مجمع الزوائد ومنبع الفوائد

سیدنا عمرو بن حریث رضی اللہ عنہ بیان کرتے ہیں : میری والدہ مجھے نبی اکرم صلی اللہ علیہ وسلم کے پاس لے گئیں ، نبی اکرم صلی اللہ علیہ وسلم نے میرے سر پر ہاتھ پھیرا ، اور میرے لئے رزق کی دعا کی ۔
یہ روایت امام ابویعلیٰ نے نقل کی ہے ۔

اُن کی نقل کردہ ایک روایت میں یہ الفاظ ہیں : میری والدہ ( راوی کو شک ہے ، شاید یہ الفاظ ہیں : ) میرے والد مجھے ساتھ لے کر گئے ۔ یہ دونوں روایات امام طبرانی نے مختلف اسانید کے ساتھ نقل کی ہیں ، امام ابویعلیٰ کے رجال اور طبرانی کی بعض اسانید کے رجال صحیح کے رجال ہیں ۔

سیدنا عمرو بن حریث رضی اللہ عنہ بیان کرتے ہیں : غزوہ بدر کے موقع پر میں اپنی والدہ کے پیٹ میں تھا ۔
یہ روایت امام طبرانی نے نقل کی ہے اور اس کی سند عمدہ ہے ۔

ابونعیم بیان کرتے ہیں : سیدنا عمرو بن حریث رضی اللہ عنہ کا انتقال 85 ہجری میں ہوا تھا ۔

ابوموسی بیان کرتے ہیں : جب نبی اکرم صلی اللہ علیہ وسلم کا وصال ہوا ، تو اس وقت سیدنا عمرو بن حریث رضی اللہ عنہ کی عمر بارہ سال تھی ۔ وہ بیان کرتے ہیں : سیدنا عمرو بن حریث رضی اللہ عنہ کی کنیت ابوسعید تھی ۔
یہ روایت امام طبرانی نے نقل کی ہے اور ابونعیم تک اس کے رجال ثقہ ہیں ۔