مجمع الزوائد ومنبع الفوائد

زہری بیان کرتے ہیں : یہ سیدہ میمونہ رضی اللہ عنہا بنت حارث بن حزن بن بجیر بن ہزم بن رؤیبہ بن عبداللہ بن ہلال بن عامر بن صعصہ ہیں ، یہ وہ خاتون ہیں جنہوں نے اپنا آپ نبی اکرم صلی اللہ علیہ وسلم کو ہبہ کیا تھا ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا ابورافع رضی اللہ عنہ بیان کرتے ہیں : میں ایک مہم میں تھا ، نبی اکرم صلی اللہ علیہ وسلم نے فرمایا : تم جاؤ اور میمونہ کو میرے پاس لے آؤ ، میں نے عرض کی : یا رسول اللہ ! میں ایک مہم میں جانا چاہتا ہوں ، نبی اکرم صلی اللہ علیہ وسلم نے فرمایا : کیا تمہیں یہ بات پسند نہیں ہے جو مجھے پسند ہو ، میں نے کہا: جی ہاں ! نبی اکرم صلی اللہ علیہ وسلم نے فرمایا : تو پھر تم جاؤ اور اسے لے آؤ ، میں گیا اور انہیں لے آیا ۔
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ، صرف حسن بن علی بن ابورافع کا معاملہ مختلف ہے ، اور وہ ثقہ ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے سرف کے مقام پر سیدہ میمونہ رضی اللہ عنہا کے ساتھ شادی کی تھی ۔
یہ روایت امام طبرانی نے معجم اوسط میں نقل کی ہے اور اس کے رجال ” صحیح “ کے رجال ہیں ۔

یزید بن اصم بیان کرتے ہیں : مکہ میں نبی اکرم صلی اللہ علیہ وسلم کی زوجہ محترمہ سیدہ میمونہ رضی اللہ عنہا کی طبیعت خراب ہو گئی ، اس وقت ان کے بھتیجوں میں کوئی ان کے پاس موجود نہیں تھا ، تو انہوں نے فرمایا : تم لوگ مجھے مکہ سے باہر لے جاؤ کیونکہ میں یہاں نہیں مرنا چاہتی ، نبی اکرم صلی اللہ علیہ وسلم نے مجھے یہ بتایا ہے کہ میں مکہ میں نہیں مروں گی ، راوی کہتے ہیں ، تو وہ لوگ انہیں اٹھا کر سرف کے مقام پر اس درخت کے پاس لے آئے جہاں نبی اکرم صلی اللہ علیہ وسلم نے اُن کی رخصتی کروائی تھی اور اس درخت کے نیچے خیمے کی جگہ تھی ، راوی کہتے ہیں وہاں ان کا انتقال ہو گیا ، جب ہم نے انہیں لحد میں اتارا تو میں نے اپنی چادر لی اور وہ لحد میں ان کے رخسار کے نیچے رکھ دی تو سیدنا عبداللہ بن عباس رضی اللہ عنہما نے وہ چادر لے کر اسے پھینک دیا ۔
یہ روایت امام ابویعلیٰ نے نقل کی ہے اور اس کے رجال ” صحیح “ کے رجال ہیں ۔

یزید بن اصم بیان کرتے ہیں : میں نے اُم المؤمنین کو دیکھا کہ نبی اکرم صلی اللہ علیہ وسلم کے بعد انہوں نے اپنا سر مونڈوا دیا تھا ۔ میں نے یزید بن اصم سے کہا: ( یعنی اس بارے میں دریافت کیا ) تو انہوں نے فرمایا : ان کے بارے میں میرا یہ خیال ہے کہ وہ اپنے حلیے کو خراب کرنا چاہتی تھیں ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ، صرف عقبہ بن وہب کا معاملہ مختلف ہے اور وہ ثقہ ہے ۔

سیدہ میمونہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” بہنیں مومن ہیں ۔ “ نبی اکرم صلی اللہ علیہ وسلم کی مراد سیدہ میمونہ بنت حارث رضی اللہ عنہا تھیں اور سیدہ ام فضل بنت حارث رضی اللہ عنہا تھیں اور سیدہ سلمی تھیں ، جو سیدنا حمزہ رضی اللہ عنہ کی اہلیہ تھیں اور سیدہ اسماء بنت عمیس رضی اللہ عنہا تھیں ۔
یہ روایت امام طبرانی نے نقل کی ہے اس کی سند میں ایک راوی یعقوب بن محمد زہری ہے جسے ایک جماعت نے ثقہ قرار دیا ہے اور دوسرے لوگوں نے اسے ضعیف کہا: ہے اس روایت کے بقیہ رجال ” صحیح“ کے رجال ہیں ۔

محمد بن اسحاق بیان کرتے ہیں : نبی اکرم صلی اللہ علیہ وسلم کی زوجہ محترمہ سیدہ میمونہ بنت حارث رضی اللہ عنہا کا انتقال حرہ کے سال تریسٹھ ہجری میں ہوا تھا ۔
یہ روایت امام طبرانی نے نقل کی ہے اور اس کے رجال ثقہ ہیں ۔