مجمع الزوائد ومنبع الفوائد

سیدنا ابوایوب انصاری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص صبح کی نماز ادا کر لینے کے بعد دس مرتبہ یہ پڑھے : «لَا إِلَهَ إِلَّا اللَّهُ وَحْدَهُ لَا شَرِيكَ لَهُ ، لَهُ الْمُلْكُ وَلَهُ الْحَمْدُ ، وَهُوَ عَلَى كُلِّ شَيْءٍ قَدِيرٌ»
” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے ، اور حمد اسی کے لیے مخصوص ہے اور وہ ہر شے پر قدرت رکھتا ہے ۔ “
( نبی اکرم صلی اللہ علیہ وسلم فرماتے ہیں : ) تو یہ عمل اُس کے لیے چار غلام آزاد کرنے کے برابر ہو گا اور ان کلمات کی وجہ سے اس کے لئے دس نیکیاں نوٹ کی جائیں گی ، اور ان کلمات کی وجہ سے اس کے دس گناہ مٹا دیئے جائیں گے اور یہ کلمات شام ہونے تک شیطان سے اس کے لیے بچاؤ کا ذریعہ بن جائیں گے ، اور اگر کوئی شخص مغرب کے بعد انہیں پڑھ لے گا ، تو اس کی مانند ( یعنی اجر و ثواب ) حاصل ہو گا ۔ “
یہ روایت امام أحمد نے نقل کی ہے اور امام طبرانی نے اختصار کے ساتھ نقل کی ہے ، امام أحمد کی سند میں ایک راوی محمد بن اسحاق ہے ، اور وہ مدلس ہے جبکہ امام طبرانی کی روایت میں ایک راوی محمد بن ابولیلیٰ ہے اور وہ ثقہ ہے ، لیکن حافظے کی خرابی کا شکار ہے ، ان دونوں کے رجال ” ثقہ “ ہیں ۔

سیدنا عبدالرحمن بن غنم رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص مغرب اور صبح کی نماز کے بعد اُٹھنے سے پہلے اور ٹانگ موڑنے سے پہلے یہ کلمات دس مرتبہ پڑھے : «لَا إِلَهَ إِلَّا اللَّهُ وَحْدَهُ لَا شَرِيكَ لَهُ ، لَهُ الْمُلْكُ وَلَهُ الْحَمْدُ ، بِيَدِهِ الْخَيْرُ يُحْيِي وَيُمِيتُ ، وَهُوَ عَلَى كُلِّ شَيْءٍ قَدِيرٌ»
” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے اور حمد اسی کے لیے مخصوص ہے ، ہر قسم کی بھلائی اسی کے دست قدرت میں ہے ، وہ زندگی دیتا ہے اور وہ موت دیتا ہے اور وہ ہر شے پر قدرت رکھتا ہے ۔ “
( نبی اکرم صلی اللہ علیہ وسلم فرماتے ہیں : ) تو ان میں سے ہر ایک کے عوض میں ، اس شخص کے لئے دس نیکیاں نوٹ کی جاتی ہیں اور اس شخص کے دس گناہ مٹا دیئے جاتے ہیں ، اور اس کے دس درجات بلند کر دیے جاتے ہیں اور یہ کلمات اس کے لیے ہر ناپسندیدہ چیز سے بچاؤ کا ذریعہ اور مردود شیطان سے بچاؤ کا ذریعہ بن جاتے ہیں ، اور شرک کے علاوہ کسی گناہ کے لیے یہ حلال نہیں ہے کہ وہ اس شخص تک پہنچ جائے ، اور ایسا شخص عمل کے اعتبار سے لوگوں میں سب سے زیادہ فضیلت والا ہوتا ہے ، البتہ اس شخص کا معاملہ مختلف ہو گا ، جس نے اس کے پڑھے ہوئے کلمات سے زیادہ تعداد میں ان کلمات کو پڑھا ہو ۔ “
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ، صرف شہر بن حوشب کا معاملہ مختلف ہے ، اور اس کی نقل کردہ حدیث حسن ہے ۔

سیدہ ام سلمہ رضی اللہ عنہا بیان کرتی ہیں : فاطمہ ، نبی اکرم صلی اللہ علیہ وسلم کے پاس آئی اور آپ کے سامنے کام کاج کی شکایت کی ، اس نے کہا: یا رسول اللہ ! چکی پیسنے کی وجہ سے میرے ہاتھ خراب ہو گئے ہیں ، میں ایک مرتبہ آٹا پیستی ہوں اور ایک مرتبہ گوندھتی ہوں ، نبی اکرم صلی اللہ علیہ وسلم نے فرمایا : اگر اللہ تعالیٰ نے تمہیں کوئی چیز نصیب کی ، تو وہ تمہارے پاس آ جائے گی ، البتہ میں تمہاری رہنمائی اس سے زیادہ بہتر چیز کی طرف کرتا ہوں ، جب تم اپنے بستر پر جاؤ ، تو 33 مرتبہ «سبحان الله» 33 مرتبہ «الله اكبر» اور 34 مرتبہ «الحمد لله» پڑھو ، یہ 100 ہو جائیں گے اور یہ تمہارے لئے خادم ملنے سے بہتر ہیں ، اور جب تم صبح کی نماز ادا کر لو ، تو تم یہ پڑھو :
” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے حمد اسی کے لیے مخصوص ہے ، وہ زندگی دیتا ہے اور وہ موت دیتا ہے اور ہر قسم کی بھلائی اسی کے دست قدرت میں ہے اور وہ ہر شے پر قدرت رکھتا ہے ۔ “
نبی اکرم صلی اللہ علیہ وسلم نے فرمایا : تم صبح کی نماز کے بعد دس مرتبہ اور مغرب کی نماز کے بعد دس مرتبہ ان کلمات کو پڑھو ، کیونکہ ان میں سے ہر ایک کے عوض میں دس نیکیاں نوٹ کی جاتی ہیں اور دس گناہ مٹا دیئے جاتے ہیں اور ان میں سے ہر ایک کلمہ سیدنا اسماعیل علیہ السلام کی اولاد میں سے ایک غلام کو آزاد کرنے کی مانند ہے ، اور کسی گناہ کے لیے یہ جائز نہیں ہے کہ وہ اس دن میں ، اس شخص تک پہنچے ، البتہ شرک ہو تو معاملہ مختلف ہے ” «لَا إِلَهَ إِلَّا اللهُ وَحْدَهُ لَا شَرِيكَ لَهُ» “ کے یہ الفاظ تمہارے صبح کے وقت پڑھنے سے لے کر تمہارے شام کے وقت انہیں پڑھنے کے درمیان کے وقت میں ، ہر شیطان اور ہر برائی کے حوالے سے تمہارے محافظ ہوں گے ۔ “
یہ روایت امام أحمد نے نقل کی ہے ، اور امام طبرانی نے اس کی مانند روایت نقل کی ہے ، جو اس سے زیادہ مختصر ہے ، اور انہوں نے یہ الفاظ نقل کیے ہیں : ” وہ تمہاری حفاظت کریں گے ۔ “ ان دونوں کی سند حسن ہے ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص صبح کی نماز ادا کرنے کے بعد کسی سے بات چیت کرنے سے پہلے ان کلمات کو پڑھے ، جبکہ اس نے اپنی ٹانگ کو موڑا ہوا ہو : «لَا إِلَهَ إِلَّا اللَّهُ وَحْدَهُ لَا شَرِيكَ لَهُ ، لَهُ الْمُلْكُ وَلَهُ الْحَمْدُ ، يُحْيِي وَيُمِيتُ ، بِيَدِهِ الْخَيْرُ وَهُوَ عَلَى كُلِّ شَيْءٍ قَدِيرٌ»
” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے اور حمد اسی کے لیے مخصوص ہے ، وہ زندگی دیتا ہے اور وہ موت دیتا ہے ، ہر قسم کی بھلائی اسی کے دست قدرت میں ہے ، اور وہ ہر شے پر قدرت رکھتا ہے ۔ “
نبی اکرم صلی اللہ علیہ وسلم فرماتے ہیں : جو شخص دس مرتبہ انہیں پڑھ لے ، تو ہر ایک مرتبہ کے عوض میں اس کے لئے دس نیکیاں نوٹ کی جائیں گی اور اس کے دس گناہ مٹا دیئے جائیں گے ، اور اس کے دس درجات بلند کر دیے جائیں گے ، اور یہ کلمات اُس دن میں اس شخص کے لیے ہر قسم کی ناپسندیدہ چیز سے بچاؤ کا ذریعہ بن جائیں گے اور مردود شیطان سے حفاظت کا باعث بن جائیں گے اور ہر ایک مرتبہ کے عوض میں اس شخص کو سیدنا اسماعیل علیہ السلام کی اولاد میں سے ایک غلام آزاد کرنے کا ثواب ملے گا ، جس کی قیمت 12000 ہو ، اور اس دن کوئی گناہ اس شخص کو لاحق نہیں ہو گا ، البتہ اللہ تعالیٰ کے ساتھ شرک کرنے کا معاملہ مختلف ہے ۔ “
( نبی اکرم صلی اللہ علیہ وسلم فرماتے ہیں : ) اور جو شخص مغرب کی نماز کے بعد انہیں پڑھ لے گا ، اُسے بھی اس کی مانند ( یعنی اجر و ثواب حاصل ) ہو گا ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی موسیٰ بن محمد بن عطاء بلقاوی ہے اور وہ متروک ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : جو شخص صبح کی نماز کے بعد یہ کلمات پڑھے : «لَا إِلَهَ إِلَّا اللَّهُ وَحْدَهُ لَا شَرِيكَ لَهُ ، لَهُ الْمُلْكُ وَلَهُ الْحَمْدُ ، يُحْيِي وَيُمِيتُ ، بِيَدِهِ الْخَيْرُ ، وَهُوَ عَلَى كُلِّ شَيْءٍ قَدِيرٌ»
” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے اور حمد اسی کے لیے مخصوص ہے ، وہ زندگی دیتا ہے اور وہ موت دیتا ہے اور ہر قسم کی بھلائی اسی کے دست قدرت میں ہے ، اور وہ ہر شے پر قدرت رکھتا ہے ۔ “
جو شخص اپنی ٹانگیں موڑنے سے پہلے سو مرتبہ انہیں پڑھ لے ، تو وہ اس دن عمل کے اعتبار سے اہل زمین کا سب سے زیادہ فضیلت والا شخص ہو گا ، البتہ اس کا معاملہ مختلف ہے ، جس نے اس کے پڑھے ہوئے جتنا پڑھا ہو ، یا اس کے پڑھے ہوئے سے زیادہ پڑھا ہو ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اور معجم اوسط کے رجال ” ثقہ “ ہیں ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص صبح کی نماز سے فارغ ہونے کے بعد یہ پڑھے :« لَا إِلَهَ إِلَّا اللَّهُ وَحْدَهُ لَا شَرِيكَ لَهُ ، لَهُ الْمُلْكُ ، وَلَهُ الْحَمْدُ ، بِيَدِهِ الْخَيْرُ ، وَهُوَ عَلَى كُلِّ شَيْءٍ قَدِيرٌ » ” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے ، حمد اسی کے لیے مخصوص ہے ، ہر قسم کی بھلائی اسی کے دست قدرت میں ہے اور وہ ہر شے پر قدرت رکھتا ہے ۔ “ جو شخص دس مرتبہ یہ کلمات پڑھ لے گا ، اسے ان کے عوض میں سات چیزیں عطا کی جائیں گی ، اسے ان کی وجہ سے دس نیکیاں ملیں گی ان کی وجہ سے اس کے دس گناہ مٹا دیئے جائیں گے ، ان کی وجہ سے اس کے دس درجات بلند ہوں گے ، یہ کلمات اس کے لئے 10 غلام آزاد کرنے کے برابر ہوں گے ، یہ کلمات اس کے لیے شیطان سے حفاظت کا ذریعہ اور ناپسندیدہ چیز سے بچاؤ کا باعث ہوں گے ، اور اس دن میں کوئی بھی گناہ اس شخص کو لاحق نہیں ہو گا ، البتہ اللہ تعالیٰ کے ساتھ شرک کرنے کا معاملہ مختلف ہے ، اور جو شخص مغرب کی نماز سے فارغ ہونے کے بعد ان کلمات کو پڑھ لے گا اُسے اس رات میں ، اس کی مانند اجر و ثواب عطا کیا جائے گا ۔ “
یہ روایت امام طبرانی نے عاصم بن منصور کے حوالے سے نقل کی ہے ، میں نے کوئی ایسا شخص نہیں پایا جس نے اس کی توثیق کی ہو ، یا جس نے اس کو ضعیف قرار دیا ہو ، اس روایت کے بقیہ رجال ” ثقہ “ ہیں ۔

سیدنا ابن زمیل جہنی رضی اللہ عنہ بیان کرتے ہیں : نبی اکرم صلی اللہ علیہ وسلم جب صبح کی نماز ادا کر لیتے تھے تو آپ یہ پڑھتے تھے ، آپ نے اس وقت اپنی ٹانگ موڑی ہوئی ہوتی تھی :
«سُبْحَانَ اللَّهِ وَبِحَمْدِهِ ، وَأَسْتَغْفِرُ اللَّهَ إِنَّهُ كَانَ تَوَّابًا»
” اللہ تعالیٰ کی ذات ہر عیب سے پاک ہے ، اور حمد اسی کے لیے مخصوص ہے ، اور میں اللہ تعالیٰ سے مغفرت طلب کرتا ہوں ، بے شک وہ بہت زیادہ توبہ قبول کرنے والا ہے ۔ “
نبی اکرم صلی اللہ علیہ وسلم یہ کلمات ستر مرتبہ پڑھتے تھے ، پھر آپ یہ فرماتے تھے : یہ ستر کلمات 700 ہو جائیں گے اور ایسے شخص کے لئے کوئی بھلائی نہیں ہے ، جس کے ایک دن میں گناہ 700 سے زیادہ ہوں ، پھر اس کے بعد نبی اکرم صلی اللہ علیہ وسلم لوگوں کی طرف رخ کرتے تھے ۔
( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے پوری روایت ذکر کی ہے ، جو اس سے پہلے تعبیر سے متعلق کتاب میں گزر چکی ہے ۔

سیده اسماء بنت واثلہ بن اسقع رضی اللہ عنہا بیان کرتی ہیں : میرے والد جب صبح کی نماز ادا کر لیتے تھے تو وہ قبلہ کی طرف رخ کر کے بیٹھے رہتے تھے اور سورج نکلنے تک کوئی کلام نہیں کرتے تھے ، بعض اوقات میں کسی کام کے سلسلے میں انہیں مخاطب کر لیتی تھی ، لیکن وہ میرے ساتھ کوئی بات نہیں کرتے تھے ، میں نے دریافت کیا : اس کی وجہ کیا ہے ؟ تو انہوں نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص صبح کی نماز ادا کرنے کے بعد ، کسی کے ساتھ کلام کرنے سے پہلے 100 مرتبہ سورہ اخلاص پڑھے گا ، تو جب بھی وہ ایک مرتبہ سورہ اخلاص پڑھے گا ، تو اس کے ایک سال کے گناہوں کی مغفرت ہو جائے گی ۔ “
یہ روایت امام طبرانی نے نقل کی ہے ، اس کی سند میں ایک راوی محمد بن عبدالرحمن قشیری ہے اور وہ متروک ہے ۔