مجمع الزوائد ومنبع الفوائد

سیدنا علی بن ابوطالب رضی اللہ عنہ فرماتے ہیں : ” ہر دعاء محجوب رہتی ہے ، جب تک سیدنا محمد صلی اللہ علیہ وسلم اور سیدنا محمد صلی اللہ علیہ وسلم کی آل پر درود نہ بھیجا جائے ۔ “
یہ روایت امام طبرانی نے معجم اوسط میں نقل کی ہے اور اس کے رجال ” ثقہ “ ہیں ۔ اس سے پہلے باب کے آغاز میں سیدنا عبداللہ بن مسعود رضی اللہ عنہ کی نقل کردہ حدیث کر چکی ہے اور وہ عمدہ حدیث ہے ، اور سیدنا جابر رضی اللہ عنہ اور سیدنا فضالہ بن عبید رضی اللہ عنہ کی نقل کردہ احادیث بھی گزر چکی ہیں ۔

سیدنا ابی بن کعب رضی اللہ عنہ بیان کرتے ہیں : ایک شخص نے عرض کی : یا رسول اللہ ! اس بارے میں آپ کی کیا رائے ہے ؟ کہ اگر میں تمام تر نفل عبادت کے دوران ، آپ پر درود بھیجتا رہوں ؟ نبی اکرم صلی اللہ علیہ وسلم نے ارشاد فرمایا : ” اس صورت میں اللہ تعالیٰ دنیا اور آخرت کی تمام پریشانیوں کے حوالے سے تمہاری کفایت کر دے گا ۔ “
( علامہ ہیثمی فرماتے ہیں : ) میں یہ کہتا ہوں :
یہ روایت امام ترمذی نے نقل کی ہے اور ان کی روایت کے الفاظ یہ ہیں : ” اس صورت میں تمہاری پریشانی کی کفایت ہو جائے گی ، اور تمہارے گناہ کی مغفرت ہو جائے گی ۔ “
یہ روایت امام أحمد نے نقل کی ہے اور اس کی سند عمدہ ہے ۔

سیدنا ابوہریرہ رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کے پاس آیا اور بولا: یا رسول اللہ ! کیا میں اپنی نفلی عبادت کا نصف حصہ آپ کے لئے دعا کرنے کے لیے مخصوص کر دوں ؟ نبی اکرم صلی اللہ علیہ وسلم نے فرمایا : جو تم چاہو ، اس نے دریافت کیا : کیا میں ایک تہائی حصہ آپ کے لیے دعا کے لیے مخصوص کر دوں ؟ نبی اکرم صلی اللہ علیہ وسلم نے فرمایا : ٹھیک ہے ، اس نے عرض کی : کیا میں اپنی پوری نفلی عبادت ، آپ کے لیے دعا کے لیے مخصوص کر دوں ؟ نبی اکرم صلی اللہ علیہ وسلم فرمایا : ” ایسی صورت میں وہ تمہاری دنیاوی اور اُخروی پریشانیوں کے لئے کفایت کر جائے گا ۔ “
یہ روایت امام بزار نے نقل کی ہے ، اس کی سند میں ایک راوی عمر بن محمد بن صہبان ہے اور وہ متروک ہے ۔

محمد بن یحیی بن حبان اپنے والد کے حوالے سے اپنے دادا کا یہ بیان نقل کرتے ہیں : ” ایک شخص نے عرض کی : یا رسول اللہ ! کیا میں اپنی نفل عبادت کا ایک تہائی حصہ آپ پر درود بھیجنے کے لیے مخصوص کر دوں ؟ نبی اکرم صلی اللہ علیہ وسلم نے فرمایا : جی ہاں ! اگر تم چاہو ، اس نے دریافت کیا : دو تہائی کر دوں ؟ نبی اکرم صلی اللہ علیہ وسلم نے جواب دیا : جی ہاں ! اس نے عرض کی : میں پوری نفل عبادت ( آپ پر درود بھیجنے کے لیے مخصوص کر دوں ؟ ) نبی اکرم صلی اللہ علیہ وسلم نے فرمایا : ” ایسی صورت میں اللہ تعالیٰ تمہارے دنیاوی اور اُخروی معاملات کی پریشانیوں ( یا ضروریات کے حوالے سے ) تمہاری کفایت کر دے گا ۔ “
یہ روایت امام طبرانی نے نقل کی ہے اور اس کی سند حسن ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص مجھ پر ایک مرتبہ درود بھیجتا ہے ، اللہ تعالیٰ اس کے بدلے میں ، اُس کے لئے دس نیکیاں نوٹ کرتا ہے ۔ “ یہ دونوں روایات امام أحمد نے نقل کی ہیں ، اور ان دونوں کے رجال ” صحیح “ کے رجال ہیں ، صرف ربعی بن ابراہیم کا معاملہ مختلف ہے اور وہ ثقہ اور مامون ہے ۔

سیدنا عبداللہ بن عمرو رضی اللہ عنہ فرماتے ہیں : ” جو شخص نبی اکرم صلی اللہ علیہ وسلم پر ایک مرتبہ درود بھیجتا ہے ، اللہ تعالیٰ اور اُس کے فرشتے اس شخص پر 70 مرتبہ رحمتیں نازل کرتے ہیں ۔ “
یہ روایت امام أحمد نے نقل کی ہے اور اس کی سند حسن ہے ۔

سیدنا عبدالرحمن بن عوف رضی اللہ عنہ بیان کرتے ہیں : میں مسجد کے صحن میں کھڑا ہوا تھا ، اسی دوران میں نے نبی اکرم صلی اللہ علیہ وسلم کو دیکھا کہ آپ اس دروازے سے باہر تشریف لے گئے ہیں ، جو قبرستان کی طرف ہے ، میں پہلے تھوڑی دیر رکا رہا ، پھر میں آپ کے پیچھے نکل کھڑا ہوا ، میں نے آپ کو پایا کہ آپ ” اسواف “ میں موجود ایک باغ کے اندر تشریف لے گئے ، نبی اکرم صلی اللہ علیہ وسلم نے وضو کیا ، پھر آپ نے دو رکعات ادا کیں ، آپ اس دوران سجدے میں چلے گئے اور آپ نے اس دوران طویل سجدہ کیا ، جب نبی اکرم صلی اللہ علیہ وسلم نے سلام پھیرا تو میں آپ کے سامنے آیا میں نے عرض کی : میرے ماں باپ آپ پر قربان ہوں ، آپ نے ایسا سجدہ کیا کہ مجھے یہ اندیشہ ہوا کہ کہیں اللہ تعالیٰ نے آپ کو وفات نہ دے دی ہو ، کیونکہ آپ کا سجدہ بہت طویل تھا ، نبی اکرم صلی اللہ علیہ وسلم نے ارشاد فرمایا : ” جبرائیل نے مجھے یہ خوشخبری دی ہے کہ جو شخص مجھ پر درود بھیجے گا ، اللہ تعالیٰ اس پر رحمت نازل کرے گا اور جو شخص مجھ پر سلام بھیجے گا ، اللہ تعالیٰ اس پر سلامتی نازل کرے گا ۔ “

ان کی نقل کردہ ایک روایت جو اسی صحابی کے حوالے سے منقول ہے ، اس میں یہ الفاظ ہیں : ” ہم میں سے پانچ یا چار صحابہ کرام رضی اللہ عنہم ، نبی اکرم صلی اللہ علیہ وسلم سے جدا نہیں ہوتے تھے ( یعنی اتنے افراد ہر وقت آپ کے پاس موجود رہتے ) تاکہ دن یا رات میں جب بھی نبی اکرم صلی اللہ علیہ وسلم کو کوئی ضرورت درپیش ہو تو وہ کام آ سکیں ، راوی بیان کرتے ہیں : جب میں آپ کے پاس آیا تو آپ باہر تشریف لائے تھے ، میں آپ کے پیچھے چل پڑا ، آپ ” اسواف “ کے مقام پر موجود ایک باغ میں داخل ہوئے ، وہاں آپ نے نماز ادا کی وہاں آپ نے سجدہ کرتے ہوئے سجدے کو طول دیا ، تو میں نے یہ سوچا کہ شاید اللہ تعالیٰ نے آپ کی روح کو قبض کر لیا ہے ، راوی بیان کرتے ہیں : پھر نبی اکرم صلی اللہ علیہ وسلم نے اپنا سر اٹھایا اور مجھے بلایا ، آپ نے فرمایا : تمہیں کیا ہوا ہے ؟ میں نے عرض کی : یا رسول اللہ ! آپ نے طویل سجدہ کیا تھا تو میں نے یہ سوچا کہ شاید اللہ تعالیٰ نے اپنے رسول کی روح کو قبض کر لیا ہے ، اور اب میں آپ کو کبھی نہیں دیکھ پاؤں گا ، نبی اکرم صلی اللہ علیہ وسلم نے فرمایا : میں نے اپنے پروردگار کا شکر ادا کرنے کے لیے سجدہ کیا تھا ، اس چیز کی وجہ سے جو اُس نے مجھے میری امت کے بارے میں عطا کی ہے ، میری اُمت کا جو شخص مجھ پر ایک مرتبہ درود بھیجے گا ، اس کے لئے دس نیکیاں نوٹ کی جائیں گی ، اور اس کے دس گناہ مٹا دیئے جائیں گے ۔ “ یہ دونوں روایات امام ابویعلیٰ نے نقل کی ہیں ، پہلی روایت کی سند میں ایسے راوی ہیں ، جن سے میں واقف نہیں ہوں اور دوسری روایت کی سند میں ایک راوی موسیٰ بن عبیدہ ربذی ہے اور وہ ضعیف ہے ۔ اس سے پہلے سجدہ شکر سے متعلق باب میں امام أحمد کی نقل کردہ روایت گزر چکی ہے ۔

سیدنا ابوطلحہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ کا چہرہ مبارک دمک رہا تھا ، میں نے عرض کی : یا رسول اللہ ! میں نے آپ کو کبھی آج کے دن سے زیادہ خوشگوار مزاج اور چہرے کے خوشگوار تاثرات کے ساتھ نہیں دیکھا ، نبی اکرم صلی اللہ علیہ وسلم نے ارشاد فرمایا : میرا مزاج کیوں خوشگوار نہ ہو ؟ اور اس کے اثرات چہرے سے کیوں ظاہر نہ ہوں ؟ ابھی جبرائیل میرے پاس سے اُٹھ کر گئے ہیں ، انہوں نے یہ بتایا : اے سیدنا محمد ( صلی اللہ علیہ وسلم ) ! آپ کی امت کا جو فرد آپ پر ایک مرتبہ درود بھیجے گا ، اس کے بدلے میں اللہ تعالیٰ اس شخص کے لئے دس نیکیاں نوٹ کر لے گا اور اس شخص کی دس برائیاں مٹا دے گا ، اور اس کی وجہ سے اس شخص کے دس درجات بلند کر دے گا ، اور فرشتہ بھی اس شخص کے لیے اس کی مانند کلمات کہے گا ، جو اس نے آپ کے لئے کہے ہوں گے ، نبی اکرم صلی اللہ علیہ وسلم فرماتے ہیں : میں نے کہا: اے جبرائیل ! وہ فرشتہ کون ہو گا ؟ جبرائیل نے بتایا : اللہ تعالیٰ نے آپ کے لئے آپ کی تخلیق کے دن سے ، آپ کے ( قیامت کے ) دن ( دوبارہ زندہ ہونے ) تک کے لیے ، ایک فرشتہ مقرر کیا ہے ، آپ کی اُمت کا جو بھی فرد آپ پر درود بھیجے گا ، تو وہ فرشتہ یہ کہے گا : اللہ تعالیٰ تم پر بھی رحمت نازل کرے ۔ “

ایک روایت میں یہ الفاظ ہیں : ” اللہ تعالیٰ اُس کے پڑھے ہوئے کی مانند اسے جواب دیتا ہے ، اور وہ قیامت کے دن اُس کے سامنے پیش کیا جائے گا ۔ “
( علامہ ہیثمی فرماتے ہیں : ) میں یہ کہتا ہوں : امام نسائی رحمہ اللہ نے اس روایت کا ایک حصہ نقل کیا ہے ۔
یہ روایت امام طبرانی نے نقل کی ہے ، پہلی روایت کی سند میں ایک راوی محمد بن ابراہیم بن ولید طبرانی ہے ، اور دوسری روایت کی سند میں ایک راوی أحمد بن عمر نصیبی ہے اور میں ان دونوں سے واقف نہیں ہوں ، ان دونوں کے بقیہ رجال ” ثقہ “ ہیں ۔
یہ روایت امام طبرانی نے معجم صغیر میں نقل کی ہے اور معجم اوسط میں اس کا کچھ حصہ نقل کیا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم قضائے حاجت کے لیے تشریف لے گئے ، سیدنا عمر رضی اللہ عنہ کے علاوہ اور کوئی آپ کے پیچھے نہیں گیا ، سیدنا عمر رضی اللہ عنہ کے پاس پانی کا ایک برتن تھا ، سیدنا عمر رضی اللہ عنہ نے نبی اکرم صلی اللہ علیہ وسلم کو سجدے کی حالت میں پایا ، تو وہ ذرا پیچھے ہٹ کے کھڑے ہو گئے ، جب نبی اکرم صلی اللہ علیہ وسلم نے سر مبارک اٹھایا تو آپ نے فرمایا : اے عمر ! تم نے اچھا کیا کہ تم مجھ سے پیچھے ہٹ گئے ابھی جبرائیل میرے پاس آئے تھے اور انہوں نے بتایا : ” آپ کی امت کا جو شخص آپ پر ایک مرتبہ درود بھیجے گا ، اللہ تعالیٰ اُس پر دس مرتبہ رحمت نازل کرے گا اور اس کے ( راوی کہتے ہیں : میرا خیال ہے ، روایت میں یہ الفاظ ہیں : ) دس درجات بلند کرے گا ۔ “
یہ روایت امام بزار نے نقل کی ہے ، اس کی سند میں ایک راوی سلمہ بن وردان ہے اور وہ ضعیف ہے ۔

سیدنا عامر بن ربیعہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنی طرف سے مجھ پر ایک مرتبہ درود بھیجے گا ، اللہ تعالیٰ اس کے بدلے میں اُس پر دس رحمتیں نازل کرے گا ۔ “
( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے نقل کی ہے ، تاہم اس میں یہ الفاظ نہیں ہیں : ” اپنی طرف سے ۔ “
یہ روایت امام بزار نے نقل کی ہے ، اس کی سند میں ایک راوی عاصم بن عبیداللہ ہے اور وہ ضعیف ہے ۔

سیدنا ابوبردہ بن نیار رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنی طرف سے مجھ پر ایک مرتبہ درود بھیجے گا ، اللہ تعالیٰ اس کے بدلے میں اس پر دس رحمتیں نازل کرے گا ، اور اس کے دس گناہ دور کر دے گا ، اور اس کے دس درجات بلند کر دے گا ۔ “
یہ روایت امام بزار نے نقل کی ہے اور اس کے رجال ” ثقہ “ ہیں ۔
یہ روایت امام طبرانی نے بھی نقل کی ہے ، تاہم انہوں نے یہ الفاظ نقل کئے ہیں : ” میری امت کا جو بھی فرد سچے دل کے ساتھ مجھ پر درود بھیجے گا ۔ ۔ ۔ ۔ ۔ ۔ “ ۔ اور انہوں نے یہ الفاظ زائد نقل کیے ہیں : ” وہ اس کے لئے دس نیکیاں نوٹ کر لے گا ۔ “

سیدنا عمار بن یاسر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے میری قبر پر ایک فرشتے کو مقرر کیا ہے ، اور اسے تمام مخلوق کی آوازیں سننے کی صلاحیت دی ہے ، قیامت کے دن تک جو بھی فرد مجھ پر درود بھیجے گا تو وہ ( فرشتہ ) اس شخص کے نام اور اس کے باپ کے نام کے ہمراہ وہ درود مجھ تک پہنچا دے گا کہ فلاں بن فلاں نے آپ پر درود بھیجا ہے ۔ “
یہ روایت امام بزار نے نقل کی ہے ، اس کی سند میں ایک راوی ابن جمیری ہے اور اس کا نام عمران ہے ، اس کے بارے میں کلام بعد میں آئے گا ، اس میں ایک راوی نعیم بن ضمضم ہے ، جسے بعض حضرات نے ضعیف قرار دیا ہے اس روایت کے بقیہ رجال ” صحیح “ کے رجال ہیں ۔

ابن حمیری بیان کرتے ہیں : سیدنا عمار رضی اللہ عنہ نے مجھ سے فرمایا : اے ابن حمیری ! کیا میں تمہیں اپنے محبوب کے حوالے سے حدیث بیان کروں ؟ میں نے جواب دیا : جی ہاں ! تو انہوں نے بتایا : نبی اکرم صلی اللہ علیہ وسلم نے ارشاد فرمایا : ” اے عمار ! بے شک اللہ تعالیٰ کا ایک فرشتہ ہے جسے اس نے ساری مخلوق کی بات سننے کی صلاحیت عطا کی ہے ، جب میں مر جاؤں گا تو وہ قیامت کے دن تک میری قبر کے پاس کھڑا رہے گا ، اور میری امت کا جو بھی فرد مجھ پر ایک مرتبہ درود بھیجے گا ، تو وہ فرشتہ اس شخص کا اور اس شخص کے باپ کا نام لے کر یہ کہے گا : اے سیدنا محمد ! فلاں شخص نے آپ پر اس طرح درود بھیجا ہے ( نبی اکرم صلی اللہ علیہ وسلم نے فرمایا : ) پھر پروردگار اس شخص پر ایک کے بدلے میں دس مرتبہ رحمت نازل کرے گا ۔ “
یہ روایت امام طبرانی نے نقل کی ہے اور نعیم بن ضمضم نامی راوی ضعیف ہے اور ابن حمیری نامی راوی کا نام عمران ہے ، امام بخاری رحمہ اللہ کہتے ہیں : اس کی نقل کردہ حدیث کی متابعت نہیں کی گئی ہے “ ” میزان الاعتدال “ کے مصنف کہتے ہیں : یہ معروف نہیں ہے ، اس روایت کے بقیہ رجال ” صحیح “ کے رجال ہیں ۔

ایک روایت میں یہ الفاظ زائد ہیں : ” میں نے اپنے پروردگار سے یہ چیز مانگی کہ جو بندہ مجھ پر ایک مرتبہ درود بھیجے گا ، اللہ تعالیٰ اس پر اس کا دس گنا ( یعنی اس پر دس مرتبہ ) رحمت نازل کرے ۔ “

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص مجھ پر ایک مرتبہ درود بھیجے گا ، اللہ تعالیٰ اس پر دس مرتبہ رحمت نازل کرے گا ، اس درود کے لیے ایک فرشتہ مقرر ہے ، جو اس درود کو مجھ تک پہنچا دے گا ۔ “
یہ روایت امام طبرانی نے نقل کی ہے ، اس کی سند میں ایک راوی موسیٰ بن عمیر قرشی اعمیٰ ہے اور وہ انتہائی ضعیف ہے ۔

سیدنا امام حسن بن علی رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” تم جہاں کہیں بھی ہو ، تم مجھ پر درود بھیجو ! کیونکہ تمہارا درود مجھ تک پہنچ جائے گا ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی حمید بن ابوزینب ہے ، اور میں اس سے واقف نہیں ہوں ، اس روایت کے بقیہ رجال ” صحیح “ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم ارشاد فرمایا : ” جو بھی شخص مجھ پر سلام بھیجتا ہے ، تو اللہ تعالیٰ میری روح مجھے لوٹا دیتا ہے ، یہاں تک کہ میں اُسے سلام کا جواب دیتا ہوں ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبداللہ بن یزید اسکندرانی ہے اور میں اس سے واقف نہیں ہوں ، اور ایک راوی مہدی بن جعفر ہے جو ثقہ ہے اور اس کے بارے میں اختلاف پایا جاتا ہے ، اس روایت کے بقیہ رجال ” ثقہ “ ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص مجھ پر درود بھیجتا ہے ، تو اس کا درود مجھ تک پہنچ جاتا ہے ، اور میں اُس کے لئے دعائے رحمت کرتا ہوں ، اور اس کے علاوہ اس کے لئے دس نیکیاں نوٹ کی جاتی ہیں ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ایسا ہے جس سے میں واقف نہیں ہوں ، اس روایت کے بقیہ رجال ” ثقہ “ ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص مجھ پر ایک مرتبہ درود بھیجتا ہے ، اللہ تعالیٰ اس کے بدلے میں اس پر دس رحمتیں نازل کرتا ہے ، اور جو شخص مجھ پر دس مرتبہ درود بھیجتا ہے ، اللہ تعالیٰ اس پر 100 رحمتیں نازل کرتا ہے ، اور جو شخص مجھ پر ایک سو مرتبہ درود بھیجتا ہے ، اللہ تعالیٰ اس کی دونوں آنکھوں کے درمیان منافقت سے بری ہونا اور جہنم سے بری ہونا لکھ دیتا ہے ، اور قیامت کے دن اللہ تعالیٰ اس شخص کو شہداء کے ساتھ ٹھہرائے گا ۔ “ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے امام نسائی رحمہ اللہ نے
یہ روایت نقل کی ہے : ” جو شخص مجھ پر ایک مرتبہ درود بھیجے گا ، اللہ تعالیٰ اس پر دس مرتبہ رحمت نازل کرے گا ۔ “
یہ روایت امام طبرانی نے معجم صغیر اور معجم اوسط میں نقل کی ہے اور اس کی سند میں ایک راوی ابراہیم بن سالم بن شبل ہجیمی ہے اور میں اس سے واقف نہیں ہوں ، اس روایت کے بقیہ رجال ” ثقہ “ ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص مجھ پر ایک مرتبہ درود بھیجتا ہے ، میں اُس کے لئے دس مرتبہ دعائے رحمت کرتا ہوں ۔ “
( علامہ ہیثمی فرماتے ہیں : ) میں یہ کہتا ہوں :
یہ روایت امام نسائی رحمہ اللہ نے نقل کی ہے ، تاہم انہوں نے یہ الفاظ نقل کئے ہیں : ” اللہ تعالیٰ اس پر رحمت نازل کرتا ہے ۔ “
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : جس شخص کے سامنے میرا ذکر کیا جائے اُسے مجھ پر درود بھیجنا چاہیے ۔ “
یہ روایت امام طبرانی نے معجم اوسط میں نقل کی ہے اور اس کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص مجھ پر ایک مرتبہ درود بھیجتا ہے ، اللہ تعالیٰ اس پر دس رحمتیں نازل کرتا ہے ۔ “
یہ روایت امام طبرانی نے نقل کی ہے ، اس کی سند میں ایک راوی یحیی بن عبدالحمید حمانی ہے اور وہ ضعیف ہے ۔

سیدنا ابوموسی اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص مجھ پر ایک مرتبہ درود بھیجتا ہے ، اللہ تعالیٰ اس کے بدلے میں اُس پر دس رحمتیں نازل کرتا ہے ۔ “
یہ روایت امام طبرانی نے نقل کی ہے ، اس کی سند میں ایک راوی حفص بن سلیمان قاری ہے ، جسے وکیع اور دیگر حضرات نے ثقہ قرار دیا ہے ، جبکہ جمہور نے اسے ضعیف کہا: ہے ، اس روایت کے بقیہ رجال ” ثقہ “ ہیں ۔