مجمع الزوائد ومنبع الفوائد

امام طبرانی بیان کرتے ہیں : سیدہ ام معبد خزاعیہ رضی اللہ عنہا کا نام عاتکہ بنت خالد بن منقذ بن ضبیس کعبیہ خزاعیہ ہے ۔

ہشام بن حرام اپنے والد کا یہ بیان نقل کرتے ہیں : سیدہ ام معبد رضی اللہ عنہا کو باقاعدگی سے لباس ، یمن سے آنے والا کچھ غلہ اور ان کے اونٹوں کے لئے قطران ( تارکول کی مانند ایک چیز جو بعض درختوں سے بنائی جاتی ہے ) ملا کرتا تھا ، سیدنا عثمان رضی اللہ عنہ ( ان کے پاس سے ) گزرے تو وہ بولیں : میرا لباس کہاں ہے ، اور میرا یمن کا غلہ کہاں ہے ؟ جو میرے پاس آنا تھا ، تو انہوں نے کہا: اے ام معبد ! وہ آپ کا ہے ، اور ہمارے پاس ہے ، پھر سیدہ ام معبد رضی اللہ عنہا ان کے پیچھے گئیں ، یہاں تک کہ سیدنا عثمان رضی اللہ عنہ نے وہ چیزیں انہیں دے دیں ۔
یہ روایت امام طبرانی نے نقل کی ہے اور ہشام بن حرام اور ان کے والد ان دونوں سے میں واقف نہیں ہوں ۔ اس روایت کے بقیہ رجال ” صحیح “ کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے نبی اکرم صلی اللہ علیہ وسلم کے مدینہ منورہ کی طرف ہجرت کرنے سے متعلق باب میں ان کا پورا واقعہ کتاب المغازی میں گزر چکا ہے ، اور اس کا ایک اور طریق علامات نبوت سے متعلق باب میں گزر چکا ہے جو نبی اکرم صلی اللہ علیہ وسلم کے حلیہ مبارک سے متعلق باب میں ہے ۔