مجمع الزوائد ومنبع الفوائد

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم نے دریافت کیا : ” کیا میں تمہاری رہنمائی جنت کے دروازوں میں سے ایک دروازے کی طرف نہ کروں ؟ سیدنا معاذ رضی اللہ عنہ نے دریافت کیا : وہ کیا ہے ؟ نبی نے فرمایا : ” «لَا حَوْلَ وَلَا قُوَّةَ الَّا بِاللهِ پڑهنا» ۔ “ ”
یہ روایت امام أحمد اور امام طبرانی نے نقل کی ہے , تاہم امام طبرانی نے یہ الفاظ نقل کیے ہیں : ” کیا میں تمہاری رہنمائی جنت کے خزانوں میں سے ایک خزانہ کی طرف نہ کروں ؟ ۔ ۔ ۔ ۔ ۔ ۔ ان دونوں روایات کے رجال ” صحیح“ کے رجال ہیں ، صرف عطاء بن سائب کا معاملہ مختلف ہے ، حماد بن سلمہ نے اس کے حوالے سے اس کے اختلاط کا شکار ہونے سے پہلے روایات نقل کی تھیں ۔

سیدنا ابوایوب انصاری رضی اللہ عنہ بیان کرتے ہیں : جس رات نبی اکرم صلی اللہ علیہ وسلم کو معراج کروائی گئی ، آپ صلی اللہ علیہ وسلم کا گزر سیدنا ابراہیم علیہ السلام کے پاس سے ہوا ، انہوں نے دریافت کیا : اے جبرائیل ! یہ تمہارے ساتھ کون ہیں ؟ سیدنا جبرائیل علیہ السلام نے بتایا : یہ سیدنا محمد صلی اللہ علیہ وسلم ہیں ، سیدنا ابراہیم علیہ السلام نے نبی اکرم صلی اللہ علیہ وسلم سے کہا: آپ اپنی امت کو یہ حکم دیں کہ وہ کثرت کے ساتھ جنت میں پودے لگائے ، کیونکہ اس کی مٹی پاکیزہ ہے اور زمین کھلی ہے ، نبی اکرم صلی اللہ علیہ وسلم نے دریافت کیا : اُس میں پودے لگانے سے مراد کیا ہے ؟ انہوں نے جواب دیا : «لا حَوْلَ وَلَا قُوَّةَ إِلَّا بِاللهِ» پڑھنا ۔ “
یہ روایت امام أحمد اور امام طبرانی نے نقل کی ہے ، تاہم انہوں نے یہ الفاظ نقل کئے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” جس رات مجھے معراج کروائی گئی ، میرا گزر سیدنا ابراہیم علیہ السلام کے پاس سے ہوا ، انہوں نے دریافت کیا : اے جبرائیل ! تمہارے ساتھ کون ہیں ؟ تو جبرائیل نے بتایا : یہ سیدنا محمد صلی اللہ علیہ وسلم ہیں ، انہوں نے مجھے سلام کیا اور مجھے خوش آمدید کہا: اور یہ فرمایا : آپ اپنی امت کو یہ حکم دیں ۔ ۔ ۔ ۔ ۔ ۔ “ ۔ اس کے بعد راوی نے پوری روایت حسب سابق ذکر کی ہے ۔ امام أحمد کے رجال ” صحیح “ کے رجال ہیں ، صرف عبداللہ بن عبدالرحمن بن عبداللہ بن عمر بن خطاب کا معاملہ مختلف ہے ، وہ ثقہ ہے ، کسی نے اس کے بارے میں کلام نہیں کیا ہے ، ابن حبان نے اسے ثقہ قرار دیا ہے ۔

عبداللہ بن سعد بن ابی وقاص بیان کرتے ہیں : سیدنا ابوایوب انصاری رضی اللہ عنہ نے مجھ سے فرمایا : کیا میں تمہیں ایسے کلمہ کی تعلیم نہ دوں ، جس کی تعلیم نبی اکرم صلی اللہ علیہ وسلم نے مجھے دی تھی ؟ میں نے جواب دیا : جی ہاں ! تو انہوں نے فرمایا : ” جب نبی اکرم صلی اللہ علیہ وسلم میرے ہاں آ کر ٹھہرے تھے تو آپ صلی اللہ علیہ وسلم نے ارشاد فرمایا : اے ابوایوب ! کیا میں تمہیں ایک ایسے کلمے کی تعلیم نہ دوں جو جنت کے خزانوں میں سے ہے ؟ میں نے عرض کی : جی ہاں ! یا رسول اللہ ! میرے ماں باپ آپ پر قربان ہوں ، نبی اکرم صلی اللہ علیہ وسلم نے ارشاد فرمایا : تم کثرت کے ساتھ «لَا حَوْلَ وَلَا قُوَّةَ إِلَّا بِاللهِ» پڑھا کرو ۔ “
یہ روایت امام طبرانی نے معجم کبیر اور معجم اوسط میں دو اسناد کے ساتھ نقل کی ہے ، ان دونوں میں سے ایک کے رجال ” ثقہ “ ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جنت میں زیادہ پودے لگاؤ ! کیونکہ اس کا پانی میٹھا ہے اور اس کی مٹی پاکیزہ ہے اور اس میں زیادہ پودے لگانے کا طريقه «لا حَوْلَ وَلَا قُوَّةَ إِلَّا بِاللهِ» پڑھنا ہے ۔ “
یہ روایت امام طبرانی نے نقل کی ہے ، اس کی سند میں ایک راوی عقبہ بن علی ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” «لَا حَوْلَ وَلَا قُوَّةَ إِلَّا بِالله» پڑھنا ننانوے بیماریوں کی دوا ہے ، جن میں سے سب سے ہلکی بیماری پریشانی ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی بشر بن رافع حارثی ہے اور وہ ضعیف ہے ، ویسے اس کی توثیق کی گئی ہے ، اس روایت کے بقیہ رجال ” صحیح “ کے رجال ہیں ، البتہ معجم اوسط کے نسخے میں ، محمد نامی راوی کے والد عجلان کا نام نہیں ہے ، جو اس کے اور سیدنا ابوہریرہ رضی اللہ عنہ کے درمیان موجود راوی ہے ، باقی اللہ بہتر جانتا ہے ۔

سیدنا زید بن ثابت رضی اللہ عنہ بیان کرتے ہیں : نبی اکرم صلی اللہ علیہ وسلم نے فرمایا : ” کیا میں تم لوگوں کی رہنمائی جنت کے خزانوں میں سے ایک خزانہ کی طرف نہ کروں ؟ تم لوگ کثرت کے ساتھ «لا حَوْلَ وَلَا قُوَّةَ إِلَّا بِاللهِ» پڑھا کرو ۔ “
یہ روایت امام طبرانی نے نقل کی ہے ، اس کی سند میں ایک راوی عبداللہ بن عامر اسلمی ہے اور وہ ضعیف ہے ۔

سیدنا زید بن اسحاق انصاری رضی اللہ عنہ بیان کرتے ہیں : نبی اکرم صلی اللہ علیہ وسلم نے مسجد کے دروازے پر مجھے پایا تو ارشاد فرمایا : کیا میں تمہاری رہنمائی جنت کے خزانوں میں سے ایک خزانہ کی طرف نہ کروں ؟ میں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے فرمایا : «لا حَوْلَ وَلَا قُوَّةَ إِلَّا بِاللهِ» ( پڑھنا ) ۔ “
یہ روایت امام طبرانی نے نقل کی ہے ، اس کے سماعت والے نسخے اور دیگر نسخوں میں ابن لہیعہ اور ان کے درمیان کے راوی ساقط ہیں ۔

سیدنا معاویہ بن حیدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : «لَا حَوْلَ وَلَا قُوَّةَ إِلَّا بِاللهِ» - جنت کے خزانوں میں سے ایک خزانہ ہے ۔ “
یہ روایت امام طبرانی نے نقل کی ہے ۔

سیدنا قیس بن سعد بن عبادہ رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم نے ارشاد فرمایا : راوی کہتے ہیں ، میں اُس وقت صبح کی نماز ادا کرنے کے بعد لیٹ گیا تھا ، نبی اکرم صلی اللہ علیہ وسلم نے مجھے پاؤں مارا اور ارشاد فرمایا : ” کیا میں تمہاری رہنمائی جنت کے خزانوں میں سے ایک خزانہ کی طرف نہ کروں ؟ آپ نے فرمایا : ” «لَا حَوْلَ وَلَا قَوَّةَ إِلَّا بِاللهِ» ( پڑھنا ہے ) ۔ “
یہ روایت امام بزار نے نقل کی ہے اور اس کے رجال ” صحیح “ کے رجال ہیں ، صرف میمون بن ابوشبیب کا معاملہ مختلف ہے اور وہ ثقہ ہے ۔

سیدنا ابوہریرہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ مدینہ منورہ میں کسی جگہ پر چلتا ہوا جا رہا تھا ، آپ صلی اللہ علیہ وسلم نے مجھ سے فرمایا : اے ابوہریرہ ! میں نے عرض کی : یا رسول اللہ ! میں حاضر ہوں ، نبی اکرم صلی اللہ علیہ وسلم نے فرمایا : ( دنیا میں ) مال و دولت کے حوالے سے کثرت والے لوگ ، قیامت کے دن قلت والے ہوں گے ، البتہ اس شخص کا معاملہ مختلف ہے جو اپنے مال کے بارے میں اس اس طرح کرتا ہے ( یعنی اس کو اللہ کی راہ میں خرچ کرتا ہے ) نبی اکرم صلی اللہ علیہ وسلم نے اپنے دست مبارک کے ذریعے اپنے دائیں طرف اور بائیں طرف اشارہ کر کے یہ بات ارشاد فرمائی : ” اور ایسے لوگ کم ہیں ۔ “ پھر آپ صلی اللہ علیہ وسلم نے ارشاد فرمایا : اے ابوہریرہ ! کیا میں تمہاری رہنمائی جنت کے خزانوں میں سے ایک خزانہ کی طرف نہ کروں ؟ میں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے فرمایا : ” «لَا حَوْلَ وَلَا قُوَّةَ إِلَّا بِاللهِ ولا منجا من الله إِلَّا اليه» ( پڑھنا ) ۔ “ ( اللہ تعالیٰ کی مدد کے بغیر کچھ نہیں ہو سکتا اور اللہ تعالیٰ کے سامنے صرف اسی کی پناہ لی جا سکتی ہے ) ۔ نبی اکرم صلی اللہ علیہ وسلم نے ارشاد فرمایا : اے ابوہریرہ ! کیا تم یہ بات جانتے ہو کہ بندوں پر اللہ تعالیٰ کا حق کیا ہے ، اور اللہ تعالیٰ پر بندوں کا حق کیا ہے ؟ میں نے عرض کی : اللہ تعالیٰ اور اس کا رسول زیادہ بہتر جانتے ہیں ، نبی اکرم صلی اللہ علیہ وسلم نے ارشاد فرمایا : بندوں پر اللہ تعالیٰ کا حق یہ ہے کہ وہ اس کی عبادت کریں اور کسی کو اس کا شریک نہ ٹھہرائیں اور اللہ تعالیٰ پر بندوں کا حق یہ ہے کہ وہ ایسے کسی شخص کو عذاب نہ دے ، جو کسی کو اس کا شریک نہ ٹھہراتا ہو ۔ “
یہ روایت امام بزار نے اسی طرح طویل روایت کے طور پر نقل کی ہے اور اسے مختصر طور پر بھی نقل کیا ہے ، ان دونوں کے رجال ” صحیح “ کے رجال ہیں ، صرف کمیل بن زیاد کا معاملہ مختلف ہے اور وہ ثقہ ہے ۔

سیدنا عبداللہ بن مسعود رضی اللہ عنہ فرماتے ہیں : میں نبی اکرم صلی اللہ علیہ وسلم کے پاس موجود تھا ، میں نے کہا: ” «لَا حَوْلَ وَلَا قُوَّةَ الا بالله» نبی اکرم صلی اللہ علیہ وسلم نے ارشاد فرمایا : کیا تم جانتے ہو اس کی وضاحت کیا ہے ؟ میں نے عرض کی : اللہ تعالیٰ اور اس کا رسول صلی اللہ علیہ وسلم زیادہ بہتر جانتے ہیں ، نبی اکرم صلی اللہ علیہ وسلم نے فرمایا : ” ( اس سے مراد یہ ہے : ) اللہ تعالیٰ کی نافرمانی سے ، صرف اللہ تعالیٰ کی عطا کی ہوئی عصمت کے ذریعے ہی بچا جا سکتا ہے ، اور اللہ تعالیٰ کی فرمانبرداری کی قوت ، صرف اللہ تعالیٰ کی دی ہوئی مدد کے ذریعے حاصل ہو سکتی ہے ۔ “
یہ روایت امام بزار نے دو اسناد کے ساتھ نقل کی ہے ، ان دونوں میں سے ایک کی سند منقطع ہے ، اس میں ایک راوی عبداللہ بن خراش ہے ، جس پر ضعیف ہونا غالب ہے ، اور دوسری سند متصل اور حسن ہے ۔

سیدنا فضالہ بن عبید رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص جنت کا خزانہ چاہتا ہو اس پر لازم ہے کہ وہ «لا حَوْلَ وَلَا قُوَّةَ إِلَّا بِالله» پڑھے ۔ “
یہ روایت امام طبرانی نے عبداللہ بن یزید کے حوالے سے ، ربیعہ بن یورا سے نقل کی ہے اور عبداللہ نامی راوی سے میں واقف نہیں ہوں ، اس روایت کے بقیہ رجال ” ثقہ “ ہیں ۔

سیدنا عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کو اللہ تعالیٰ کوئی نعمت عطا کرے اور وہ اس نعمت کو باقی رکھنے کا ارادہ رکھتا ہو تو اسے کثرت کے ساتھ «لا حَوْلَ وَلَا قُوَّةَ إِلَّا بِاللهِ» پڑھنا چاہیے ۔ “ پھر نبی اکرم صلی اللہ علیہ وسلم نے یہ آیت تلاوت کی : ﴿وَلَوْلَا إِذْ دَخَلْتَ جَنَّتَكَ قُلْتَ مَا شَاءَ اللَّهُ لَا قُوَّةَ إِلَّا بِاللَّهِ﴾ ( الكهف : 39 )
” اور جب تم اپنے باغ میں داخل ہوئے تھے ، اس وقت تم نے یہ کیوں نہیں کہا: ؟ جو اللہ چاہے اور اللہ کی مدد کے بغیر کوئی قوت نہیں ہے ۔ “
یہ روایت امام طبرانی نے نقل کی ہے ، اس کی سند میں ایک راوی خالد بن نجیح ہے اور وہ کذاب ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : اے ابوہریرہ ! کیا میں تمہاری رہنمائی ، عرش کے نیچے موجود جنت کے خزانوں میں سے ایک خزانہ والے کلمے کی طرف نہ کروں ؟ راوی کہتے ہیں : میں نے عرض کی : جی ہاں ! میرے ماں باپ آپ پر قربان ہو جائیں ، نبی اکرم صلی اللہ علیہ وسلم نے فرمایا : تم «لَا حَوْلَ وَلَا قُوَّةَ إِلَّا بِاللهِ» پڑھو ! “ ۔ ابوبلچ نامی راوی کہتے ہیں : میرا خیال ہے ، روایت میں یہ الفاظ بھی ہیں : اللہ تعالیٰ فرماتا ہے : میرے بندے نے اطاعت و فرمانبرداری کی ۔ راوی کہتے ہیں : میں نے سیدنا ابوہریرہ رضی اللہ عنہ سے کہا: لا حَوْلَ وَلَا قُوَّةَ إِلَّا بِاللهِ کے الفاظ ہیں ؟ انہوں نے فرمایا : جی نہیں ! سورہ کہف میں یہ الفاظ ہیں :
﴿وَلَوْلَا إِذْ دَخَلْتَ جَنَّتَكَ قُلْتَ مَا شَاءَ اللَّهُ لَا قُوَّةَ إِلَّا بِاللَّهِ ﴾ ( الكهف : 39 )
” اور ایسا کیوں نہ ہوا کہ جب تم اپنے باغ میں داخل ہوئے تو تم یہ کہتے : جو اللہ نے چاہا ( ویسا ہوا ) اور اللہ تعالیٰ کی مدد کے بغیر کچھ نہیں ہو سکتا ۔ “
( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے امام ترمذی نے ایک حدیث نقل کی ہے جو اس روایت کے علاوہ ہے ۔
یہ روایت امام أحمد نے نقل کی ہے ، امام بزار نے اس کی مانند روایت نقل کی ہے ، تاہم انہوں نے یہ الفاظ نقل کئے ہیں : ” کیا میں تمہاری رہنمائی ، عرش کے نیچے موجود جنت کے خزانے کے ایک کلمے کی طرف نہ کروں ؟ ۔ ۔ ۔ ۔ ۔ ۔ ان دونوں روایات کے رجال ” صحیح “ کے رجال ہیں ، صرف ابوبلج کبیر کا معاملہ مختلف ہے اور وہ ثقہ ہے ۔