مجمع الزوائد ومنبع الفوائد

سیدنا عبدالله بن بسر رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنا دست مبارک میرے سر پر رکھا اور ارشاد فرمایا : یہ لڑکا ایک صدی تک زندہ رہے گا ، راوی کہتے ہیں : تو وہ ایک سو سال تک زندہ رہے تھے ۔ اُن کے چہرے میں دانے تھے ، نبی اکرم صلی اللہ علیہ وسلم نے فرمایا : یہ اس وقت تک نہیں مرے گا جب تک اس کے چہرے سے دانے ختم نہیں ہو جائیں گے ، راوی کہتے ہیں : تو ان کا انتقال اس وقت تک نہیں ہوا ، جب تک ان کے چہرے سے دانے رخصت نہیں ہو گئے ۔
یہ روایت امام طبرانی نے نقل کی ہے اور امام بزار نے اسے اختصار کے ساتھ صرف دانوں والے حصے کے ہمراہ نقل کیا ہے ، تاہم انہوں نے یہ الفاظ نقل کئے ہیں : نبی اکرم صلی اللہ علیہ وسلم نے فرمایا : ” یہ ایک صدی تک پہنچے گا ۔ “ امام بزار کی دو اسناد میں سے ایک کے رجال ثقہ ہیں ، صرف حسن بن ایوب حضرمی کا معاملہ مختلف ہے اور وہ ثقہ ہے ۔

حسن بن ایوب حضرمی بیان کرتے ہیں : سیدنا عبداللہ بن بسر رضی اللہ عنہ نے مجھے اپنی مانگ میں موجود ایک مسہ دکھایا اور بتایا کہ نبی اکرم صلی اللہ علیہ وسلم نے اس پر اپنا دست مبارک پھیرا تھا اور یہ فرمایا تھا : یہ ایک صدی تک پہنچے گا ، راوی کہتے ہیں : سیدنا عبداللہ رضی اللہ عنہ اپنے سر میں کنگھی کیا کرتے تھے ۔
یہ روایت امام طبرانی نے نقل کی ہے اور امام أحمد نے اس کی مانند نقل کی ہے ، امام أحمد کے رجال صحیح کے رجال ہیں ، صرف حسن بن ایوب کا معاملہ مختلف ہے اور وہ ثقہ ہے ، امام طبرانی کے رجال ثقہ ہیں ۔

سیدنا عبداللہ بن بسر رضی اللہ عنہ بیان کرتے ہیں : جب میری والدہ نے مجھے گچھے دے کر بھیجا ، تو میں نے انہیں نبی اکرم صلی اللہ علیہ وسلم تک پہنچانے سے پہلے ان میں سے کچھ کو کھا لیا ، جب میں وہ لے کر نبی اکرم صلی اللہ علیہ وسلم کے پاس آیا ، تو آپ نے میرے سر پر ہاتھ پھیرا اور فرمایا : اے ہیرا پھیری کرنے والے ۔
یہ روایت امام طبرانی نے نقل کی ہے ، اس کی سند میں ایک راوی عبداللہ بن بسر حیرانی ہے ، جسے ابن حبان نے ثقہ قرار دیا ہے اور جمہور نے اسے ضعیف کہا: ہے اس روایت کے بقیہ رجال ثقہ ہیں ۔