مجمع الزوائد ومنبع الفوائد

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم جب بازار سے باہر تشریف لے جاتے تھے تو یہ پڑھتے تھے :
«اللَّهُمَّ إِنِّي أَسْأَلُكَ مِنْ خَيْرِ هَذِهِ السُّوقِ ، وَخَيْرِ مَا فِيهَا ، وَأَعُوذُ بِكَ مِنْ شَرِّهَا ، وَشَرِّ مَا فِيهَا ۔ اللَّهُمَّ إِنِّي أَعُوذُ بِكَ أَنْ أُصِيبَ فِيهَا يَمِينًا فَاجِرَةً ، أَوْ صَفْقَةً خَاسِرَةً» ” اے اللہ ! میں اس بازار کی بھلائی کا اور اس میں جو کچھ موجود ہے ، اس کی بھلائی کا تجھ سے سوال کرتا ہوں ، اور میں اس کے شر سے اور اس میں جو کچھ موجود ہے ، اس کے شر سے تیری پناہ مانگتا ہوں ، اے اللہ ! میں اس بات سے تیری پناہ مانگتا ہوں کہ میں اس میں کوئی جھوٹی قسم اٹھاؤں ، یا کوئی خسارے والا سودا کر لوں ۔ “

یہ روایت امام طبرانی نے نقل کی ہے ، اس کی سند میں ایک راوی محمد بن ابان جعفی ہے ، اور وہ ضعیف ہے ۔

سلیم بن حنظلہ بیان کرتے ہیں : سیدنا عبداللہ بن مسعود رضی اللہ عنہ بازار کے دروازے پر آئے اور انہوں نے یہ پڑھا :
«اللَّهُمَّ إِنِّي أَسْأَلُكَ مِنْ خَيْرِهَا ، وَخَيْرِ أَهْلِهَا ، وَأَعُوذُ بِكَ مِنْ شَرِّهَا ، وَشَرِّ أَهْلِهَا»
” اے اللہ میں تجھ سے اس ( بازار ) کی بھلائی اور اس ( بازار ) والوں کی بھلائی کا سوال کرتا ہوں ، اور میں اس کے شر اور اس کے اہل کے شر سے تیری پناہ مانگتا ہوں ۔ “
یہ روایت امام طبرانی نے ” موقوف “ روایت کے طور پر نقل کی ہے ، اور اس کے رجال ” صحیح “ کے رجال ہیں ، صرف سلیم بن حنظلہ کا معاملہ مختلف ہے اور وہ ثقہ ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے تاجروں کے گروہ ! کیا تم میں سے کوئی ایک شخص اس بات سے عاجز ہے کہ وہ جب بازار سے واپس جاتا ہے تو قرآن کی دس آیات پڑھ لیا کرے ، اللہ تعالیٰ اس کے لیے ہر ایک آیت کے بدلے میں ایک نیکی نوٹ کر لے گا ۔ “
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ، صرف ربیع بن ثعلب اور ابواسماعیل مؤدب کا معاملہ مختلف ہے ، اور یہ دونوں ثقہ ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے کتاب ” البیوع “ میں اس بارے میں احادیث گزر چکی ہیں کہ جب آدمی بازار میں داخل ہو ، تو کیا پڑھے ؟