مجمع الزوائد ومنبع الفوائد

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن اللہ تعالیٰ فرمائے گا ، عنقریب اہل محشر جان لیں گے کہ کون لوگ کرم والے ہیں ؟ عرض کی گئی : یا رسول اللہ ! کرم والے لوگ کون ہیں ؟ نبی اکرم صلی اللہ علیہ وسلم نے فرمایا : مساجد میں ذکر کی محافل والے ۔ “
یہ روایت امام أحمد نے دو اسناد کے ساتھ نقل کی ہے ، ان دونوں میں سے ایک سند حسن ہے ، امام ابویعلیٰ نے بھی
یہ روایت اسی طرح نقل کی ہے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب بھی کچھ لوگ اکٹھے ہو کر ، اللہ کا ذکر کرتے ہیں اور وہ اس کے ذریعے صرف اس کی رضامندی چاہتے ہیں ، تو آسمان سے ایک منادی یہ اعلان کرتا ہے : تم ایسی حالت میں اُٹھ جاؤ کہ تمہاری مغفرت ہو چکی ہے ، اور میں نے تمہاری برائیوں کو نیکیوں میں تبدیل کر دیا ہے ۔ “
یہ روایت امام أحمد ، امام ابویعلیٰ ، امام بزار اور امام طبرانی نے معجم اوسط میں نقل کی ہے ، اس کی سند میں ایک راوی میمون مرئی ہے جس کو ایک جماعت نے ثقہ قرار دیا ہے ، اس میں ضعف پایا جاتا ہے ، امام أحمد کے بقیہ رجال ” صحیح “ کے رجال ہیں ۔

سیدنا انس بن مالک رضی اللہ عنہ بیان کرتے ہیں : سیدنا عبداللہ بن رواحہ رضی اللہ عنہ نبی اکرم صلی اللہ علیہ وسلم کے اصحاب سے تعلق رکھنے والے کسی فرد سے جب ملتے تھے تو یہ فرماتے تھے : آؤ ! تاکہ ہم گھڑی بھر کے لیے اپنے پروردگار پر ایمان لے آئیں ( یعنی گھڑی بھر کے لیے اُس کا ذکر کر لیں ) ایک دن انہوں نے ایک شخص سے یہی بات کہی ، تو وہ شخص غصے میں آ گیا ، وہ نبی اکرم صلی اللہ علیہ وسلم کے پاس گیا اور بولا: یا رسول اللہ ! کیا آپ نے ابن رواحہ کو ملاحظہ نہیں کیا ؟ کہ وہ آپ کے ایمان سے موڑ کر ، گھڑی بھر کے ایمان کی طرف ترغیب دیتا ہے ، نبی اکرم صلی اللہ علیہ وسلم نے ارشاد فرمایا : ” اللہ تعالیٰ ابن رواحہ پر رحم کرے ! اوہ ان محافل کو پسند کرتا ہے جن کے حوالے سے فرشتے فخر کا اظہار کرتے ہیں ۔ “
یہ روایت امام أحمد نے نقل کی ہے اور اس کی سند حسن ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا گزر سیدنا عبداللہ بن رواحہ رضی اللہ عنہ کے پاس سے ہوا ، جو اپنے اصحاب کے ہمراہ ذکر کر رہے تھے ( یعنی انہیں وعظ و نصیحت کر رہے تھے ) نبی اکرم صلی اللہ علیہ وسلم نے ارشاد فرمایا : تم لوگ ایسا گروہ ہو کہ اللہ تعالیٰ نے مجھے یہ حکم دیا ہے کہ میں اپنے آپ کو تمہارے ساتھ رکھوں ، پھر نبی اکرم صلی اللہ علیہ وسلم نے یہ آیت تلاوت کی : ” اور اپنے آپ کو ان لوگوں کے ساتھ رکھو جو صبح و شام اپنے پروردگار کو پکارتے ہیں ۔ ۔ ۔ ۔ ۔ ۔ “ ۔ یہ آیت یہاں تک ہے : ” اور اس کا معاملہ حد سے گزر گیا ۔ “ ( نبی اکرم صلی اللہ علیہ وسلم نے فرمایا : جہاں تک تمہاری تعداد میں بیٹھے ہوئے لوگوں کا تعلق ہے ، تو اتنی ہی تعداد میں فرشتے بھی ایسے لوگوں کے ساتھ بیٹھتے ہیں ، اگر وہ لوگ اللہ کی تسبیح بیان کرتے ہیں تو فرشتے بھی اس کی تسبیح بیان کرتے ہیں ، اگر وہ لوگ اللہ کی حمد بیان کرتے ہیں ، تو فرشتے بھی اس کی حمد بیان کرتے ہیں ، اگر وہ لوگ اللہ کی کبریائی کا ذکر کرتے ہیں ، تو فرشتے بھی اس کی کبریائی کا ذکر کرتے ہیں ، پھر وہ فرشتے اوپر پروردگار کی بارگاہ میں چلے جاتے ہیں ، وہ پروردگار ان فرشتوں سے زیادہ علم رکھتا ہے ، فرشتے عرض کرتے ہیں : اے ہمارے پروردگار ! تیرے بندے تیری تسبیح بیان کر رہے تھے ، تو ہم نے بھی تیری تسبیح بیان کی ، وہ تیری کبریائی بیان کر رہے تھے تو ہم نے بھی تیری کبریائی بیان کی ، وہ تیری حمد بیان کر رہے تھے تو ہم نے بھی تیری حمد بیان کی ، تو ہمارا پروردگار یہ فرماتا ہے : اے میرے فرشتو ! میں تمہیں گواہ بنا رہا ہوں کہ میں نے ان لوگوں کی مغفرت کر دی ہے ، فرشتے عرض کرتے ہیں : اُن کے درمیان فلاں اور فلاں خطاکار شخص موجود تھا ، تو اللہ تعالیٰ فرماتا ہے : وہ لوگ ( یعنی ذکر کرنے والے لوگ ) ایسے ہیں کہ ان کے ساتھ بیٹھا ہوا شخص بدنصیب ( یعنی محروم ) نہیں رہتا ہے ۔ “
یہ روایت امام طبرانی نے معجم صغیر میں نقل کی ہے ، اس کی سند میں ایک راوی محمد بن حماد کوفی ہے اور وہ ضعیف ہے ۔

سیدنا سہیل بن حنظلہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب بھی کچھ لوگ کسی محفل میں بیٹھ کر اللہ کا ذکر کرتے ہیں ، تو جب وہ اُٹھتے ہیں ، تو ان سے کہا: جاتا ہے : تم ایسی حالت میں اُٹھو کہ اللہ تعالیٰ نے تمہارے گناہوں کی مغفرت کر دی ہے ، اور تمہاری برائیوں کو نیکیوں میں تبدیل کر دیا گیا ہے ۔ “
یہ روایت امام طبرانی نے نقل کی ہے ، اس کی سند میں ایک راوی متوکل بن عبدالرحمن ہے جو محمد بن ابوسری کا والد ہے ، میں اس سے واقف نہیں ہوں ، اس روایت کے بقیہ رجال ” ثقہ “ ہیں ۔

سیدنا جابر بن عبداللہ رضی اللہ عنہما بیان کرتے ہیں : نبی اکرم صلی اللہ علیہ وسلم ہمارے پاس تشریف لائے ، آپ صلی اللہ علیہ وسلم نے ارشاد فرمایا : ” اے لوگو ! بے شک اللہ تعالیٰ کچھ فرشتوں کو بھیجتا ہے جو اللہ تعالیٰ کا احترام کرتے ہیں اور زمین میں ذکر کی محافل کے پاس ٹھہرتے ہیں ، تو تم لوگ جنت کے باغوں میں سے کچھ کھانے کے لئے حاصل کر لیا کرو ، لوگوں نے عرض کی : یا رسول اللہ ! جنت کے باغات کہاں ہیں ؟ نبی اکرم صلی اللہ علیہ وسلم نے ارشاد فرمایا : ذکر کی محافل ، تم لوگ صبح و شام اللہ کا ذکر کیا کرو ، اور دل میں بھی اس کا ذکر کیا کرو ، جو شخص یہ چاہتا ہو کہ وہ یہ بات جان لے کہ اللہ تعالیٰ کی بارگاہ میں اُس کی قدر و منزلت کیا ہے ؟ تو اُسے اس بات کا جائزہ لینا چاہئے کہ اُس کے نزدیک اللہ تعالیٰ کی عظمت کیا ہے ؟ کیونکہ اللہ تعالیٰ اپنی ذات کے حوالے سے بندے کو اُسی مقام پر رکھتا ہے ، جیسے بندہ اللہ تعالیٰ کو اپنے نزدیک سمجھتا ہے ۔ “
یہ روایت امام ابویعلیٰ ، امام بزار نے اور امام طبرانی نے اوسط میں نقل کی ہے ، اس کی سند میں ایک راوی عمر بن عبدالله ہے جو عفرہ کا غلام ہے ، ایک سے زیادہ افراد نے اسے ثقہ قرار دیا ہے جبکہ ایک جماعت نے اسے ضعیف کہا: ہے ، ان کے رجال ” صحیح “ کے رجال ہیں ۔

سیدنا عباس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ کے کچھ گھومنے پھرنے والے فرشتے ہوتے ہیں ، جو ذکر کے حلقوں کو تلاش کرتے ہیں ، جب وہ ان حلقوں کے پاس آتے ہیں ، تو انہیں ڈھانپ لیتے ہیں ، پھر وہ اپنے نمائندے کو آسمان کی طرف رب العزت کی بارگاہ میں بھیجتے ہیں اور کہتے ہیں : اے ہمارے پروردگار ! ہم تیرے بندوں میں سے کچھ بندوں کے پاس آئے ، جو تیری نعمتوں کی عظمتوں کا اعتراف کر رہے تھے ، اور تیری کتاب کی تلاوت کر رہے تھے ، اور تیرے نبی سیدنا محمد صلی اللہ علیہ وسلم پر درود بھیج رہے تھے ، اور وہ تجھ سے دنیا اور آخرت کا سوال کر رہے تھے ، تو پروردگار فرماتا ہے : تم میری رحمت کے ذریعے انہیں ڈھانپ لو ! فرشتے عرض کرتے ہیں : اے ہمارے پروردگار ! اُن کے درمیان فلاں گناہ گار شخص موجود تھا ، وہ ذرا سی دیر کے لیے اُن کے پاس آیا تھا ، تو پروردگار فرماتا ہے : تم اُن لوگوں کو میری رحمت کے ذریعے ڈھانپ لو ! کیونکہ وہ ساتھ بیٹھے ہوئے ایسے افراد ہیں کہ جن کے ساتھ بیٹھا ہوا شخص بدنصیب ( یعنی محروم ) نہیں رہتا ہے ۔ “
یہ روایت امام بزار نے زائدہ بن ابورقاد کے حوالے سے زیاد نمیری سے نقل کی ہے ، اور ان دونوں کے ضعیف ہونے کے باوجود ان کی توثیق کی گئی ہے ، تو یہ سند حسن ہو جاتی ہے ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن اللہ تعالیٰ کچھ ایسے لوگوں کو زندہ کرے گا جن کے چہروں پر نور ہو گا اور وہ موتیوں کے بنے ہوئے منبروں پر موجود ہوں گے اور لوگ اُن پر رشک کر رہے ہوں گے ، وہ نہ انبیاء ہوں گے اور نہ شہداء ہوں گے ، راوی بیان کرتے ہیں : تو ایک دیہاتی شخص گھٹنوں کے بل جھک گیا ، اُس نے عرض کی : یا رسول اللہ ! آپ ان کی صفت ہمارے سامنے بیان کیجئے ! تاکہ ہم انہیں پہچان لیں ، تو نبی اکرم صلی اللہ علیہ وسلم نے ارشاد فرمایا : ” وہ اللہ تعالیٰ کی خاطر ایک دوسرے سے محبت رکھنے والے لوگ ہوں گے ، جن کا تعلق مختلف قبائل سے اور مختلف علاقوں سے ہو گا اور وہ اللہ کے ذکر کی خاطر اکٹھے ہو کر اُس کا ذکر کرتے ہوں گے ۔ “
یہ روایت امام طبرانی نے نقل کی ہے اور اس کی سند حسن ہے ۔

سیدنا عمرو بن عبسہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ( قیامت کے دن ) رحمان کے دائیں طرف ۔ ویسے اُس کے دونوں ہاتھ دائیں ہیں ۔ ( اس کے دائیں طرف ) کچھ ایسے افراد ہوں گے جو نہ انبیاء ہوں گے اور نہ شہداء ہوں گے ، اُن کے چہرے کی چمک دیکھنے والوں کی نگاہ کو ڈھانپے ہوئے ہو گی ، انبیاء کرام اور شہداء اُن کے بیٹھنے کے مقام اور اللہ تعالیٰ کی بارگاہ کے قرب کے حوالے سے ان پر رشک کریں گے ، عرض کی گئی : یا رسول اللہ وہ کون ہوں گے ؟ نبی اکرم صلی اللہ علیہ وسلم نے ارشاد فرمایا : ” وہ مختلف قبائل سے تعلق رکھنے والے افراد ہوں گے ، جو اللہ کے ذکر کی خاطر اکٹھے ہوتے ہوں گے ، اور چن چن کر پاکیزہ باتیں یوں حاصل کریں گے جس طرح کھجور کھانے والا شخص ، عمدہ کھجوریں چن چن کر کھاتا ہے ۔ “
یہ روایت امام طبرانی نے نقل کی ہے اور اس کے رجال کی توثیق کی گئی ہے ۔

سیدنا عبادہ بن صامت رضی اللہ عنہ اللہ بیان کرتے ہیں : نبی اکرم صلی اللہ علیہ وسلم سے خواتین کے اجتماع کے بارے میں دریافت کیا گیا تو نبی اکرم صلی اللہ علیہ وسلم نے ارشاد فرمایا : ” خواتین کے اجتماع میں بھلائی نہیں ہے ، البتہ ذکر ، یا جنازے کا معاملہ مختلف ہے ، اُن کے اجتماع کی مثال ، جب وہ اکٹھی ہوتی ہیں ، تو ان کے اجتماع کی مثال صیقل کی مانند ہے کہ جب لوہے کو آگ میں داخل کیا جاتا ہے ، اور جب وہ گرم ہو جاتا ہے ، تو اُس پر ضرب لگائی جاتی ہے ، تو اس کے شرارے ہر اس چیز کو جلا دیتے ہیں ، جسے وہ لگتے ہیں ۔ “
یہ روایت امام طبرانی نے یحیی بن اسحاق کے حوالے سے سیدنا عبادہ رضی اللہ عنہ سے نقل کی ہے اور یحیی نامی راوی نے سیدنا عبادہ رضی اللہ عنہ کا زمانہ نہیں پایا ہے ، اس روایت کے بقیہ رجال ” صحیح “ کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : میں نے عرض کی : یا رسول اللہ ! ذکر کی محافل کی غنیمت کیا ہے ؟ نبی اکرم صلی اللہ علیہ وسلم نے ارشاد فرمایا : ” ذکر کی محافل کی غنیمت ، جنت ہے ، جنت ہے ۔ “
یہ روایت امام أحمد اور امام طبرانی نے نقل کی ہے ، امام أحمد کی سند حسن ہے ۔