مجمع الزوائد ومنبع الفوائد

سیدنا عبداللہ بن عمرو رضی اللہ عنہ فرماتے ہیں : ” جو شخص مرنے سے ایک سال پہلے توبہ کر لے ، اس کی توبہ بھی قبول ہو جاتی ہے ، جو شخص مرنے سے ایک ماہ پہلے توبہ کر لے ، اس کی توبہ بھی قبول ہو جاتی ہے ۔ “ راوی بیان کرتے ہیں : یہاں تک کہ انہوں نے ایک دن کا ذکر کیا ، یہاں تک کہ ایک پہر کا ذکر کیا ، یہاں تک کہ تھوڑی سی دیر کا ذکر کیا ۔ راوی بیان کرتے ہیں : ایک شخص نے دریافت کیا : اس بارے میں آپ کی کیا رائے ہے ؟ کہ اگر وہ شخص کافر ہو اور پھر مسلمان ہو جائے ؟ انہوں نے فرمایا : میں تمہیں وہ چیز بیان کر رہا ہوں ، جو میں نے نبی اکرم صلی اللہ علیہ وسلم کی زبانی سنی ہے ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ، اس روایت کے بقیہ رجال ” ثقہ “ ہیں ۔

امام طبرانی نے معجم اوسط میں ان صحابی کے حوالے سے
یہ روایت نقل کی ہے ، وہ بیان کرتے ہیں : میں نے نبی اکرم صلی اللہ علیہ وسلم کو یہ فرماتے ہوئے سنا ہے : ” جو شخص مرنے سے اتنی دیر پہلے توبہ کر لے ، جتنی دیر میں اونٹنی کا دودھ دوہ لیا جاتا ہے تو اللہ تعالیٰ اس کی توبہ قبول کر لیتا ہے ۔ “

عبدالرحمن بیلمانی بیان کرتے ہیں : نبی اکرم صلی اللہ علیہ وسلم کے اصحاب سے تعلق رکھنے والے چار افراد اکٹھے ہوئے : اُن میں سے ایک صاحب نے یہ بات بیان کی : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ اپنے بندے کی توبہ اس کے مرنے سے ایک دن پہلے بھی قبول کر لیتا ہے ۔ “ دوسرے صحابی نے دریافت کیا : کیا آپ نے خود نبی اکرم صلی اللہ علیہ وسلم کی زبانی یہ بات سنی ہے ؟ انہوں نے جواب دیا : جی ہاں ! تو دوسرے صحابی نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ اپنے بندے کی توبہ ، اُس کے مرنے سے نصف دن پہلے بھی قبول کر لیتا ہے ۔ “ تیسرے صحابی نے دریافت کیا : کیا آپ نے خود نبی اکرم صلی اللہ علیہ وسلم کی زبانی یہ بات سنی ہے ؟ انہوں نے جواب دیا : جی ہاں ! تو ان تیسرے صحابی نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ اپنے بندے کی توبہ اُس کے مرنے سے ، اتنا پہلے بھی قبول کر لیتا ہے ( جتنا سورج نکلنے کے بعد ) دن چڑھے کا وقت ہوتا ہے ۔ “ چوتھے صحابی نے دریافت کیا : کیا آپ نے خود نبی اکرم صلی اللہ علیہ وسلم کی زبانی یہ بات سنی ہے ؟ انہوں نے جواب دیا : جی ہاں ! تو ان چوتھے صحابی نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ اپنے بندے کی توبہ اُس وقت بھی قبول کر لیتا ہے جب اُس پر نزع کا عالم طاری نہ ہوا ہو ۔ “
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ، صرف عبدالرحمن کا معاملہ مختلف ہے اور وہ ثقہ ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو مومن بندہ مرنے سے ایک ماہ پہلے اللہ تعالیٰ کی بارگاہ میں توبہ کر لیتا ہے ، اللہ تعالیٰ اس کی توبہ کو قبول کرتا ہے ، اگر وہ اس سے بھی کم عرصہ پہلے کر لے ، مرنے سے ایک دن پہلے کر لے ، یا ایک پہر پہلے کر لے ، اور اللہ تعالیٰ اس کی توبہ اور اس کے اخلاص سے واقف ہو ، تو اللہ تعالیٰ اس کی توبہ قبول کر لیتا ہے ۔ “ ( علامہ ہیثمی فرماتے ہیں : ) میں یہ کہتا ہوں : امام ترمذی نے ان صحابی کے حوالے سے
یہ روایت نقل کی ہے : ” بے شک اللہ تعالیٰ بندے کی توبہ قبول کر لیتا ہے ، جبکہ اُس پر نزع کا عالم طاری نہ ہوا ہو ۔ “
یہ روایت امام طبرانی نے نقل کی ہے ، اس کی سند میں ایک راوی یحیی بن عبداللہ بابلتی ہے اور وہ ضعیف ہے ۔

سیدنا عبداللہ بن سلام رضی اللہ عنہ فرماتے ہیں : کیا میں تمہیں ” نبی مرسل “ یا ” نازل شدہ کتاب “ کے حوالے سے بات بیان نہ کروں ؟ ( وہ بات یہ ہے : ) ” اگر بندہ سارے گناہ کر لے ، اور پھر وہ مرنے سے ایک دن پہلے اللہ تعالیٰ کی بارگاہ میں توبہ کر لے ، تو اللہ تعالیٰ اس کی توبہ قبول کر لیتا ہے ۔ “
یہ روایت امام طبرانی نے نقل کی ہے اور اس کے رجال ” ثقہ “ ہیں ۔

سیدنا عبداللہ بن سلام رضی اللہ عنہ فرماتے ہیں : کیا میں تم لوگوں کو ” نازل شدہ کتاب “ یا ” نبی مرسل “ کے حوالے سے بات بیان کروں : ( وہ بات یہ ہے : ) ” جو شخص اس بیماری کا شکار ہونے سے پہلے توبہ کر لیتا ہے ، جس بیماری میں اس کا انتقال ہو جائے ، تو اس کی توبہ قبول ہو جاتی ہے ، اور ایسا اُس وقت تک رہے گا جب تک سورج مغرب سے طلوع نہیں ہوتا ۔ “
یہ روایت امام طبرانی نے ابوفائد کی ربعی سے نقل کردہ روایت کے طور پر نقل کی ہے ، اور میں ابوفائد سے واقف نہیں ہوں ، اس روایت کے بقیہ رجال ” صحیح “ کے رجال ہیں ۔