مجمع الزوائد ومنبع الفوائد

سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص دنیا سے محبت رکھتا ہے ، وہ آخرت کا نقصان کرتا ہے اور جو شخص آخرت سے محبت رکھتا ہے ، وہ دنیا کا نقصان کرتا ہے ، تو تم باقی رہ جانے والی چیز ( یعنی آخرت ) کو ، اُس ( یعنی دنیا ) پر ترجیح دو ، جو فنا ہو جائے گی ۔ “
یہ روایت امام أحمد ، امام بزار اور امام طبرانی نے نقل کی ہے اور ان کے رجال ثقہ ہیں ۔

شریح بن عبید حضرمی بیان کرتے ہیں : جب سیدنا ابومالک اشعری رضی اللہ عنہ کی وفات کا وقت قریب آیا ، تو انہوں نے فرمایا : اے اشعر قبیلے کے سننے والو ! تم میں سے موجود افراد ، غیر موجود تک اس بات کی تبلیغ کر دیں ، میں نے اللہ تعالیٰ کے رسول صلی اللہ علیہ وسلم کو یہ ارشاد فرماتے ہوئے سنا ہے : ” دنیا کی مٹھاس ، آخرت کی کڑواہٹ ہے ، اور دنیا کی کڑواہٹ ، آخرت کی مٹھاس ہے ۔ “
یہ روایت امام أحمد اور امام طبرانی نے نقل کی ہے اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس کے دل میں دنیا کی محبت ہو ، اسے تین چیزیں لاحق ہو جاتی ہیں ، ایسی بدنصیبی جس کی مشقت ختم نہیں ہوتی ، ایسی حرص جو خوشحالی تک نہیں پہنچتی ، اور ایسی امید جس کی کوئی آخری حد نہیں ہوتی ، دنیا طالب بھی ہے اور مطلوب بھی ، جو شخص دنیا طلب کرتا ہے اسے آخرت تلاش کرتی ہے ، یہاں تک کہ موت اس کے پاس آ کر اسے گرفت میں لے لیتی ہے ، اور جو شخص آخرت طلب کرتا ہے اسے دنیا تلاش کرتی ہے ، یہاں تک کہ وہ دنیا میں سے اپنا پورا رزق وصول کر لیتا ہے ۔ “
یہ روایت امام طبرانی نے اپنے استاد جبرون بن عیسیٰ مغربی کے حوالے سے ، یحیی بن سلیمان جفری کے حوالے سے فضیل بن عیاض سے نقل کی ہے ، میں جبرون سے واقف نہیں ہوں ، جہاں تک یحیی کا تعلق ہے تو امام ذہبی نے ” میزان الاعتدال “ میں یحیی بن سلیمان جعفی کے حالات کے آخر میں یہ بات ذکر کی ہے : جہاں تک اس کے ہم نام یحیی بن سلیمان جفری کا تعلق ہے ، تو مجھے اس کے بارے میں کسی حرج کا علم نہیں ہے ، اس کے بعد انہوں نے یحیی بن سلیمان قرشی کا ذکر کیا ہے ، ابونعیم نے کہا: ہے : اس کے بارے میں کلام کیا گیا ہے اس کا ذکر ابن جوزی نے کیا ہے اگر تو یہ دو افراد ہیں ، تو پھر جفری ثقہ ہے اور یہ حدیث ، خطبہ کی شرط کے مطابق صحیح ہے باقی اللہ بہتر جانتا ہے ، اس روایت کے بقیہ رجال صحیح کے رجال ہیں ۔

ہزیل بن شرحبیل بیان کرتے ہیں : سیدنا عبداللہ بن مسعود رضی اللہ عنہ نے فرمایا : ” جو شخص آخرت کا ارادہ کرتا ہے ، وہ دنیا کا نقصان کرتا ہے ، اور جو شخص دنیا کا ارادہ رکھتا ہے وہ آخرت کا نقصان کرتا ہے اور میں ان لوگوں کو یہ ہدایت کرتا ہوں کہ وہ باقی ( رہ جانے والی آخرت ) کے لئے ، فانی ( دنیا ) کا نقصان برداشت کر لیں ۔ “ سیدنا عبداللہ بن مسعود رضی اللہ عنہ نے یہ بھی فرمایا : ” تم لوگ ایک ایسے زمانے میں ہو ، جس میں علماء بکثرت ہیں اور خطیب کم ہیں ، دینے والے زیادہ ہیں اور مانگنے والے کم ہیں ، تم لوگ نماز طویل ادا کرو اور خطبہ مختصر دو ، بے شک بعض بیان جادو ہوتے ہیں ، تمہارے بعد ایک ایسا زمانہ آئے گا ، جس میں خطیب زیادہ ہوں گے ، علماء کم ہوں گے ، مانگنے والے زیادہ ہوں گے ، دینے والے کم ہوں گے “” “” ۔
یہ روایت امام طبرانی نے دو اسناد کے ساتھ نقل کی ہے ، ان دونوں میں سے ایک کے رجال ، قیس کے علاوہ صحیح کے رجال ہیں ۔