مجمع الزوائد ومنبع الفوائد

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم جب پہلی کا چاند دیکھتے تھے تو یہ پڑھتے تھے :
«اللَّهُ أَكْبَرُ ، الْحَمْدُ لِلَّهِ ، لَا حَوْلَ وَلَا قُوَّةَ إِلَّا بِاللَّهِ ، اللَّهُمَّ إِنِّي أَسْأَلُكَ خَيْرَ هَذَا الشَّهْرِ ، وَأَعُوذُ بِكَ مِنْ شَرِّ الْقَدَرِ وَمِنْ سُوءِ الْمَحْشَرِ» ” اللہ تعالیٰ سب سے بڑا ہے ، ہر طرح کی حمد اللہ تعالیٰ کے لیے مخصوص ہے ، اللہ تعالیٰ کی مدد کے بغیر کچھ نہیں ہو سکتا ، اے اللہ ! میں تجھ سے اس مہینے کی بھلائی مانگتا ہوں ، اور تقدیر کے شر سے اور محشر میں بری صورتحال سے ، تیری پناہ مانگتا ہوں ۔ “

یہ روایت عبداللہ اور طبرانی نے نقل کی ہے اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا رافع بن خدیج رضی اللہ عنہ بیان کرتے ہیں : نبی اکرم صلی اللہ علیہ وسلم جب پہلی کا چاند دیکھتے تھے تو یہ پڑھتے تھے :
«هِلَالُ خَيْرٍ وَرُشْدٍ»
” یہ بھلائی اور ہدایت والا چاند ہے ۔ “
پھر آپ صلی اللہ علیہ وسلم یہ پڑھتے تھے :
«اللَّهُمَّ إِنِّي أَسْأَلُكَ مِنْ خَيْرِ هَذَا ثَلَاثًا»
” اے اللہ ! میں تجھ سے اس کی بھلائی کا سوال کرتا ہوں ۔ “ یہ آپ تین مرتبہ پڑھتے تھے ۔
«اللَّهُمَّ إِنِّي أَسْأَلُكَ مِنْ خَيْرِ هَذَا الشَّهْرِ ، وَخَيْرِ الْقَدَرِ ، وَأَعُوذُ بِكَ مِنْ شَرِّهِ»
” اے اللہ ! میں تجھ سے اس مہینے کی بھلائی کا اور تقدیر کی بھلائی کا سوال کرتا ہوں اور اس کے شر سے تیری پناہ مانگتا ہوں ۔ “ یہ آپ تین مرتبہ پڑھتے تھے ۔
یہ روایت امام طبرانی نے نقل کی ہے اور اس کی سند حسن ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم جب پہلی کا چاند دیکھتے تھے تو یہ پڑھتے تھے :
«اللَّهُمَّ أَهِلَّهُ عَلَيْنَا بِالْأَمْنِ وَالْإِيمَانِ ، وَالسَّلَامَةِ وَالْإِسْلَامِ ، وَالتَّوْفِيقِ لِمَا تُحِبُّ وَتَرْضَى ، رَبُّنَا وَرَبُّكَ اللَّهُ»
” اے اللہ ! تو اسے امن اور ایمان اور سلامتی اور اسلام کے ہمراہ ، ہم پر طلوع کرنا اور اس چیز کی توفیق کے ہمراہ ، جو تجھے پسند ہو ، جس سے تو راضی ہو ( اے چاند ! ) ہمارا اور تمہارا پروردگار اللہ تعالیٰ ہے ۔ “

یہ روایت امام طبرانی نے نقل کی ہے ، اس کی سند میں ایک راوی عثمان بن ابراہیم حاطبی ہے اور اس میں ضعف پایا جاتا ہے ، اس روایت کے رجال ” ثقہ “ ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : جب آپ صلی اللہ علیہ وسلم پہلی کا چاند دیکھتے تھے ، تو یہ فرماتے تھے : ” بھلائی اور ہدایت کا چاند ہو ، میں اُس پر ایمان لایا جس نے تجھے پیدا کیا اور ٹھیک پیدا کیا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی أحمد بن عیسیٰ لخمی ہے اور میں اس سے واقف نہیں ہوں ، اس روایت کے بقیہ رجال ” ثقہ “ ہیں ۔

عبداللہ بن ہشام بیان کرتے ہیں : نبی اکرم صلی اللہ علیہ وسلم کے اصحاب یہ دعا سیکھتے تھے کہ جب نیا سال یا نیا مہینہ شروع ہو ، تو یہ پڑھیں :
«اللَّهُمَّ أَدْخِلْهُ عَلَيْنَا بِالْأَمْنِ وَالْإِيمَانِ ، وَالسَّلَامَةِ وَالْإِسْلَامِ ، وَرِضْوَانٍ مِنَ الرَّحْمَنِ ، وَجَوَازٍ مِنَ الشَّيْطَانِ» ” اے اللہ ! تو اسے امن اور ایمان اور سلامتی اور اسلام اور رحمان کی طرف سے رضامندی اور شیطان سے بچاؤ کے ہمراہ ، ہم پر داخل کرنا ۔ “
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔