مجمع الزوائد ومنبع الفوائد

محمد بن علی مدینی کہتے ہیں ۔ سیدہ اسماء بنت ابوبکر صدیق رضی اللہ عنہما کا انتقال تہتر ہجری میں ہوا تھا ، ان کا انتقال ان کے صاحبزادے سیدنا عبداللہ رضی اللہ عنہ کی شہادت کے کچھ دن بعد ہوا تھا ، سیدہ اسماء رضی اللہ عنہا ، سیدہ عائشہ رضی اللہ عنہا کی باپ کی طرف سے شریک بہن تھیں ، سیدہ اسماء بنت ابوبکر رضی اللہ عنہما کی والدہ کا نام قتیلہ بنت عبدالعزیٰ بن عبداسعد تھا اور ان کا تعلق بنو مالک بن حسل سے تھا ۔ سیدہ اسماء رضی اللہ عنہا کا جب انتقال ہوا اس وقت ان کی عمر ایک سو سال تھی ، سیدہ اسماء رضی اللہ عنہا سن ہجری کے آغاز سے ستائیس سال پہلے اور نبی اکرم صلی اللہ علیہ وسلم کی بعثت سے سترہ سال پہلے پیدا ہوئی تھیں ۔ سیدہ اسماء رضی اللہ عنہا کی پیدائش کے وقت سیدنا ابوبکر رضی اللہ عنہ کی عمر اکیس سال تھی ۔

یعلیٰ بن حرملہ بیان کرتے ہیں : میں سیدنا عبداللہ بن زبیر رضی اللہ عنہ کی شہادت کے بعد مکہ میں داخل ہوا تو ان کی والدہ سیدہ اسماء بنت ابوبکر رضی اللہ عنہما آئیں ، جو بوڑھی عمر رسیدہ خاتون تھیں ان کا قد طویل تھا اور بینائی ختم ہو چکی تھی ، انہوں نے حجاج سے کہا: کیا ابھی اس سوار کے لئے وہ وقت نہیں آیا کہ وہ نیچے اتر آئے ۔
یہ روایت امام طبرانی نے نقل کی ہے اس کی سند میں ایک راوی یحیی بن یعلیٰ ہے اور وہ ضعیف ہے ۔