مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : سیدہ خدیجہ رضی اللہ عنہا نے نبی اکرم صلی اللہ علیہ وسلم کے چھ بچوں کو جنم دیا تھا ۔ سیدنا عبداللہ ، سیدنا قاسم ، سیده زینب ، سیدہ رقیہ ، سیدہ ام کلثوم اور سیدہ فاطمہ رضی اللہ عنہم ۔ سیده ماریہ قبطیہ رضی اللہ عنہا نے نبی اکرم صلی اللہ علیہ وسلم کے صاحبزادے سیدنا ابراہیم رضی اللہ عنہ کو جنم دیا تھا ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی ابوشیبہ ابراہیم بن عثمان ہے اور وہ متروک ہے ۔

زبیر بن بکار بیان کرتے ہیں : نبی اکرم صلی اللہ علیہ وسلم کے ہاں سیدنا قاسم رضی اللہ عنہ کی پیدائش ہوئی جو آپ کی اولاد میں سب سے بڑے ہیں ، پھر سیدہ زینب رضی اللہ عنہا کی پیدائش ہوئی پھر سیدنا عبداللہ رضی اللہ عنہ کی ہوئی جنہیں طیب بھی کہا: جاتا ہے ، اور انہیں طاہر بھی کہا: جاتا ہے ، یہ اعلان نبوت کے بعد پیدا ہوئے تھے اور کمسنی میں انتقال کر گئے تھے ، پھر سیدہ ام کلثوم رضی اللہ عنہا پھر سیدہ فاطمہ رضی اللہ عنہا اور پھر سیدہ رقیہ رضی اللہ عنہا پیدا ہوئیں ، بچوں کی ترتیب یہی ہے ، سیدنا قاسم رضی اللہ عنہ کا انتقال مکہ میں ہوا تھا پھر سیدنا عبداللہ رضی اللہ عنہ کا انتقال ہو گیا تھا ۔
یہ روایت امام طبرانی نے نقل کی ہے اور اس کے رجال ثقہ ہیں ۔