلی اللہ علیہ وسلم نے ارشاد فرمایا : جی ہاں ! البتہ تین چیزوں کا معاملہ مختلف ہے ، وہ کپڑا جس کے ذریعے آدمی اپنی شرمگاہ کو ڈھانپ لیتا ہے یا روٹی کا وہ ٹکڑا جس کے ذریعے وہ اپنی بھوک کو ختم کرتا ہے یا وہ مکان کہ گرمی یا سردی سے بچنے کے لئے جس میں وہ داخل ہوتا ہے ( یعنی اس میں رہتا ہے ) ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تہبند کے علاوہ جو لباس ہے ، دیوار کا سایہ اور پانی کا مٹکا ، یہ اضافی چیزیں ہیں ، قیامت کے دن بندے سے ان کے بارے میں حساب لیا جائے گا ( راوی کو شک ہے یا شاید یہ الفاظ ہیں ) ان کے بارے میں سوال کیا جائے گا ۔ “
یہ روایت امام بزار نے نقل کی ہے اس کی سند میں ایک راوی لیث بن ابوسلیم ہے جس کے ضعیف ہونے کے باوجود اس کی توثیق کی گئی ہے اس روایت کے بقیہ رجال صبح کے رجال ہیں ، صرف قاسم بن محمد بن یحیی مروزی کا معاملہ مختلف ہے اور وہ ثقہ ہے ۔