مجمع الزوائد ومنبع الفوائد

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بائیں طرف والا فرشتہ خطاکار ( راوی کو شک ہے ، یا شاید یہ الفاظ ہیں : ) برائی کرنے والے ، مسلمان بندے سے قلم کو چھ پہر تک اٹھائے رکھتا ہے ( یعنی وہ چھ پہر تک اس کی برائی نوٹ نہیں کرتا ) اگر وہ بندہ ندامت کا شکار ہو ، اور اللہ تعالیٰ سے اس گناہ کے حوالے سے مغفرت مانگ لے تو وہ اس گناہ کو نوٹ نہیں کرتا ، ورنہ وہ اسے ایک گناہ کے طور پر نوٹ کرتا ہے ۔ “
یہ روایت امام طبرانی نے مختلف اسانید کے ساتھ نقل کی ہے ، جن میں سے ایک کے رجال کی توثیق کی گئی ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” دائیں طرف والا فرشتہ بائیں طرف والے فرشتے پر امین ہوتا ہے ، جب بندہ کوئی نیکی کرتا ہے تو دائیں طرف والا فرشتہ اسے دس گنا ( نیکیوں ) کے طور پر نوٹ کرتا ہے ، اور اگر بندہ کسی برائی کا ارتکاب کرے ، اور بائیں طرف والا فرشتہ اسے نوٹ کرنے لگے ، تو دائیں طرف والا فرشتہ اس سے یہ کہتا ہے : تم اس کو نوٹ کرنے سے رک جاؤ ، تو وہ ( بائیں طرف والا فرشتہ ) اس برائی کے حوالے سے رُک جاتا ہے ، اگر بندہ مغفرت طلب کر لے ، تو اس برائی کو نوٹ نہیں کیا جاتا ، اور اگر بندہ خاموش رہے ( یعنی مغفرت طلب نہ کرے ) تو اس کے خلاف ( اس برائی کو ایک برائی کے طور پر ) نوٹ کیا جاتا ہے ۔ “
یہ روایت امام طبرانی نے نقل کی ہے ، اس کی سند میں ایک راوی جعفر بن زبیر ہے ، اور وہ کذاب ہے ، لیکن
یہ روایت اس سے پہلے والی روایت کے موافق ہے ، اور اس میں کوئی بھی چیز اضافی نہیں ہے ، صرف یہ بات اضافی ہے کہ نیکی کو دس گنا نوٹ کیا جاتا ہے ، اور قرآن و سنت اس بات پر دلالت کرتے ہیں ( کہ ایسا ہوتا ہے ) ۔

سیده ام عصمہ عوصیہ ، جن کا تعلق قیس قبیلے سے ہے ، وہ بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جب بندہ کسی گناہ کا ارتکاب کرتا ہے تو اس کے لئے مامور فرشتہ اس گناہ کو نوٹ کرنے سے تین پہر تک رکا رہتا ہے ، اگر وہ بندہ ان گھڑیوں ( یعنی تین پہر ) کے دوران اللہ تعالیٰ سے اس گناہ کی مغفرت طلب کر لے تو قیامت کے دن وہ گناہ اس کے ذمہ عائد نہیں کیا جائے گا ۔ “
یہ روایت امام طبرانی نے نقل کی ہے ، اس کی سند میں ایک راوی ابومہدی سعید بن سنان ہے اور وہ متروک ہے ۔