مجمع الزوائد ومنبع الفوائد

سیدنا علی رضی اللہ عنہ بیان کرتے ہیں : جب نبی اکرم صلی اللہ علیہ وسلم نے اُن کی شادی سیدہ فاطمہ رضی اللہ عنہا کے ساتھ کروائی تو ان کے جہیز میں ایک چادر ، چمڑے سے بنا ہوا ایک تکیہ ، جس کے اندر پتے بھرے ہوئے تھے ، دو چکیاں ، ایک مشکیزہ اور دو گھڑے دیے ، سیدنا علی رضی اللہ عنہ نے ایک دن سیدہ فاطمہ رضی اللہ عنہا سے کہا: اللہ کی قسم ! تمہیں اتنا کام کرنا پڑتا ہے کہ مجھے پریشانی ہوتی ہے ، اللہ تعالیٰ نے تمہارے والد کو غلام دیے ہیں ، تم جاؤ ! اور ان سے کوئی خدمتگار مانگ لو ! سیدہ فاطمہ رضی اللہ عنہا نے کہا: اللہ کی قسم ! میں آٹا پیستی ہوں جس کے نتیجے میں میرے ہاتھوں کی جلد خراب ہو گئی ہے ، پھر سیدہ فاطمہ رضی اللہ عنہا نبی اکرم صلی اللہ علیہ وسلم کی خدمت میں حاضر ہوئیں ، نبی اکرم صلی اللہ علیہ وسلم نے دریافت کیا : اے میری بیٹی ! تم کس سلسلے میں آئی ہو ؟ انہوں نے عرض کی : میں آپ کو سلام کرنے کے لئے آئی ہوں ، انہیں نبی اکرم صلی اللہ علیہ وسلم سے مانگتے ہوئے شرم آ گئی اور وہ ویسے ہی واپس چلی گئیں ، سیدنا علی رضی اللہ عنہ نے دریافت کیا : کیا بنا ؟ انہوں نے جواب دیا : مجھے نبی اکرم صلی اللہ علیہ وسلم سے مانگتے ہوئے شرم آ گئی ، پھر وہ دونوں نبی اکرم صلی اللہ علیہ وسلم کی خدمت میں اکٹھے حاضر ہوئے ، سیدنا علی رضی اللہ عنہ نے عرض کی : یا رسول اللہ ! میں پانی بھر کے لاتا ہوں ، جس کے نتیجے میں مجھے سینے میں تکلیف ہوتی ہے ، سیدہ فاطمہ رضی اللہ عنہا نے عرض کی : میں آٹا پیستی ہوں ، جس کے نتیجے میں میرے ہاتھوں کی جلد خراب ہو گئی ہے ، اب اللہ تعالیٰ نے آپ کو قیدی اور گنجائش عطا کیے ہیں ، تو آپ ہمیں کوئی خدمت گار دیدیں ، نبی اکرم صلی اللہ علیہ وسلم نے فرمایا : اللہ کی قسم ! ایسا نہیں ہو سکتا کہ میں تم لوگوں کو دے دوں اور اہل صفہ کو چھوڑ دوں ، جن کے پیٹ بھوک کی وجہ سے لپٹے ہوئے ہوتے ہیں ، مجھے اتنی گنجائش نہیں ملتی کہ میں اُن پر خرچ کروں ، میں ان غلاموں کو فروخت کر دوں گا اور ان کی قیمت اہل صفہ پر خرچ کروں گا ۔ وہ دونوں واپس چلے گئے ، پھر نبی اکرم صلی اللہ علیہ وسلم ان دونوں کے ہاں تشریف لائے ، وہ دونوں اس وقت سونے کے لئے لیٹ چکے تھے ، ان کا لحاف ایسا تھا کہ اگر سر کو ڈھانپتے تو پاؤں کھل جاتے تھے اور اگر پاؤں کو ڈھانپتے تو سر کھل جاتا تھا ، وہ دونوں اُٹھنے لگے ، تو نبی اکرم صلی اللہ علیہ وسلم نے ارشاد فرمایا : اپنی جگہ پر رہو ! پھر نبی اکرم صلی اللہ علیہ وسلم نے ارشاد فرمایا : کیا میں تم دونوں کو اس چیز کے بارے میں نہ بتاؤں ؟ جو تم دونوں کے لیے اس چیز سے زیادہ بہتر ہے جو تم نے مجھ سے مانگی تھی ، ان دونوں نے عرض کی : جی ہاں ! نبی اکرم صلی اللہ علیہ وسلم نے فرمایا : کچھ کلمات ہیں ، جو جبرائیل نے مجھے سکھائے ہیں ، پھر نبی اکرم صلی اللہ علیہ وسلم نے ارشاد فرمایا : ” تم دونوں ہر نماز کے بعد ، دس مرتبہ «سبحان الله» ، دس مرتبہ «الحمد لله» اور دس مرتبہ «الله اكبر» پڑھا کرو ! اور جب تم دونوں بستر پر لیٹے ہو تو 33 مرتبہ «سبحان الله» 33 مرتبہ «الحمد لله» اور 34 مرتبہ «الله اكبر» پڑھو ۔ “ سیدنا علی رضی اللہ عنہ کرتے ہیں : جب سے میں نے نبی اکرم صلی اللہ علیہ وسلم کی زبانی یہ بات سنی ہے اس کے بعد کبھی ان کلمات کو پڑھنا ترک نہیں کیا ۔
راوی بیان کرتے ہیں : ابن الكواء نے اُن سے دریافت کیا : کیا جنگ صفین کی رات بھی نہیں ؟ سیدنا علی رضی اللہ عنہ نے فرمایا : اے اہل عراق ! اللہ تعالیٰ تمہیں تباہ کرے ، جی ہاں ! جنگ صفین کی رات بھی نہیں ( یعنی اُن کو پڑھنا ترک نہیں کیا ) ۔
( علامہ ہیثمی فرماتے ہیں : ) میں یہ کہتا ہوں : صحیح میں اس روایت کا کچھ حصہ مذکور ہے ۔
یہ روایت امام أحمد نے نقل کی ہے ، اس کی سند میں ایک راوی عطاء بن سائب ہے ، حماد بن سلمہ نے اس کے اختلاط کا شکار ہونے سے پہلے اس سے سماع کیا تھا ، اس روایت کے بقیہ رجال ” ثقہ “ ہیں ۔

سیدہ ام درداء رضی اللہ عنہا بیان کرتی ہیں : سیدنا ابودرداء رضی اللہ عنہ کے ہاں ایک شخص آ کر ٹھہرا ، سیدنا ابودرداء رضی اللہ عنہ نے فرمایا : تم ٹھہرو گے کہ ہم ٹھہرنے کا بندوبست کریں ، یا مسافر ہو کہ ہم زاد سفر کا بندوبست کریں ، اس نے کہا: بلکہ مسافر ہوں ، سیدنا ابودرداء رضی اللہ عنہ نے فرمایا : میں تمہیں زاد سفر دوں گا ، اگر مجھے اس سے زیادہ فضیلت والا زاد سفر دستیاب ہوتا تو وہ میں نے تمہیں دے دینا تھا ، پھر انہوں نے بتایا : ایک مرتبہ میں نبی اکرم صلی اللہ علیہ وسلم کی خدمت میں حاضر ہوا ، میں نے عرض کی : یا رسول اللہ ! خوشحال لوگ دنیا اور آخرت کی بھلائی لے گئے ہیں ، ہم نماز پڑھتے ہیں اور وہ بھی نماز پڑھتے ہیں ، ہم روزے رکھتے ہیں اور وہ بھی روزے رکھتے ہیں ، لیکن وہ صدقہ کرتے ہیں اور ہم صدقہ نہیں کر پاتے ہیں ، نبی اکرم صلی اللہ علیہ وسلم نے ارشاد فرمایا : کیا میں تمہاری رہنمائی ایسی چیز کے بارے میں نہ کروں ؟ کہ جب تم اسے کر لو گے تو تم سے پہلے کا کوئی فرد تم سے سبقت نہیں لے جا سکے گا ، اور تمہارے بعد والا کوئی فرد تم تک پہنچ نہیں سکے گا ، البتہ اس شخص کا معاملہ مختلف ہے جو اسی طرح کا عمل کر لے ، جو تم نے کیا ہو ، تم ہر نماز کے بعد 33 مرتبہ «سبحان الله» 33 مرتبہ «الحمد لله» اور 34 مرتبہ «الله اكبر» پڑھو ۔ “
یہ روایت امام أحمد ، امام بزار اور امام طبرانی نے مختلف اسانید کے حوالے سے نقل کی ہے ، امام طبرانی کی اسانید میں سے ایک کے رجال ” صحیح “ کے رجال ہیں ۔

سیدنا ابودرداء رضی اللہ عنہ کے بارے میں یہ بات منقول ہے : ایک مرتبہ کچھ لوگ اُن کے پاس آئے اور ان کے ساتھ بات چیت کرنے لگے ، سیدنا ابودرداء رضی اللہ عنہ نے فرمایا : میں تمہیں زاد سفر کے طور پر وہ چیز دوں گا ، جو نبی اکرم صلی اللہ علیہ وسلم نے مجھے زاد سفر کے طور پر دی تھی ، انہوں نے فرمایا : ” جب تم نماز ادا کرو تو ہر نماز کے بعد 33 مرتبہ «سبحان الله» 33 مرتبہ «الحمد لله »اور 34 مرتبہ «الله اكبر» پڑھو اور پھر یہ پڑھو : ” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے اور حمد اسی کے لیے مخصوص ہے اور وہ ہر شے پر قدرت رکھتا ہے ۔ “
یہ روایت امام طبرانی نے نقل کی ہے ، اس کی سند میں ایک راوی مسعود بن سلیمان ہے اور وہ مجہول ہے ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ہمیں اس تسبیح کا حکم دیا گیا ہے کہ نمازوں کے بعد 33 مرتبہ «سبحان الله» 33 مرتبہ «الحمد لله» اور 34 مرتبہ «الله اكبر» پڑھا جائے ۔ “
یہ روایت امام طبرانی نے دو اسناد کے ساتھ نقل کی ہے اور ان دونوں کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ہر نماز کے بعد 33 مرتبہ «سبحان الله» پڑھے ، 33 مرتبہ «الحمد لله» پڑھے ، 33 مرتبہ «الله اكبر» پڑھے اور ان کی تعداد 99 ہو جائے ، اور پھر وہ 100 مکمل کرنے کے لیے یہ پڑھے : ” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لیے مخصوص ہے اور حمد اسی کے لیے مخصوص ہے اور وہ ہر شے پر قدرت ہے ۔ “ ( نبی اکرم صلی اللہ علیہ وسلم فرماتے ہیں : ) تو اس شخص کے گناہوں کی مغفرت ہو جائے گی اگرچہ وہ سمندر کے جھاگ کی مانند ہوں ۔ “
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ۔

بنو ہاشم کے غلام ، ابوکثیر بیان کرتے ہیں : انہوں نے نبی اکرم صلی اللہ علیہ وسلم کے صحابی سیدنا ابوذر غفاری رضی اللہ عنہ کو یہ بیان کرتے ہوئے سنا : کچھ کلمات ہیں ، جنہیں ہر نماز کے بعد 100 مرتبہ پڑھا جاتا ہے : «الله اكبر» - «سبحان الله» ۔ «الحمد لله» اور یہ کلمہ : «لَا إِلَهَ إِلَّا اللهُ وَحْدَهُ لا شَرِيكَ لَهُ ، وَلَا حَوْلَ وَلَا قُوَّةَ إِلَّا بِاللَّهِ» ” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے اور اللہ تعالیٰ کی مدد کے بغیر کچھ نہیں ہو سکتا ۔ “ اگر اُس شخص کے گناہ سمندر کے جھاگ جتنے ہوں ، تو یہ کلمات انہیں مٹا دیں گے ۔ “
یہ روایت امام أحمد نے موقوف روایت کے طور پر نقل کی ہے اور ابوکثیر نامی راوی سے میں واقف نہیں ہوں اس روایت کے بقیہ رجال کی نقل کردہ حدیث حسن ہوتی ہے ۔

سیدنا عبداللہ بن عمر رضی اللہ عنہما بیان کرتے ہیں : ایک مرتبہ غریب مسلمانوں نے نبی اکرم صلی اللہ علیہ وسلم کی خدمت میں عرض کی : خوشحال لوگوں کو ان پر فضیلت عطا کی گئی ہے ، انہوں نے کہا: یا رسول اللہ ! ہمارے بھائی ہماری طرح تصدیق کرتے ہیں ، ہماری طرح ایمان لائے ہیں ہماری طرح روزے رکھتے ہیں ، لیکن ان کے پاس اموال ہیں ، جن میں سے وہ صدقہ کرتے ہیں اور جن کے ذریعے وہ صلہ رحمی کرتے ہیں اور اموال کو اللہ کی راہ میں خرچ کرتے ہیں ، جبکہ ہم لوگ غریب ہیں ، ہم ایسا کرنے کی قدرت نہیں رکھتے ہیں ، تو نبی اکرم صلی اللہ علیہ وسلم نے ارشاد فرمایا : ” کیا میں تمہیں ایسی چیز کے بارے میں نہ بتاؤں ؟ کہ جب تم وہ کام کر لو گے تو تم اس فضیلت تک پہنچ جاؤ گے ، جو ان لوگوں کو حاصل ہے ، تم لوگ ہر نماز کے بعد گیارہ مرتبہ «الله اكبر» پڑھو ، اتنی ہی مرتبہ «الحمدلله» پڑھو ، اتنی ہی مرتبہ «لا اله الا الله» پڑھو ، اور اتنی ہی مرتبہ «سبحان الله» پڑھو ، تو تم ان کی فضیلت کی مانند تک پہنچ جاؤ گے ۔ “
راوی بیان کرتے ہیں : تو ان لوگوں نے ایسا ہی کیا ، پھر ان لوگوں نے اس بات کا تذکرہ خوشحال لوگوں سے کیا ، تو خوشحال لوگوں نے بھی یہ عمل کرنا شروع کر دیا ، غریب لوگ پھر نبی اکرم صلی اللہ علیہ وسلم کے پاس واپس آئے اور آپ کے سامنے یہ صورتحال ذکر کی اور یہ کہا: ہمارے ان بھائیوں نے بھی اسی طرح پڑھنا شروع کر دیا ہے جس طرح ہم پڑھتے ہیں ، تو نبی اکرم صلی اللہ علیہ وسلم نے ارشاد فرمایا : ” یہ اللہ تعالیٰ کا فضل ہے ، وہ جسے چاہتا ہے اُسے عطا کر دیتا ہے ، اسے غریبوں کے گروہ ! کیا میں تمہیں خوشخبری نہ سناؤں ؟ غریب مسلمان ، امیر لوگوں سے نصف دن پہلے جنت میں داخل ہوں گے ، جو ( نصف دن ) 500 سال کا ہو گا ۔ “
پھر موسیٰ بن عبیدہ نامی راوی نے یہ آیت تلاوت کی : «وَإِنَّ يَوْمًا عِنْدَ رَبِّكَ كَأَلْفِ سَنَةٍ مِمَّا تَعُدُّونَ» ( الحج : 47 ) ” اور تمہارے پروردگار کے نزدیک ایک دن تمہاری گنتی کے حساب سے ایک ہزار سال جتنا ہے ۔ “
یہ روایت امام بزار نے نقل کی ہے اور اس کی سند میں ایک راوی موسیٰ بن عبیدہ ربذی ہے اور وہ ضعیف ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ ام سلیم رضی اللہ عنہا کو دیکھا کہ وہ اپنے گھر میں نماز ادا کر رہی تھیں ، تو آپ صلی اللہ علیہ وسلم نے ارشاد فرمایا : اے ام سلیم ! جب تم نماز ادا کر لو ، تو تم دس مرتبہ «سبحان الله» ، دس مرتبہ «الحمد لله» ، دس مرتبہ «الله اكبر» پڑھو ، پھر تم جو چاہو ، سوال کرو ، اللہ تعالیٰ تم سے یہ فرمائے گا : جی ہاں ! جی ہاں ! جی ہاں ! ( یعنی میں نے تمہاری دعا کو قبول کیا ) وہ تین مرتبہ یہ کہے گا ۔
یہ روایت امام بزار نے نقل کی ہے ، اور امام ابویعلیٰ نے اس کی مانند نقل کی ہے ، تاہم انہوں نے یہ الفاظ نقل کئے ہیں : نبی اکرم صلی اللہ علیہ وسلم نے سیدہ ام سلیم رضی اللہ عنہا کے گھر میں نفل نماز ادا کی ، پھر آپ صلی اللہ علیہ وسلم نے ارشاد فرمایا : اے ام سلیم ۔ ۔ ۔ ۔ ۔ ۔ “ ۔ اس روایت کی سند میں ایک راوی عبدالرحمن بن اسحاق ابوشیبہ واسطی ہے اور وہ ضعیف ہے ۔

سیدہ ام مالک انصاریہ رضی اللہ عنہا کے بارے میں یہ بات منقول ہے : وہ گھی کا برتن لے کر نبی اکرم صلی اللہ علیہ وسلم کی خدمت میں حاضر ہوئیں ، نبی اکرم صلی اللہ علیہ وسلم نے سیدنا بلال رضی اللہ عنہ کو حکم دیا کہ وہ اس میں سے گھی نکال لیں ، پھر سیدنا بلال رضی اللہ عنہ نے اس خاتون کو وہ برتن واپس کر دیا ، جب وہ خاتون واپس گئی تو اس نے دیکھا کہ وہ برتن گھی سے بھرا ہوا ہے ، وہ خاتون نبی اکرم صلی اللہ علیہ وسلم کے پاس واپس آئی ، اس نے عرض کی : یا رسول اللہ ! کیا میرے بارے میں کوئی حکم نازل ہوا ہے ؟ نبی اکرم صلی اللہ علیہ وسلم نے دریافت کیا : اے ام مالک ! کیا ہوا ؟ اس خاتون نے عرض کی : آپ نے میرا تحفہ مجھے واپس کیوں کر دیا ؟ نبی اکرم صلی اللہ علیہ وسلم نے سیدنا بلال رضی اللہ عنہ کو بلایا اور ان سے اس بارے میں دریافت کیا ، تو انہوں نے عرض کی : اس ذات کی قسم ! جس نے آپ کو حق کے ہمراہ مبعوث کیا ہے ، میں نے اس برتن میں سے اتنا نکالا کہ مجھے حیا آنے لگی ، نبی اکرم صلی اللہ علیہ وسلم نے ارشاد فرمایا : اسے اُم مالک ! تمہیں مبارک ہو ، یہ وہ برکت ہے کہ جس کا ثواب اللہ تعالیٰ نے جلدی دیدیا ہے ، پھر نبی اکرم صلی اللہ علیہ وسلم نے اس خاتون کو یہ تعلیم دی کہ وہ ہر نماز کے بعد دس مرتبہ «سبحان الله» دس مرتبہ «الحمد لله »اور دس مرتبہ «الله اكبر» پڑھے ۔
یہ روایت امام طبرانی نے نقل کی ہے ، اس کی سند میں ایک راوی عطاء بن سائب ہے جو ثقہ ہے ، لیکن وہ اختلاط کا شکار ہو گیا تھا اور اس کی سند میں ایک ایسا راوی ہے جس کا نام بیان نہیں کیا گیا ، اس روایت کے بقیہ رجال ” صحیح “ کے رجال ہیں ۔

عون بن عبداللہ بن عتبہ بیان کرتے ہیں : ایک شخص نے سیدنا عبداللہ بن عمرو بن العاص رضی اللہ عنہ کے پہلو میں نماز ادا کی ، جب انہوں نے سلام پھیرا ، تو اس شخص نے انہیں یہ کہتے ہوئے سنا : «اللَّهُمَّ أَنْتَ السَّلَامُ ، وَمِنْكَ السَّلَامُ ، تَبَارَكْتَ يَا ذَا الْجَلَالِ وَالْإِكْرَامِ» ” اے اللہ ! بے شک تو سلامتی عطا کرنے والا ہے ، سلامتی تیری طرف سے حاصل ہوتی ہے ، تو برکت والا ہے ، اے جلال اور اکرام والے !“ ۔
پھر اس شخص نے ایک مرتبہ سیدنا عبداللہ بن عمر رضی اللہ عنہما کے پہلو میں نماز ادا کی ، تو اس نے انہیں بھی سلام کے بعد اس کی مانند کلمات کہتے ہوئے سنا ، وہ شخص ہنس پڑا ، سیدنا عبداللہ بن عمر رضی اللہ عنہما نے اس سے دریافت کیا : تم کس بات پر ہنسے ہو ؟ اس نے بتایا : میں نے سیدنا عبداللہ بن عمرو رضی اللہ عنہ کے پہلو میں نماز ادا کی تھی ، تو میں نے انہیں بھی اس کی مانند کلمات پڑھتے ہوئے سنا تھا ، تو سیدنا عبداللہ بن عمر رضی اللہ عنہما نے بتایا : نبی اکرم صلی اللہ علیہ وسلم یہ ( کلمات ) پڑھا کرتے تھے ۔
یہ روایت امام طبرانی نے نقل کی ہے ، اور اس کے رجال ” صحیح“ کے رجال ہیں ۔

عبداللہ بن ابوہذیل بیان کرتے ہیں : پہلے لوگ اس بات کو پسند کرتے تھے کہ جب کوئی شخص نماز ادا کر لے ، تو وہ یہ پڑھے :
«اللَّهُمَّ أَنْتَ السَّلَامُ ، وَمِنْكَ السَّلَامُ ، تَبَارَكْتَ يَا ذَا الْجَلَالِ وَالْإِكْرَامِ»
” اے اللہ ! بے شک تو سلامتی عطا کرنے والا ہے ، سلامتی تیری طرف سے ہی حاصل ہوتی ہے ، تو برکت والا ہے ، اے جلال اور اکرام والے ۔ “
یہ روایت امام ابویعلیٰ نے نقل کی ہے اور اس کے رجال ” صحیح “ کے رجال ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ہر فرض نماز کے بعد آیت الکرسی پڑھ لے گا ، اُس کے جنت میں داخل ہونے کے لئے رکاوٹ صرف موت ہو گی ۔ “

ایک روایت میں یہ الفاظ ہیں : ” «قُلْ هُوَ اللَّهُ أَحَدٌ» “ ( یعنی جو ہر نماز کے بعد سورہ اخلاص پڑھ لے گا ، اس کے جنت میں داخلے کے لئے رکاوٹ صرف موت ہو گی ) ۔
یہ روایت امام طبرانی نے معجم کبیر اور معجم اوسط میں مختلف اسانید کے ساتھ نقل کی ہے ، جن میں سے ایک سند عمدہ ہے ۔

سیدنا امام حسن بن علی رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص فرض نماز کے بعد آیت الکرسی پڑھ لے گا ، وہ اگلی نماز تک اللہ تعالیٰ کی پناہ میں ہو گا ۔ “
یہ روایت امام طبرانی نے نقل کی ہے اور اس کی سند حسن ہے ۔

سیدنا جابر بن عبداللہ رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تین چیزیں ایسی ہیں ، جو شخص ایمان کے ہمراہ انہیں لے کر آئے گا ، وہ جنت کے جس دروازے سے چاہے گا ، اندر داخل ہو جائے گا اور جس حورعین سے وہ چاہے گا ، اس کی شادی ہو جائے گی ، ( وہ تین امور یہ ہیں : ) وہ شخص اپنے قاتل سے درگزر کرے ، پوشیدہ قرض ادا کر دے اور ہر فرض نماز کے بعد دس مرتبہ سورہ اخلاص پڑھے ۔ “ راوی کہتے ہیں : سیدنا ابوبکر رضی اللہ عنہ نے عرض کی : یا رسول اللہ ! اگر وہ ان میں سے کوئی ایک چیز کر لے ؟ نبی اکرم صلی اللہ علیہ وسلم نے فرمایا : اگر وہ ان میں سے کوئی ایک کر لے ( یعنی تو بھی یہی اجر و ثواب حاصل ہو گا ) ۔
یہ روایت امام ابویعلیٰ نے نقل کی ہے ، اس کی سند میں ایک راوی عمر بن نبہان ہے اور وہ متروک ہے ۔

عبداللہ بن ارقم اپنے والد کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص ہر نماز کے بعد تین مرتبہ یہ پڑھے :
«سُبْحَانَ رَبِّكَ رَبِّ الْعِزَّةِ عَمَّا يَصِفُونَ ، وَسَلَامٌ عَلَى الْمُرْسَلِينَ ، وَالْحَمْدُ لِلَّهِ رَبِّ الْعَالَمِينَ»
” تمہارا پروردگار جو غلبے والا پروردگار ہے ، وہ ان چیزوں سے پاک ہے ، جو وہ ( اس کی ) صفت بیان کرتے ہیں ، اور رسولوں پر سلام ہو ، اور ہر طرح کی حمد اللہ تعالیٰ کے لیے مخصوص ہے ، جو تمام جہانوں کا پروردگار ہے ۔ “
تو وہ اجر کا ایک مکمل ” جریب “ ( یہ اناج کو ماپنے کا ایک آلہ ہوتا ہے ) حاصل کر لیتا ہے ۔ “
یہ روایت امام طبرانی نے نقل کی ہے ، اس کی سند میں ایک راوی عبدالمنعم بن بشیر ہے اور وہ انتہائی ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : ہمیں نبی اکرم صلی اللہ علیہ وسلم کی نماز ختم ہونے کا ، آپ کے یہ پڑھنے سے پتہ چلتا تھا : «سُبْحَانَ رَبِّكَ رَبِّ الْعِزَّةِ عَمَّا يَصِفُونَ ، وَسَلَامٌ عَلَى الْمُرْسَلِينَ ، وَالْحَمْدُ لِلَّهِ رَبِّ الْعَالَمِينَ» ” تمہارا پروردگار جو غلبے والا پروردگار ہے ، وہ ان چیزوں سے پاک ہے ، جو وہ ( اس کی ) صفت بیان کرتے ہیں ، اور رسولوں پر سلام ہو اور ہر طرح کی حمد اللہ تعالیٰ کے لیے مخصوص ہے ، جو تمام جہانوں کا پروردگار ہے ۔ “
یہ روایت امام طبرانی نے نقل کی ہے ، اس کی سند میں ایک راوی محمد بن عبداللہ بن عبید بن عمیر ہے اور وہ متروک ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص نماز کے بعد یہ پڑھتا ہے : «سُبْحَانَ اللَّهِ الْعَظِيمِ وَبِحَمْدِهِ ، وَلَا حَوْلَ وَلَا قُوَّةَ إِلَّا بِاللَّهِ» ” اللہ تعالیٰ کی ذات ہر عیب سے پاک ہے ، جو عظمت والا ہے اور حمد اسی کے لیے مخصوص ہے ، اللہ تعالیٰ کی مدد کے بغیر کچھ نہیں ہو سکتا ۔ “ نبی اکرم صلی اللہ علیہ وسلم فرماتے ہیں : جب وہ شخص اُٹھتا ہے تو اس کی مغفرت ہو چکی ہوتی ہے ۔
یہ روایت امام بزار نے ابوزہراء کی سیدنا انس رضی اللہ عنہ سے نقل کردہ روایت کے طور پر نقل کی ہے اور ابوزہراء نامی راوی سے میں واقف نہیں ہوں ، اس روایت کے بقیہ رجال ” ثقہ “ ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم جب نماز ادا کر لیتے تھے ، تو آپ یہ پڑھتے تھے : ” «لَا إِلَهَ إِلَّا اللَّهُ وَحْدَهُ لَا شَرِيكَ لَهُ ، لَهُ الْمُلْكُ وَلَهُ الْحَمْدُ ، يُحْيِي وَيُمِيتُ ، وَهُوَ عَلَى كُلِّ شَيْءٍ قَدِيرٌ ، اللَّهُمَّ لَا مَانِعَ لِمَا أَعْطَيْتَ ، وَلَا مُعْطِيَ لِمَا مَنَعْتَ ، وَلَا يَنْفَعُ ذَا الْجَدِّ مِنْكَ الْجَدُّ ۔ » ، ” اللہ تعالیٰ کے علاوہ کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے ، حمد اسی کے لیے مخصوص ہے ، وہ زندگی دیتا ہے اور وہ موت دیتا ہے اور وہ ہر شے پر قدرت رکھتا ہے ، اے اللہ ! جسے تو عطا کرے اسے کوئی رکاوٹ بننے والا نہیں ہے ، اور جسے تو عطا نہ کرے ، اُسے کوئی دینے والا نہیں ہے اور تیرے مقابلے میں کوشش کرنے والے کی کوشش فائدہ نہیں دیتی ۔ “
یہ روایت امام بزار نے نقل کی ہے اور اس کی سند عمدہ ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم جب نماز پڑھ کر فارغ ہوتے تھے تو آپ یہ پڑھتے تھے :
«لَا إِلَهَ إِلَّا اللَّهُ وَحْدَهُ لَا شَرِيكَ لَهُ ، لَهُ الْمُلْكُ ، وَلَهُ الْحَمْدُ ، بِيَدِهِ الْخَيْرُ ، وَهُوَ عَلَى كُلِّ شَيْءٍ قَدِيرٌ ، اللَّهُمَّ لَا مَانِعَ لِمَا أَعْطَيْتَ ، وَلَا مُعْطِيَ لِمَا مَنَعْتَ ، وَلَا يَنْفَعُ ذَا الْجَدِّ مِنْكَ الْجَدُّ»
” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے ، حمد اسی کے لیے مخصوص ہے ، ہر بھلائی اسی کے دست قدرت میں ہے اور وہ ہر شے پر قدرت رکھتا ہے ، اے اللہ ! جسے تو عطا کرے اسے کوئی رکاوٹ بننے والا نہیں ہے اور جسے تو عطا نہ کرے ، اُسے کوئی دینے والا نہیں ہے ، اور تیرے مقابلے میں کسی کوشش کرنے والے کی کوشش کام نہیں آتی ۔ “
یہ روایت امام بزار نے نقل کی ہے اور امام طبرانی نے اس کی مانند نقل کی ہے ، تاہم انہوں نے یہ الفاظ زائد نقل کئے ہیں : ” وہ زندگی دیتا ہے اور وہ موت دیتا ہے “ اور انہوں نے یہ الفاظ نقل نہیں کئے ہیں : ” ہر قسم کی بھلائی اسی کے دست قدرت میں ہے ۔ “
ان دونوں کی سند حسن ہے ۔

سیدنا مغیرہ بن شعبہ رضی اللہ عنہ بیان کرتے ہیں : نبی اکرم صلی اللہ علیہ وسلم ہر نماز کے بعد یہ پڑھا کرتے تھے : «لَا إِلَهَ إِلَّا اللَّهُ وَحْدَهُ لَا شَرِيكَ لَهُ ، لَهُ الْمُلْكُ وَلَهُ الْحَمْدُ ، يُحْيِي وَيُمِيتُ وَهُوَ حَيٌّ لَا يَمُوتُ ، بِيَدِهِ الْخَيْرُ ، وَهُوَ عَلَى كُلِّ شَيْءٍ قَدِيرٌ»
” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے ، حمد اسی کے لیے مخصوص ہے وہ زندگی دیتا ہے اور وہ موت دیتا ہے اور وہ زندہ ہے اُسے موت نہیں آئے گی ، ہر قسم کی بھلائی اسی کے دست قدرت میں ہے اور وہ ہر شے پر قدرت رکھتا ہے ۔ “
( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں اختصار کے ساتھ منقول ہے ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

مکحول بیان کرتے ہیں : میں نے سیدنا معاویہ رضی اللہ عنہ کو منبر پر یہ بیان کرتے ہوئے سنا : نبی اکرم صلی اللہ علیہ وسلم جب نماز پڑھ کر فارغ ہوتے تھے تو آپ صلی اللہ علیہ وسلم یہ پڑھتے تھے : «لَا إِلَهَ إِلَّا اللَّهُ وَحْدَهُ لَا شَرِيكَ لَهُ ، لَهُ الْمُلْكُ وَلَهُ الْحَمْدُ ، وَهُوَ عَلَى كُلِّ شَيْءٍ قَدِيرٌ ، اللَّهُمَّ لَا مَانِعَ لِمَا أَعْطَيْتَ ، وَلَا مُعْطِيَ لِمَا مَنَعْتَ ، وَلَا يَنْفَعُ ذَا الْجَدِّ مِنْكَ الْجَدُّ»
” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے اور حمد اسی کے لیے مخصوص ہے ، اور وہ ہر شے پر قدرت رکھتا ہے ، اے اللہ ! جسے تو عطا کرے اسے کوئی رکاوٹ بننے والا نہیں ہے ، اور جسے تو عطا نہ کرے ، اُسے کوئی دینے والا نہیں ہے اور تیرے مقابلے میں کوشش کرنے والے کی کوشش کام نہیں آتی ۔ “

یہ روایت امام طبرانی نے نقل کی ہے اور اس کی سند میں ایک راوی عبدالعزیز بن عبیداللہ ہے اور وہ ضعیف ہے ۔

سیدنا ابوایوب انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دس کلمات ایسے ہیں ، جو شخص نماز ادا کرنے کے بعد انہیں پڑھے :« لَا إِلَهَ إِلَّا اللَّهُ وَحْدَهُ لَا شَرِيكَ لَهُ ، لَهُ الْمُلْكُ وَلَهُ الْحَمْدُ ، وَهُوَ عَلَى كُلِّ شَيْءٍ قَدِيرٌ »” اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، بادشاہی اسی کے لئے مخصوص ہے اور حمد اسی کے لیے مخصوص ہے اور وہ ہر شے پر قدرت رکھتا ہے ۔ “ نبی اکرم صلی اللہ علیہ وسلم فرماتے ہیں : تو اللہ تعالیٰ ان کلمات کی وجہ سے ان کے لئے دس نیکیاں نوٹ کر لیتا ہے اور ان کی وجہ سے اس شخص کے دس گناہ مٹا دیتا ہے ، اور ان کلمات کی وجہ سے ، اس شخص کے دس درجات بلند کرتا ہے اور یہ کلمات اُس شخص کے لئے دس غلام آزاد کرنے کے ثواب کے برابر ہوتے ہیں ، اور یہ کلمات اس شخص کے لئے شام تک کے لئے شیطان سے بچاؤ کا باعث ہوتے ہیں ، اور جو شخص شام کے وقت ان کلمات کو پڑھ لے گا ، تو صبح ہونے تک اسے یہی اجر و ثواب حاصل ہو گا ۔ “
یہ روایت امام طبرانی نے نقل کی ہے ، اور اس کے رجال ” ثقہ “ ہیں ۔