مجمع الزوائد ومنبع الفوائد

سیدنا ابوذر غفاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ایک نیکی کا ارادہ کرے اور اس پر عمل نہ کرے ، تو اس کے لئے ایک نیکی نوٹ کی جاتی ہے اور اگر وہ اس ( یعنی ارادے ) پر عمل کر لے ، تو اس کے لیے اس کی مانند دس گنا سے لے کر سات سو سات گنا تک نیکیاں نوٹ کی جاتی ہیں اور جو شخص ایک برائی کا ارادہ کرتا ہے ، اور اس پر عمل نہیں کرتا ، تو اس چیز کو اس کے خلاف نوٹ نہیں کیا جاتا ، اور اگر وہ اس پر عمل کر لے تو اس کے خلاف ایک برائی نوٹ کی جاتی ہے اور ( بعض اوقات ) اللہ تعالیٰ اسے بھی مٹا دیتا ہے ۔ “
یہ روایت امام طبرانی نے معجم صغیر میں نقل کی ہے اور اس کے رجال ” ثقہ “ ہیں ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص ایک نیکی کا ارادہ کرتا ہے ، اور اس پر عمل نہیں کرتا ، تو اُس کے لئے ایک نیکی نوٹ کر لی جاتی ہے اور اگر وہ اس پر عمل کر لے ، تو اس کے لئے دس نیکیاں نوٹ کی جاتی ہیں ، اور جو شخص ایک برائی کا ارادہ کرے ، اور اس پر عمل نہ کرے ، تو اس کے خلاف کوئی چیز نوٹ نہیں کی جاتی ہے ، اور اگر وہ اس پر عمل کر لے ، تو اُس کے خلاف ایک برائی نوٹ کی جاتی ہے ۔ “
یہ روایت امام ابویعلیٰ نے نقل کی ہے ، اور اس کے رجال ” صحیح“ کے رجال ہیں ۔