مجمع الزوائد ومنبع الفوائد

سیدنا ابوہریرہ رضی اللہ عنہ یا شاید سیدنا ابوسعید رضی اللہ عنہ کے حوالے سے
یہ روایت منقول ہے ، یہ شک اعمش نامی راوی کو ہے ، وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ہر دن اور رات میں ، اللہ تعالیٰ کی طرف سے لوگوں کو جہنم سے آزاد کیا جاتا ہے ، اُن میں سے ہر ایک کے لئے ایک مستجاب دعا ہوتی ہے ۔ “
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر جمعہ کے دن میں ، اللہ تعالیٰ کی طرف سے چھ سو ہزار افراد کو آزاد کیا جاتا ہے ، انہیں جہنم سے آزاد کیا جاتا ہے ، ان میں سے ہر ایک کے لئے جہنم واجب ہو چکی ہوتی ہے ۔ “
یہ روایت امام ابویعلیٰ نے نقل کی ہے ، اس کی سند میں ایک راوی ازور ابوغالب بصری ہے اور وہ ضعیف ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دنیا کی گھڑیوں میں سے ایک گھڑی ( شاید یہاں ایک گھڑی سے مراد ، ایک پہر ہے ) میں ، اللہ تعالیٰ کی طرف سے 600 ہزار لوگوں کو آزاد کیا جاتا ہے ، جنہیں وہ جہنم سے آزاد کرتا ہے ، وہ سب ایسے ہوتے ہیں کہ ان کے لئے جہنم واجب ہو چکی ہوتی ہے ۔ “
یہ روایت امام ابویعلیٰ نے اپنے استاد محمد بن بحر کے حوالے سے ابومیمون سے نقل کی ہے جو اہل بصرہ کے بزرگ ہیں اور میں ان دونوں سے واقف نہیں ہوں ، اس روایت کے بقیہ رجال ” صحیح “ کے رجال ہیں ۔