مجمع الزوائد ومنبع الفوائد

سیدنا زبیر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص یہ پسند کرتا ہو کہ اسے اس کا صحیفہ خوش کرے ، تو اس شخص کو اس صحیفے میں کثرت کے ساتھ استغفار شامل کرنا چاہیے ۔ “
یہ روایت امام طبرانی نے معجم اوسط میں نقل کی ہے اور اس کے رجال ” ثقہ “ ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دونوں محافظ فرشتے ایک دن میں جو نوٹ کرتے ہیں ، اسے اللہ تعالیٰ کی بارگاہ میں پیش کرتے ہیں ، اگر اللہ تعالیٰ اس صحیفے کے آغاز میں اور اختتام پر استغفار دیکھ لے ، تو اللہ تعالیٰ یہ فرماتا ہے : ” اس صحیفے کے دونوں کناروں کے درمیان میں موجود اُمور کے حوالے سے ، میں نے اپنے بندے کی مغفرت کر دی ۔ “
یہ روایت امام بزار نے نقل کی ہے اس کی سند میں ایک راوی تمام بن نجیح ہے جسے یحیی بن معین اور دیگر حضرات نے ثقہ قرار دیا ہے ، جبکہ امام بخاری رحمہ اللہ اور دیگر حضرات نے اسے ضعیف کہا: ہے ، اس روایت کے بقیہ رجال ” صحیح “ کے رجال ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک ” میں “ ایک دن میں ، اللہ تعالیٰ سے ستر مرتبہ مغفرت طلب کرتا ہوں ۔ “

ایک روایت میں : ” میں مغفرت طلب کرتا ہوں “ کی جگہ ” میں توبہ کرتا ہوں“ کے الفاظ ہیں ۔ یہ تمام روایات امام طبرانی نے معجم اوسط میں نقل کی ہیں ، ان کے ساتھ امام ابویعلیٰ اور امام بزار نے بھی انہیں نقل کیا اور ” میں مغفرت طلب کرتا ہوں “ کے الفاظ والی روایت کی سند حسن ہے ، اور ” میں اللہ تعالیٰ کی بارگاہ میں توبہ کرتا ہوں“ کے الفاظ والی روایت میں امام أحمد اور امام ابویعلیٰ کی دو استاد کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں ستر مرتبہ اللہ تعالیٰ سے مغفرت طلب کرتا ہوں ، اور اس کی بارگاہ میں توبہ کرتا ہوں ۔ “

ایک روایت میں یہ الفاظ ہیں : ” ستر مرتبہ سے زیادہ ۔ “

ایک روایت میں یہ الفاظ ہیں : ” 100 مرتبہ ۔ “ یہ تمام روایات امام طبرانی نے معجم اوسط میں نقل کی ہیں اور ان کی سند حسن ہے ۔

سیدنا انس بن مالک رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! میں ایک بدزبان شخص ہوں اور میری زیادہ تر بدزبانی اپنے اہل خانہ کے خلاف ہوتی ہے ، نبی اکرم صلی اللہ علیہ وسلم نے ارشاد فرمایا : تم استغفار کیوں نہیں کرتے ہو ؟ ” میں “ ایک دن اور ایک رات میں ، ایک سو مرتبہ اللہ تعالیٰ سے مغفرت طلب کرتا ہوں ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی کثیر بن سلیم ہے اور وہ ضعیف ہے ۔

سیدنا ابوموسی اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میں دن میں ، ایک سو مرتبہ اللہ تعالیٰ سے مغفرت طلب کرتا ہوں ، اور اس کی بارگاہ میں توبہ کرتا ہوں ۔ “
( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے نقل کی ہے تاہم انہوں نے لفظ ” 100 مرتبہ “ نقل نہیں کیا ہے ۔
یہ روایت امام طبرانی نے دو اسناد کے ساتھ نقل کی ہے ، ان دونوں میں سے ایک کے رجال ” صحیح “ کے رجال ہیں ۔

سیدنا عبدالرحمن بن دلہم رضی اللہ عنہ بیان کرتے ہیں : ایک شخص نے عرض کی : یا رسول اللہ ! آپ مجھے کسی ایسے عمل کی تعلیم دیجئے جس کے ذریعے میں جنت میں داخل ہو جاؤں ، نبی اکرم صلی اللہ علیہ وسلم نے فرمایا : تم غضبناک نہ ہونا ، تمہیں جنت مل جائے گی ، اس نے عرض کی : یا رسول اللہ ! مجھے مزید کچھ بتائیے ! نبی اکرم صلی اللہ علیہ وسلم نے فرمایا : تم سورج غروب ہونے سے پہلے دن میں ، ستر مرتبہ اللہ تعالیٰ سے مغفرت طلب کرنا ، اللہ تعالیٰ تمہارے 70 سال کے گناہوں کی مغفرت کر دے گا ، اس نے کہا: میرے تو ستر سال کے گناہ نہیں ہیں ، نبی اکرم صلی اللہ علیہ وسلم نے فرمایا : تمہارے باپ کے ( بھی گناہوں کی مغفرت کر دے گا ) اس نے کہا: میرے باپ کے بھی ستر سال کے گناہ نہیں ہیں ، نبی اکرم صلی اللہ علیہ وسلم نے فرمایا : تمہارے گھر والوں کے ( گناہوں کی مغفرت کر دے گا ) اس نے کہا: میرے گھر والے ہی نہیں ہیں ، نبی اکرم صلی اللہ علیہ وسلم نے فرمایا : تو تمہارے پڑوسیوں کے ( گناہوں کی مغفرت کر دے گا ) ۔
یہ روایت امام طبرانی نے نقل کی ہے ، اور اس کی سند میں ایسا راوی ہے ، جس سے میں واقف نہیں ہوں ۔