مجمع الزوائد ومنبع الفوائد

سیده ام سلمہ رضی اللہ عنہا بیان کرتی ہیں ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” علی قرآن کے ساتھ ہو گا ، اور قرآن علی کے ساتھ ہو گا ، اور یہ دونوں ایک دوسرے سے جدا نہیں ہوں گے ، یہاں تک کہ یہ دونوں حوض پر میرے پاس آ جائیں گے ۔ “
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی صالح بن ابواسود ہے ، اور وہ ضعیف ہے ۔

سیدہ ام سلمہ رضی اللہ عنہا فرمایا کرتی تھیں : سیدنا علی رضی اللہ عنہ حق پر ہیں ، جو ان کی پیروی کرے گا ، وہ حق کی پیروی کرے گا ، جو انہیں چھوڑ دے گا ، وہ حق کو چھوڑ دے گا ، اور یہ ایک ایسا عہد ہے ، جو اس دن سے پہلے لیا جا چکا ہے ۔
یہ روایت امام طبرانی نے نقل کی ہے ۔ اس کی سند میں ایک راوی مالک بن جعونہ ہے ، اور میں اس سے واقف نہیں ہوں ، دو اسناد میں سے ایک کے بقیہ رجال ثقہ ہیں ۔

جری بن سمرہ بیان کرتے ہیں : جب اہل بصرہ اور سیدنا علی بن ابوطالب رضی اللہ عنہ کے درمیان اختلافات ہوئے ، تو میں روانہ ہوا اور میں مدینہ منورہ آ گیا ، میں سیدہ میمونہ بنت حارث رضی اللہ عنہا کی خدمت میں حاضر ہوا ، ان کا تعلق بنو ہلال سے تھا ، میں نے انہیں سلام کیا ، انہوں نے دریافت کیا : تمہارا تعلق کہاں سے ہے ؟ میں نے بتایا : اہل عراق سے ہے ۔ انہوں نے دریافت کیا : اہل عراق میں سے کن سے ہے ؟ میں نے جواب دیا : اہل کوفہ سے ہے ۔ انہوں نے دریافت کیا : اہل کوفہ میں سے کن سے ہے ؟ میں نے جواب دیا : بنو عامر سے ہے ۔ انہوں نے فرمایا : خوش آمدید ! تم قریبی ہو اور تمہیں خوش آمدید ! تم کس سلسلے میں آئے ہو ؟ میں نے کہا: سیدنا علی رضی اللہ عنہ سیدنا طلحہ رضی اللہ عنہ اور سیدنا زبیر رضی اللہ عنہ کے درمیان اختلافات پائے جاتے ہیں ، تو میں نے جا کر سیدنا علی رضی اللہ عنہ کی بیعت کر لی ، سیدہ میمونہ رضی اللہ عنہا نے فرمایا : تم ان کے ساتھ رہو ! اللہ کی قسم ! نہ تو وہ گمراہ ہوں گے اور نہ ہی گمراہ کریں گے ۔ یہ بات سیدہ میمونہ رضی اللہ عنہا نے تین مرتبہ ارشاد فرمائی ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ، صرف جری بن سمرہ کا معاملہ مختلف ہے ، اور وہ ثقہ ہے ۔

علی بن ربیعہ بیان کرتے ہیں : میں نے سیدنا علی رضی اللہ عنہ کو سنا ، ایک شخص ان کے پاس آیا اور بولا: اے امیر المؤمنین ! کیا وجہ ہے میں آپ کو دیکھ رہا ہوں کہ آپ لوگوں کو اس طرح پرے کر رہے ہیں ، جس طرح کوئی شخص اپنے اونٹ کو پرے کرتا ہے ، کیا یہ نبی اکرم صلی اللہ علیہ وسلم کی طرف سے ملنے والا کوئی عہد ہے ، یا یہ آپ کی ذاتی رائے ہے ، تو سیدنا علی رضی اللہ عنہ نے فرمایا : اللہ کی قسم ! نہ تو میرے ساتھ جھوٹی بات بیان کی گئی اور نہ ہی میں نے جھوٹ بولا: ، نہ میں گمراہ ہوا ہوں اور نہ ہی مجھے گمراہ کیا گیا ، بلکہ یہ اللہ کے رسول کی طرف سے عہد ہے ، اور وہ شخص رسوا ہو جائے جو جھوٹا الزام لگائے ۔ “
یہ روایت امام ابویعلیٰ نے نقل کی ہے ۔ اس کی سند میں ایک راوی ربیع بن سہل ہے ، اور وہ ضعیف ہے ۔

سیدنا ابوذر غفاری رضی اللہ عنہ روایت کرتے ہیں ، نبی اکرم صلی اللہ علیہ وسلم نے سیدنا علی رضی اللہ عنہ سے فرمایا : ” اے علی ! جو شخص مجھ سے جدا ہو گا ، وہ اللہ تعالیٰ سے جدا ہو گا ۔ اے علی ! جو شخص تم سے جدا ہو گا ، وہ مجھ سے جدا ہو گا ۔ “
یہ روایت امام بزار نے نقل کی ہے ، اور اس کے رجال ثقہ ہیں ۔